ზესტაფონის რაიონის სამი სოფლის მოსახლეობის პრობლემის მოგვარების გადაწყვეტილება ჯერჯერობით მიღებული არ არის.
საქმე ისაა, რომ ზესტაფონის მუნიციპალიტეტის ზედა და ქვედა არგვეთის, ასევე სვირის დასახლების სოფლები, სადაც ზესტაფონი-ქუთაისის დამაკავშირებელმა ავტობანმა უნდა გაიაროს ერთმანეთს მოკლე გზით ვეღარ დაუკავშირდება და მოსახლეობას დამატებით 3 კილომეტრის გავლა მოუწევს, რასაც მოსახლოების დიდი ნაწილი აპროტესტებს.
როგორც "გურია ნიუსთან" საუბრისას სოფლის მოსახლეობა ამბობს, ავტობანის გაკეთების შემთხვევაში, მოსახლეობას ერთმანეთთან დაკავშირება თერჯოლისა და ზესტაფონის ცენტრებამდე ჩასვლით და ზედმეტი 2,5 და 3 კილომეტრის გავლით მოუწევს. საქმე იმაშია, რომ ახლა, ზედა და ქვედა არგვეთის მოსახლეობა, ასევე სვირის დასახლება ერთმანეთს მოკლე გზით უკავშირდება. მოსახლეობას ახლა ცენტრალური ავტომაგისტრალის გადაჭრა უწევთ.
ავტობნის მშენებლობისთვის საჭირო პირველადი სამუშაოები ადგილზე უკვე დაწყებულია, თუმცა მოსახლეობა ამბობს, რომ მშენებელ კომპანიას სამუშაოების გაგრძელების საშუალებას არ მისცემენ.
ადგილობრივები ამბობენ, რომ ძალიან ბევრი პრობლემა ექმნებათ, მათ შორის ისიც, რომ სოფლების საძოვრები ძირითადად ქვედა არგვეთისა და სვირის დასახლებების ტერიტორიაზეა, თუმცა მას ზედა არგვეთის მოსახლეობაც იყენებს. ასევეა სახნავ-სათესი მიწების შემთხვევაშიც. კიდევ ერთი პრობლემა კი, სკოლის მოსწავლეებისთვის შეიქმნება, რადგან ქვედა არგვეთისა და სვირის დასახლებებს სკოლა არ აქვთ და მოსწავლეებს ისინი ზედა არგვეთის სკოლაში დადიან. სკოლამდე ახლა 5 კილომეტრამდე გზაა, თუმცა ავტობანის გაკეთების შემდეგ ეს გზა მოსწავლეებისთვის კიდევ 3 კილომეტრით დაგრძელდება.
"სასწრაფო ჯერ ისედაც არ მოდის სოფელში, ახლა რომ დაგვჭირდეს, 3 კილომეტრი დამატებით უნდა გამოიაროს, რომ ჩვენამდე მოვიდეს, ასევე ბავშვებს ყოველდღე 3 კილომეტრით დაუგრძელდებათ სკოლამდე მისასვლელი გზა. რომ მოკვდეს ვინმე, თერჯოლაში უნდა ჩავიყვანოთ იქ მოვუხვიოთ და ისე მივიყვანოთ სასაფლაომდე. გზა ისე გააკეთონ, რომ დახმარების მაგივრად პრობლემა არ შეგვიქმნან. ყანებამდე ვერ მივალთ, საქონელს ვერ გადავდენით. ეს ხომ უნდა გაითვალისწინონ?!", _ ამბობენ სოფელ არგვეთის მაცხოვრებლები.
პრობლემის შესახებ უკვე იციან რეგიონული განვითარებისა და ინფრასტრუქტურის სამინისტროში. როგორც უწყების პრესსამსახურში "გურია ნიუსს" უთხრეს, შექმნილია სამუშაო ჯგუფი, რომელიც სოფლის მოსახლეობასთან მოლაპარაკებებს აწარმოებს, რომ მათთვის კოპრომისული ვარიანტი გამოიძებნოს.
"ჯგუფი რამდენიმე დღეა შეიქმნა. გვინდა, ისე გადაწყდეს საკითხი, რომ არც გზის მშენებლობას შეექმნას პრობლემა და არც მოსახლეობას. ადგილზე ფეხით გადასასვლელი გზა კეთდებოდა, თუმცა ეს მოსახლეობას არ აკმაყოფილებს. ზოგადად, ამ პროექტში არის საკითხები, რომელიც კორექტირებას საჭიროებს. ახლაც ეს ეტაპია. ჯერჯერობით გზის მშენებლობა დაწყებული არ არის. მოსახლეობა წინასწარ შიშობს, რომ პრობლემა შეექმნებათ", _ გვითხრეს უწყების პრესსამსახურში.
