ხელისუფლებამ ამ საკითხის მოგვარების პირობა ბევრჯერ დადო, თუმცა, პრობლემა პრობლემა რჩება _ ჩოხატაურელ ექიმებს დეკემბერ-იანვრის ხელფასები ახლაც არ აქვთ მიღებული.
“გურია ნიუსი” ამ საკითხზე ჯანდაცვის მინისტრს, ანდრია ურუშაძეს რამდენჯერმე დაუკავშირდა. სამინისტროს პრესსამსახურის ხელმძღვანელმა, ურუშაძის კომენტარი მას შემდეგ გამოგვიგზავნა, რაც მინისტრს მოკლე ტექსტური შეტყობინება გავუგზავნეთ:
_ თანამშრომლების გათავისუფლების შესახებ ვერაფერს გეტყვით, რადგან “ადითი” კერძო კომპანიაა და ჩვენ მათ საქმიანობაში ჩარევის უფლება არ გვაქვს. თუმცა, არ უარვყოფ, რომ ჩოხატაურის საავადმყოფოში პრობლემებია. ვფლობთ ყველა ინფორმაციას და იანვრის ბოლომდე ეს საკითხი მოგვარდება, _ ასეთი იყო მინისტრის კომენტარი ამ თემასთან დაკავშირებით და ასე ეწერა გაზეთშიც (იხ. გურია ნიუსი, #1). თუმცა, 19 იანვარს, ჩოხატაურის საავადმყოფოში მყოფმა ურუშაძემ, ჩვენთან საუბრისას აღნიშნა, რომ ჩვენ გაზეთში სხვა რამე გვეწერა(?!):
_ თქვენ დაწერეთ, ურუშაძემ გვითხრაო და მე პირადად თქვენთან არ მისაუბრია…
_ ჩვენ დავწერეთ, რომ ეს იყო თქვენი კომენტარი, რომელიც თქვენივე პრესსამსახურმა მოგვაწოდა თქვენივე სახელით, მას შემდეგ, რაც სატელეფონო ზარებს არ უპასუხეთ და სმს მოგწერეთ, რომ თქვენივე უწყების წარმომადგენლებისთვის სიტუაცია განგემარტათ…
_ ჰო, ეგ პრესსამსახურმა კი გითხრათ მაგრამ… _ მინისტრმა “გურია ნიუსთან” საუბრის გაგრძელება აღარ ისურვა და არც იმ კითხვაზე გვიპასუხა, სანამდე უნდა გაგრძელდეს დაპირებები, რომლითაც ყველა თვეში კვებავენ ექიმებს.
ხელისუფლება კლინიკებს მხოლოდ სატელევიზიოდ ხსნის, პრობლემებზე საუბრისას კი მათი კერძო მფლობელობა ახსენდება.
აღსანიშნავია, რომ სხვა მედია საშუალებისგან განსხვავებით, ურუშაძის სტუმრობა “გურია ნიუსს” არავინ შეატყობინა. მინისტრის ვიზიტის შესახებ ჩვენ საკუთარი წყაროსგან შევიტყვეთ.
ურუშაძე ჩოხატაურს, გუბერნატორთან ვალერი ჩიტაიშვილთან ერთად, 19 იანვრის საღამოს ესტუმრა და ექიმებს საავადმყოფოს დარბაზში შეხვდა. საავადმყოფოს 86 თანამშრომლიდან, შეხვედრაზე 15-მდე მედიკოსი იმყოფებოდა. საავადმყოფოს დირექტორის, თემურ კოროშინაძის თქმით, მინისტრის სტუმრობის შესახებ ინფორმაციას ყველა ექიმი ფლობდა, თუმცა, მათი ნაწილი შეხვედრაზე არ იმყოფებოდა:
_ რაოდენობა გაცილებით მეტი იქნებოდა, მაგრამ უამინდობის გამო, ჩოხატაურის მიმდებარე სოფლებში მცხოვრებმა პერსონალმაც კი ვერ შეძლო მოსვლა. თუმცა, მიმაჩნია რომ რაოდენობას არ აქვს მნიშვნელობა. მთავარი ის იყო, რომ მინისტრი ჩამობრძანდა და ადგილზე გაეცნო არსებულ პრობლემებს, _ აღნიშნა ჩვენთან საუბრისას კოროშინაძემ.
შეხვედრაზე ექიმები ურუშაძეს იმ პრობლემებზე ესაუბრნენ, რაც მათ ებრაული კომპანიის _ “ადითის” შემოსვლის შემდეგ შეექმნათ. რამდენიმეთვიანი სახელფასო დავალიანების შესახებ მინისტრის პასუხი მხოლოდ დავალიანების გაცემის დაპირება იყო.
მინისტრის განმარტებით, პრობლემები ერთ და ორ დღეში ვერ მოგვარდება, თუმცა, სიტუაცია აუცილებლად გამოსწორდება(?!). მისივე თქმით, სახელფასო დავალიანება როგორც ჩოხატაურის საავადმყოფოს მედპერსონალს, ასევე ლანჩხუთის საავადმყოფოს თანამშრომლებსაც დაურიგდებათ, რომლებიც “ადითს” იგივე მდგომარეობაში ჰყავს.
