ჯერ კიდევ შარშან აგორებული და დროებით მიჩუმებული გრიგოლეთის საწვრთნელი ბაზის ქონების გასხვისების საკითხი კვლავ აქტუალური გახდა და ამ საკმაოდ ბუნდოვან თემაზე საუბარი ამ ბოლო ხანს არ წყდება.
ლანჩხუთის მუნიციპალიტეტის საკრებულოს გასულ პარასკევს გამართულ სხდომაზე "თავისუფალი დემოკრატების" ფრაქციის თავმჯდომარემ ელგუჯა ჩხაიძემ თავის გამოსვლაში ბაზის ქონების განიავების თემა კიდევ ერთხელ წამოწია, რასაც დეპუტატ გია გოგუაძის მიერ იმ მოხსენებითი ბარათის წაკითხვა მოჰყვა, რომელიც თავის დროზე გამგებელს გამგეობის აუდიტის სამსახურის უფროსმა გოგი ფაცურიამ მიწერა.
ჯერ კიდევ 2013 წლის 12 აგვისტოს, სახელმწიფო ქონების ეროვნული სააგენტოს თავმჯდომარის #1/1-676 ბრძანებით, ლანჩხუთის მუნიციპალიტეტს დამატებითი ქონების სახით გადაეცა სოფელ გრიგოლეთში მდებარე შენობა-ნაგებობები და 4 235 კვ/მ არასასოფლო-სამეურნეო დანიშნულების მიწის ნაკვეთი.
2013 წლის 14 ოქტომბერს გრიგოლეთის ბაზის მმართველად დაინიშნა ო. ჩხაიძე, რომელსაც შრომითი ხელშეკრულება 2014 წლის 31 მაისს შეუწყდა. ამას წინ უძღოდა ბაზის ქონების გასხვისების გამო ადგილობრივ მედიაში ატეხილი სკანდალი, რის გამოც მუნიციპალიტეტის გამგებელმა ზაზა ურუშაძემ აუდიტის სამსახურს საქმის შესწავლა დაავალა, რის დასტური 2014 წლის 27 იანვრით დათარიღებული ზემონახსენები მოხსენებითი ბარათია.
ამ დოკუმენტში აღნიშნულია, რომ "საფეხბურთო მოედნის ღობის და სხვა ობიექტების აღსადგენად ო. ჩხაიძის მიერ ზეპირი შეთანხმების საფუძველზე დაქირავებული ბრიგადის მიერ (სულ 4 წევრი, ხელმძღვანელი დ. ტაკიძე), აღდგენილი იქნა ბაზის ტერიტორიის ღობე 26 გრძ/მ; 2მ. სიმაღლის, სასადილოს შენობაში ორ ოთახში გაყვანილი იქნა ელექტროობა და ჩატარდა სამღებრო სამუშაოები. ასევე ზეპირი შეთანხმებით აღნიშნულ სამუშაოებში უნდა გადახდილიყო 2 100 ლარი. თანხის მაგივრად ბრიგადას გადასცეს 80 გრძ/მ რკინის მილი (1გრძ/მ შეფასდა 12 ლარად), რომლის საერთო ღირებულება შეადგენს 960 ლარს.
ტერიტორიაზე თავმოყრილი ჯართის ჩაბარების შედეგად აიღეს 750 ლარი, ხოლო ჯართად ქცეული წყლის ავზის ჯართად ჩაბარებით – 210 ლარი, სულ დ. ტაკიძის ბრიგადას აღნიშნული ხელფასის სახით გადაუხადეს 1920 ლარი. გადასახდელი დარჩა 180 ლარი. სასადილოს მიმდებარე ტერიტორიაზე არსებული შენობიდან მოხსნილი შიფერის რეალიზაციით მიიღეს 465 ლარი, რითაც ანაზღაურებული იქნა სპორტული ბაზის და საფეხბურთო კლუბ "გურიას" სტადიონის ელექტროენერგიის დავალიანება.
სოფ. გრიგოლეთში მცხოვრები პავლე თევზაძის მიერ, თავისი ძალებით, წაღებული იქნა აზბოცემენტის მილები – 10 ცალი, თითოეული 6 გრძ/მ ერთეულის ფასი 60 ლარი, სულ შეფასებული 600 ლარად, აღნიშნული თანხით ანაზღაურებული იქნა საფეხბურთო კლუბ "გურიას" სტუმართა ბინით მომსახურების დავალიანება. სულ სხვადასხვა სახით საამშენებლო მასალებისა და ჯართის რეალიზაციით მირებულმა თანხამ შეადგინა 3970 ლარი".