რაც შეეხება პროექტში მოსახლეობის ინტერესების გათვალისწინებას, რაც აქამდე ვერ მოხერხდა, სამინისტროში ამბობენ, რომ ზესტაფონის ადგილობრივმა თვითმმართველობამ წინა ხელისუუფლების დროზე, ეს პროექტი ბეჭდით დაამოწმა და სამინისტროში გადააგზავნა.
"როგორც ჩანს, მაშინ არ მიაქციეს ყურადღება, ამიტომ ახლა კორექტირება გახდა საჭირო. არის ბევრი ისეთი პროექტი, რომელიც წინა ხელისუფლების დროს გაკეთდა და ახლა კორექტირება გვიწევს. მსგავსი კორექტირება მოხდა წყალტუბოს პროექტში და თბილისი–რუსთავის ავტობანზეც", _ გვითხრეს სამინისტროს პრესსამსახურში.
ზესტაფონის მუნიციპალიტეტის გამგებელი ტარიელ თუთარაშვილი, რომელიც მოსახლეობასთან მოლაპარაკებებშია ჩართული, "გურია ნიუსთან" საუბრისას ამბობს, რომ შესაძლოა ორ სოფელს შორის დამაკავშირებელი გზა გაკეთდეს, რომელიც მხოლოდ პირუტყვის გადასადენად და მსუბუქი ავტომობილებისთვის იქნება განკუთვნილი. თუმცა, ჯერჯერობით შეთანხმება მიღწეული არ არის.
"მოსახლეობის ძირითადი პრობლემა გაცილებით მეტი გზის გავლაა, ვიდრე ახლა გადიან. დაახლოებით, 3 კილომეტრის გავლა უწევთ დამატებით. ასევე იქმნება პირუტყვის გადადენის პრობლემაც. ჩვენ მივმართეთ საავტომობილო გზების დეპარტამენტს, ჩამოსულები იყვნენ და ვცდილობთ პრობლემა მოვაგვაროთ. ამ ეტაპზე მიმდინარეობს იმაზე მოლაპარაკება, რომ ავტომაგისტრალის ქვეშ გასაძრომი გზა დამზადდეს, თუმცა ეს გზა მხოლოდ პირუტყვის გადასადენად იქნება. ყველაზე კარგ ვარიანტში კი, მსუბუქი ავტომობილების გასავლელადაც. თუმცა, ეს ჯერ გადაწყვეტილი არ არის. რაც შეეხება სასწრაფოს, სახანძრო მანქანებსა და დიდ ტექნიკას, მათ დამატებითი გზის გავლა მოუწევთ. გადაწყვეტილებას სავარაუდოდ ამ დღეებში მიიღებენ", _ ამბობს თუთარაშვილი და დასძენს, რომ ადგილზე ჩვეულებრივი ავტობანის გაკეთება დამატებით 3 მილიონი ლარი ჯდება, ამასთანავე მოსახლეობის ნაწილის სხვა ადგილზე გადასახლება გახდება საჭირო.
"ეს ვარიანტი ჯერჯერობით არ განიხილება. უფრო რთული გასაკეთებელია, მოსახლეობასთან უნდა შეჯერდეს, როგორ ურჩევნიათ", _ ამბობს თუთარაშვილი.
ჯერჯერობით უცნობია, დასახელებული სოფლების გარდა პრობლემა კიდევ რომელიმე სოფელს ხომ არ ექმნება. საქმე იმაშია, რომ აღნიშნულ მონაკვეთზე ზესტაფონის სოფლებისა და ბაღდათის რაიონის გადასახვევია. მუნიციპალიტეტის გამგებლისთვის უცნობია, რა გზის გავლა მოუწევთ ბაღდათისკენ მიმავალ მოსახლეობას. როგორც თუთარაშვილი ამბობს, ჯერჯერობით ამ მონაკვეთზე ავტობანის მშენებლობის საკითხი გადაწყვეტილი არ არის.
"ავტობანის ეს ნაწილი არგვეთის ტერიტორიასთან მთავრდება. ბაღდათის გადასახვევამდე პროექტი ჯერჯერობით არ მოდის. ჩემთვის პირადად ამის შესახებ ცნობილი არ არის", _ ამბობს თუთარაშვილი.
