(გურია ნიუსი, ლანჩხუთი) _ როგორც ქართული სპორტული მედია კვიპროსელ კოლეგებზე დაყრდნობით წერს, ორშაბათს, საქართველოს ეროვნული ნაკრების წევრმა, დავით კვირკველიამ ფამაგუსტის “ანორთოსისის” შემადგენლობაში პირველად ივარჯიშა და კვიპროსის პირველ დივიზიონში (უმაღლესი ლიგა) მისი დებიუტი, შესაძლოა, შაბათს, “ომონიასთან” გასვლით შეხვედრაში შედგეს.
“ანორთოსისის” ვებგვერდის ცნობით, ქართველი მარცხენა მცველი, გუნდის ძირითად შემადგენლობასთან ერთად, სრულად დაიტვირთა. კვირკველიამ მიმდინარე სეზონი ბერძნულ “პანიონიოსში” დაიწყო და კვირას “ანორთოსისთან” 6-თვიანი კონტრაქტი გააფორმა, რომლის ამოწურვის შემდეგ, კლუბისა და ფეხბურთელის შეთანხმების შემთხვევაში, თანამშრომლობა კიდევ ერთი წლით გაგრძელდება. კვირკველია მესამე ქართველი ლეგიონერია, რომელსაც მიმდინარე სეზონში კვიპროსის პირველ დივიზიონში თამაში მოუწევს ჴ ახნის “ეთნიკოსში” ლევან მაღრაძე და ლევან ქებაძე გამოდიან.
საქართველოს ნაკრების წევრმა ონსპორტს.გრ-ის განუცხადა, რომ “პანიონიოსში” მშვენიერი პერიოდი გაატარა და ამ გუნდს ყოველთვის ტკბილად გაიხსენებს: “ათენში სულ ერთი წელიწადი ვითამაშე, მაგრამ ისეთი შეგრძნება მქონდა, თითქოს 4 წელი გამეტარებინა. ძალიან შევეჩვიე. “პანიონიოსი” ერთი ოჯახი იყო. დიდ მადლობას ვუხდი გულშემატკივრებსაც. მწვრთნელ აპოსტოლ მანციოსს მუდამ წარმატებას ვუსურვებ და რა თქმა უნდა, ფეხბურთელებისთვისაც საუკეთესო მსურს. “პანიონიოსს” წინსვლა და საბერძნეთში ცხრილის ზედა ნაწილში დამკვიდრება შეუძლია. ეს ორიოდე დღის წინათ, ქვეყნის თასზეც დავამტკიცეთ, როცა გათამაშებას “პანათინაიკოსი” გამოვთიშეთ”.
რაც შეეხება მის ახალ გუნდს _ “ანორთოსისს”, ეს გუნდი კვიპროსზე 16 ტურის შემდეგ მე-2 ადგილზეა და მხოლოდ 3 ქულით ჩამორჩება ლიდერ “ომონიას”. კლუბის სპორტული დირექტორია დამოუკიდებელი ქართული ფეხბურთის ისტორიაში ერთ-ერთი გამორჩეული ფეხბურთელი გიორგი ქინქლაძე.