აუდიტის სამსახურს ლანჩხუთის მუნიციპალიტეტის გამგეობის ქონების მართვის სამსახურის მიერ მოწოდებული მონაცემების თანახმად მიაჩნია, რომ "თვითმმართველი ერთეულის დამატებითი ქონების გასხვისება შესაძლებელია საქართველოს კანონმდებლობით დადგენილი წესით, შემდეგი სამართლებრივი პროცედურების დაცვით:
1. სახელმწიფოსაგან გადმოცემული თვითმმართველი ერთეულის ქონების რეგისტრაცია საჯარო რეესტრში;
2. თვითმმართველი ერთეულის ქონების აუდიტორული შემოწმება, საკრებულოს ქონების პრივატიზების შესახებ წინადადებით მიმართვა;
3. პრივატიზების შესახებ საკრებულოს შესაბამისი სამართლებრივი აქტის საფუძველზე ქონების საპრივატიზაციო ნუსხაში შეტანა ქონების აუდიტორული შეფასების შედეგად განსაზღვრული ღირებულებით (საწყისი წლიური ფასი);
4. პრივატიზების შესახებ საკრებულოს შესაბამისი სამართლებრივი აქტის საფუძველზე სააუქციონო კომისიის მიერ აუქციონის მოწყობა.
ზემოაღნიშნული 4 პუნქტიდან მოცემულ შემთხვევაში შესრულებულია მხოლოდ პირველი (რეგისტრაცია საჯარო რეესტრში)".
ყოველივე ამის გათვალისწინებით აუდიტის სამსახურს მიაჩნია, რომ – "სპორტული ბაზის მმართველმა ო. ჩხაიძემ დაარღვია ხელშეკრულებითა და მოქმედი კანონმდებლობით გათვალისწინებული ნორმები და თავისი შეხედულებით განახორციელა ზემოაღნიშნული კანონშეუსაბამო მოქმედებები".
თავის დროზე გამგებელი ზაზა ურუშაძე იძულებული გახდა ო. ჩხაიძისთვის ხელშეკრულება შეეწყვიტა. უფრო მეტიც _ მაშინ ის აცხადებდა, რომ თავად იყო დაინტერესებული სიმართლის გარკვევით და ამის დასტური მის მიერ აუდიტის სამსახურისთვის ბაზის საქმიანობის შესწავლის დავალების მიცემა გახლდათ.
დეპუტატმა გია გოგუაძემ ჯერ კიდევ წინა საკრებულოს სხდომაზე დასვა საკითხი, იცოდა თუ არა გამგებელმა აუდიტის სამსახურის დასკვნის შესახებ და თუ იცოდა, რატომ დანიშნა ჩხაიძე საფეხბურთო კლუბ "გურიის" აღმასრულებელ დირექტორად.
იმ სხდომაზე ზაზა ურუშაძემ მაშინდელი აუდიტის სამსახურის ხელმძღვანელ გიორგი ფაცურიასკენ გაიშვირა ხელი, რომ დასკვნაში კანონდარღვევაზე საუბარი არ ყოფილა: "აგერ არის ფაცურია, მის პატიოსნებაში ეჭვი ხომ არ გეპარებათ და ჰკითხეთ, ჰქონდა თუ არა იქ რამე კანონდარღვევას ადგილი?"
ამავდროულად გამგებელმა საკრებულოს ინფრასტრუქტურის კომისიის ერთ-ერთ ბოლო სხდომაზე გია გოგუაძეს და მასთან ერთად სხვა იმ ადამიანებსაც, ვინაც მიიჩნევდა, რომ ბაზის ქონება უკანონოდ გასხვისდა, შემდეგი სიტყვებით მიმართა: "თქვენ ძალიან გინდათ, რომ ბაზაზე რამე უკანონოდ მოხდა, მაგრამ თქვენდა სამწუხაროდ, ეს ასე არ არის".
აქედან გამომდინარე, მის ოპონენტებს გაუჩნდათ კითხვა _ აფარებს თუ არა ხელს გამგებელი ბაზის ქონების გასხვისების გამო ჩადენილ შესაძლო დანაშაულს და თუ აფარებს, რატომ?
მოხსენებითი ბარათის გახმოვანების შემდეგ, ზაზა ურუშაძემ განაცხადა, რომ თავის დროზე თავად იყო დაინტერესებული სიმართლის გარკვევით და ხელი არასდროს არავისთვის დაუფარებია. "თუ რამე საპროკურატუროს ხედავთ ამ დასკვნაში, მიმართეთ პროკურატურას", _განუცხადა მან გია გოგუაძეს.
"მე რა შუაში ვარ?! კაცის დაჭერას არ ვითხოვ, უბრალოდ მაინტერესებს, რატომ დანიშნეთ ეს ადამიანი ბევრად უფრო საპასუხისმგებლო თანამდებობაზე?", _ იკითხა გოგუაძემ.
"მე ვთვლი, რომ როგორც აუდიტის სამსახური მეუბნება, დანაშაულის ფაქტებს იქ არ ქონდა ადგილი და თუ თვლით, რომ ასე არაა, კი ბატონო, გადავაგზავნოთ პროკურატურაში. მეტი რა ვთქვა", _ დასძინა გამგებელმა.
