ჰქონდა თუ არა პოლიციის მხრიდან უფლებამოსილების გადამეტების ფაქტს ადგილი 24 მაისს, ქალაქ ოზურგეთში, რესტორან “თამარიონის“ ტერიტორიაზე? _ აღნიშნულთან დაკავშირებით, 3 ივნისს, 15 საათზე, ოზურგეთის რაიონულ სასამართლოში, სახანძრო-სამაშველო სამსახურის თანამშრომლის, ბექა თავდიშვილის მიმართ ადმინისტრაციულ სამართალდარღვევათა კოდექსის 166 და 173 მუხლებით საქმის განხილვა დაიწყო.
თავდიშვილს პოლიციისთვის წინააღმდეგობის გაწევას, ხულიგნობას და დაუმორჩილებლობას ედავებიან.
საქმე ეხება 24 მაისს, რესტორან "თამარიონში" პოლიციასა და რამდენიმე პირს შორის ფიზიკური და სიტყვიერი დაპირისპირების ფაქტს.
„გურია ნიუსთან“ ინციდენტის შესახებ თვითმხილველები საუბრობენ: სახანძრო-სამაშველო სამსახურის თანამშრომელი ბექა თავდიშვილი და მისი ნათესავები რესტორნის მიმდებარე ტერიტორიაზე იყვნენ.
ქორწილის მეორე დღე იყო, იყვნენ ნასვამები და ხმამაღლა საუბრობდნენ. თავდიშვილს მეუღლე სახლში წასვლას სთხოვდა, იქვე ახლოს იდგა პოლიციის “პიკაპი“, რომელშიც ისხდნენ პოლიციელები. მეუღლეებს შორის საუბრის დროს, ბავშვმა დაიწყო ტირილი.
ამ დროს გადმოხტა ოთხი პოლიციელი, მივარდნენ ბექა თავდიშვილთან და უთხრეს, უნდა წაგიყვანოთ პოლიციაშიო. ამ ფაქტს შეესწრნენ მათი ახლობლები, რომლებიც სთხოვდნენ პოლიციელებს, გაერკვიათ ისინი, რატომ მიჰყავდათ თავდიშვილი.
ამ დროს პოლიციელმა ბექასთან ერთად რამდენიმე პირს უთხრა, რომ მათაც წაიყვანდა და დააპატიმრებდა. მათ შორის იყო სოფელ კონჭკათში მცხოვრები ნოდარ სირაძეც, რომელიც ბექა თავდიშვილის ახლო ნათესავია.
როგორც აღნიშნული ინციდენტის თვითმხილველები ამბობენ, თავდიშვილი და სირაძე პოლიციას განმარტებებს სთხოვდნენ:
"ცდილობდნენ, გაეგოთ, რა იყო დაკავების მიზეზი. პოლიციელებმა მათ არ განუმარტეს. ემუქრებოდნენ თავდიშვილს, არ გაგახარებთ, სამსახურიდან გაგათავისუფლებთო. ამ დროს მოვიდა მეორე ეკიპაჟი. უკვე შეიქმნა სერიოზული კონფლიქტი. იქვე მყოფი ადამიანები პოლიციელებისგან განმარტებებს ითხოვდნენ, რაც არ მოხდა.
ამ დროს პოლიციელმა დაუწყო ცემა რამდენიმე პირს, რისი ამსახველი ვიდეოკადრებიც არსებობს.
ფაქტობრივად, 6 კაცია ნაცემი _ ნათესავები, მათ შორის, ბექა თავდიშვილის მეუღლე, ასევე, შალვა თავდიშვილის ცოლისძმა, რომელსაც ყელში წაუჭირეს ხელები და ახრჩობდნენ. ვიდეოში ჩანს, ასევე, როგორ ჩაარტყა პოლიციელმა მას კისერში, ამ ყველაფრის ვიდეო მასალა არსებობს, რაც სასამართლოშია წარდგენილი“, _ ამბობენ “გურია ნიუსთან" აღნიშნული ინციდენტის თვითმხილველები.
ნოდარ სირაძის სასამართლო პროცესი უკვე ჩატარდა და მას 300 ლარით ჯარიმა დაეკისრა.
ბექა თავდიშვილის უფლებების დამცველი კახა ჩავლეშვილი ამბობს, რომ მას აღნიშნული ფაქტის ამსახველი ვიდეო ნანახი აქვს, რაც პოლიციელის პატაკთან სრულ წინააღმდეგობაში მოდის.
მისი თქმით, ხულიგნობის ოქმი 25 მაისს არის გატარებული, მაშინ, როცა თავდიშვილი და სირაძე 24 მაისს დააკავეს.
“მაშინ, როდესაც არ არსებობს მათი დაკავების არანაირი საფუძველი, თან, რომ მაპატიმრებ, წარმომიდგინო უნდა _ ვინ ხარ, რატომ მაკავებ. გზაშიც სცემეს ერთ-ერთი დაკავებული“, _ ამბობს ადვოკატი. ჩავლეშვილს მიაჩნია, რომ თავდიშვილი და სირაძე უკანონოდ არიან დაკავებულები.
“სასამართლოზე მოვითხოვე აღნიშნული პირების დაკავების ვიდეოფირები, ასევე, რესტორან “თამარიონის“ ტერიტორიაზე მომხდარი ინციდენტის ვიდეო ფირი“, _ აღნიშნავს ჩავლეშვილი და ვარაუდობს, რომ კადრები აღარ იქნება.
“ბექა თავდიშვილი და ნოდარ სირაძე არიან უკანონოდ დაკავებულები. არც ხულიგნობას ჰქონია ადგილი და არც დაუმორჩილებლობას პოლიციის კანონიერი მოქმედებისადმი. მათთვის არავის განუმარტავს დაკავების მოტივი, არც ადვოკატის შესახებ, სახლში დარეკვაც არ აცალეს. რაც შეეხება თვითმხილველების მონათხრობს, აშკარად პოლიციის მხრიდან ძალადობას ჰქონდა ადგილი. იყო ცემის ფაქტი რამდენიმე ადამიანის მიმართ, ყველა მტკიცებულება წარდგენილია სასამართლოში და იმედი მაქვს, რომ სასამართლო მიიღებს კანონიერ გადაწყვეტილებას. მე ვნახე ის ვიდეოები და დავრწმუნდი, რომ არანაირ ხულიგნობას ადგილი არ ჰქონია“, _ ამბობს თავდიშვილის უფლებების დამცველი.
აღნიშნულ საქმეზე სასამართლო პროცესი 10 ივნისს გაიმართება.
ბექა თავდიშვილი ოზურგეთის მუნიციპალიტეტის გამგებლობის ყოფილი კანდიდატის _ შალვა თავდიშვილის ძმაა, რომელიც "ნაციონალური მოძრაობიდან" იყრიდა კენჭს არჩევნებში.
“გურია ნიუსი“ დაუკავშირდა შსს პრესსამსახურს, სადაც განგვიმარტეს, რომ აღნიშნულ საქმეს განიხილავს სასამართლო, შესაბამისად, ჩვენს კითხვაზე, ჰქონდა თუ არა პოლიციის მხრიდან უფლებამოსილების გადამეტების ფაქტს ადგილი, შსს პრესსამსახური კომენტარს არ აკეთებს.
