ოზურგეთში, ჟორჟოლიანის ქუჩაზე მცხოვრები თეკლა ხმელიძე მეოთხე შვილს მალე გააჩენს. ცეცხლაძეების ოჯახს სწორედ იმ დროს ვესტუმრეთ, როცა 7 წლის ნესტორი, 5 წლის თორნიკე და 2 წლის მარიამი დედას კარტოფილის გათლაში ეხმარებოდნენ. ისინი ახლა კალანდის და კიდევ მეოთხე ძმის თუ დის (რომელიც ახლა, მათივე თქმით, “დედიკოს მუცელში უზის”) მოლოდინში არიან.
ცეცხლაძეების ოჯახის დიასახლისი თეკლა ხმელიძე, თავისი სტატუსით უკვე მრავალშვილიან დედად რომ ჩავთვალოთ, არაფერი დაშავდება. იგი საუბრის დაწყებისთანავე ამბობს, რომ მართალია, ფუფუნებაში არ ცხოვრობს და უჭირს, მაგრამ სურს, არავის ეცოდებოდეს.
ახალგაზრდა ცოლ-ქმარი ნუგზარ ცეცხლაძე და თეკლა ხმელიძე საკმაოდ სიტყვაძუნწი და მორიდებული ადამიანები არიან. მათი ოჯახის შემოსავალი თითქმის არაფერია, გარდა სოციალური დახმარებისა, რომელიც სულ 126 ლარს შეადგენს.
_ ჩვენ დასაქმებული არ ვართ, სამუშაო ახლა რომ არ არის, ყველამ იცის. ამიტომ, რა აზრი აქვს, ტყუილა იწუწუნო?! მე სამუშაოს ყოველთვის ვეძებ, ძიძადაც მიმუშავია, თხილსაც ვაგროვებ, იატაკიც მომიხეხია… ეს ზოგს სათაკილოდ მიაჩნია, მე კი სიამოვნებას მანიჭებს, ამ საქმეში აღებული ფულით რომ შვილებს ვაპურებ; თან არ მსურს, ვინმეს ვეცოდებოდე. დედაჩემი, ქსენია ხმელიძე ოზურგეთის ნოტარიუსში მუშაობდა ადრე და სანამ ის იყო, არაფერი გამჭირვებია, არც ახლა მოვაშიებ შვილებს… უბრალოდ, ვინმეს რომ საცოდავად მოვეჩვენო, არ მინდა.
_ რატომ გგონიათ, რომ საცოდავად მიგიჩნევს ვინმე? განა არ ხართ ღირსი, რომ 27 წლის ასაკში 4 შვილს რომ ქვეყანას აჩუქებ, განსაკუთრებული ყურადღება მოგაქციონ?
_ მე ჯერ მრავალშვილიანად არ ვითვლები, თუმცა ამით თავს ვერავის შევაწყენ. კარგი იქნება, ჩემს ქმარს რომ სამსახური ჰქონდეს. მე სხვა აზრის ვარ, ადამიანს არანაირი ფიზიკური შრომა არ უნდა ეთაკილებოდეს, ჩემი ჯაფით ვცდილობ თავის გატანას და კარგი ის იქნება, საძებარი არ იყოს სამუშაო, რომელიც არასოდეს მეზარება. ჩემს შვილებს, არ მინდა, რაიმე ენატრებოდეს.
_ გქონიათ ასეთი მომენტი, რომ შვილებს რაღაც მოენატრათ და თქვენ ვერ შეუსრულეთ?
თეკლამ პასუხად გარსშემოხვეული შვილები უსიტყვოდ ჩაკოცნა: _ მე დედაჩემმა, ქსენია ხმელიძემ, როგორც შვილი ისე გამზარდა, ყველაფერი გამიკეთა და ალბათ ამიტომაც ვარ ასეთი. მე მოლდაველი ვარ, ბოშა! ეს ყოველივე დედაჩემმა მიამბო. მითხრა, რომ ციმბირიდან ჩამომიყვანა, გამზარდა. მშვენივრად შევეგუე, უდიდეს პატივს ვცემდი. ვთვლი, რომ ძალიან კარგად გამზარდა. ბავშვები სიგიჟემდე მიყვარს, ღვთის წყალობის იმედი მაქვს და ამიტომაც ვაჩენ.
_ მეუღლეს მშობლები ჰყავს?
_ კი. ჯანვერდი ცეცხლაძის შვილია. გეცოდინებათ ეს კაცი, ცნობილი მეფუტკრეა. ერთი ვაჟი მასთან ცხოვრობს, ცოლ-შვილით. ძალიან კარგი ადამიანია და შვილებისთვის შრომისმოყვარეობის მაგალითია.
_ თუ მიგიმართავთ ოზურგეთის მუნიციპალიტეტის გამგეობისთვის დახმარების სათხოვნელად?
_ ხომ გითხარით, მე ქსენია ხმელიძის შვილი ვარ და არ მინდა ვინმემ საცოდავი თვალით შემომხედოს. რაც უნდა გამიჭირდეს, პატივისმცემელს მადლობას ვეტყვი, მაგრამ კარზე ვერავის მივადგები. მთავარია, ჩემს რწმენაში იყოს სისუფთავე და სიხარბე არ მქონდეს. ასეთი შთაგონებით ვზრდი შვილებსაც.
_ შუქისა და გაზის ფულის გადახდას როგორ ახერხებთ?
_ სად მაქვს გაზი?! შემოყვანა ვერ მოვახერხეთ, მაგრამ შეშას ვხმარობთ, რა ვქნა? შუქის ფული ხან 20, ხანაც 30 ლარი გვიწევს. ამ 126-ლარიან დახმარებას ვანაწილებ.
_ ოთხი შვილის მეტს აღარ გავაჩენო, თქვით…
_ ძალიან მიჭირს ამის გამეორება, მაგრამ რაიმე ისეთ ხერხს მივმართავ, ალბათ, რომ ნაკლებცოდვიანი ვიყო. გასულ ზაფხულს, დაჩოქილი თხილს ვაგროვებდი, ასე ვიმუშავე მთელი ზაფხული, ლუკმა პურის გარდა, “კრასკა” და “შპაკლი” ვაგროვე, მინდა, რემონტიც ჩავატარო ნელ-ნელა, რომ შვილები უკეთეს გარემოში მყავდეს. იცით, რა? მე როცა ვშრომობ, თან ვფიქრობ, ახლა ამ ფულით შვილებს ლუკმას მივუტან-მეთქი, ეს კი ყოველგვარ დაღლილობას მიხსნის მხრებიდან. ძალიან მინდა, შვილები შრომის სიყვარულით გავზარდო, კარგი შვილი გაგაძლიერებს, ცუდი _ გაგტეხს წელში. ძალიან მინდა ისინი კარგ ქართველებად გაიზარდონ. ეს არის სულ ჩემი საფიქრალი…
თეკლა ხმელიძის ნაამბობის შემდეგ, აღარ გამკვირვებია, რატომ არის ასე მოხიბლული ყველა, ვინც მას კარგად იცნობს. სამი შვილის დედა, ღირსეული ქალი, რომელიც საცაა თავის ოჯახს კიდევ ერთ პატარას შეჰმატებს, ნამდვილად იმსახურებს დაფასებას და ოცნებების ასრულებაში ხელშეწყობას.