მინისტრი დეტალურად დაინტერესდა საავადმყოფოს შემოსავლებით, იმით, თუ რამდენი ქირურგიული და გინეკოლოგიური ოპერაცია ტარდება თვის განმავლობაში, რამდენ მშობიარეს იღებს საავადმყოფო და რამდენი ორსული ჰყავთ აღრიცხვაზე.
ანდრია ურუშაძემ ექიმებთან საუბრის შემდეგ, საავადმყოფო დაათვალიერა. მინისტრის ჩქარ ტემპს ექიმებმა ფეხი ვერ აუწყვეს და დანანებით ჩაილაპარაკეს, ეს პრეზიდენტის ფეხზეა აწყობილი და ჩვენ რას დავეწევითო.
ექიმების ნაწილი შეხვედრით უკმაყოფილო დარჩა, რადგან ურუშაძეს პრობლემების გადაჭრის კონკრეტული გზა არ დაუსახელებია. თუმცა, როგორც ყოველთვის, ახლაც იყო დაპირებები, რომლებმაც ბევრს იმედები ჩაუსახა. ჩვენთან საუბრისას ექიმი ნატო კიკვაძე ამბობს, რომ ურუშაძემ მასზე კარგი შთაბეჭდილება დატოვა:
_ ისეთი შთაბეჭდილება დამრჩა, მინისტრმა არ იცოდა, ჩვენ რომ ასეთი დაბალი ანაზღაურება გვქონდა. ისე, ძალიან მომეწონა მინისტრი, ეტყობა, ძალიან განათლებულია, ჩვენს პრობლემას კარგად იცნობს. ვფიქრობ, კარგად იცის, რა სიტუაცია შექმნა “ადითმა” ჩვენთან, რეგიონებში. მაგრამ არ იცოდა, რომ დაბალი ანაზღაურება გვაქვს და ჩვენ ეს გარკვევით ვუთხარით.
_ შექმნილი პრობლემებიდან გამოსავალი დაინახეთ?
_ მან თქვა, რომ ამას განიხილავს. “ადითი” კერძო კომპანიაა და აქტიური ჩარევის უფლება სახელმწიფოს არ აქვს. ნამდვილად ჩვენს გვერდით არის საკრებულოს თავმჯდომარე, გამგებელი, რომელიც არაერთხელ იყო ჩვენთან, ჩვენც ვიყავით მასთან. აქტიური ჩარევა ვერ ხდება იმის გამო, რომ ეს კერძო კომპანიაა, მან უნდა განახორციელოს ინვესტიცია ჩვენს დაწესებულებაში და მოგებაზე უნდა იმუშაოს. დღემდე რომ არაფერი არ გაუკეთებია ამ ინვესტორს, ძალიან კარგად იციან მაგათმა. ისეთი შთაბეჭდილება დამრჩა, რომ თუ “ადითი” გააგრძელებს მუშაობას, აღებულ ვალდებულებებს შეასრულებს. თუ არ გააგრძელებს, როგორც გვითხრეს, ამას ის კომპანია გააკეთებს, რომელიც მოვა _ ეს არის ახალი საავადმყოფოს აშენება. ჩვენ გვეშინოდა, რომ ახალი კომპანიის შემოსვლის შემთხვევაში, ჩოხატაურში დარჩებოდა მხოლოდ გადაუდებელი სასწრაფო დახმარება, თუმცა, მინისტრმა და გუბერნატორმა დაგვამშვიდეს და გვითხრეს, რომ ოზურგეთის და ლანჩხუთის მსგავსად, აქაც იქნება საავადმყოფო ყველა იმ სერვისით, როგორითაც დღეს არის, _ აღნიშნა კიკვაძემ.
მინისტრთან შეხვედრას ექიმი ვახტანგ გაჩეჩილაძეც ესწრებოდა. მისი თქმით, არც მინისტრი და არც გუბერნატორი სამუშაო ფორმაში არ იმყოფებოდნენ:
_ მინისტრის ჩამოსვლის შესახებ ინფორმაცია არსებობდა, თუმცა, ზუსტი თარიღი ცნობილი არ იყო, 19-ში ანდრია ურუშაძის ჩამოსვლას არავინ ელოდებოდა, ამიტომაც იყო, რომ დარბაზში ცოტანი ვიყავით. თემურ კოროშინაძემ ვისაც ხმა მიაწვდინა და ვინც ცუდ ამინდში მოსვლა შეძლო, ყველა მოვიდა. ამ შეხვედრის ინტერესი დიდი იყო. პირადად მე, არ ვარ საავადმყოფოს თანამშრომელი, მაგრამ როგორც ექიმს, მაინტერესებდა მინისტრის პოზიცია. ერთ რამეში ნამდვილად დავრწმუნდი _ ხელისუფლება ვერანაირ შემთხვევაში ვერ ჩაერევა კომპანიის შიდა საქმიანობაში _ ეს არის საშტატო განრიგები თუ სახელფასო დავალიანებები. მინისტრის განმარტებით, მას და ეკონომიკის სამინისტროს აქვთ ბერკეტი, რომ თუ კომპანია ვერ შეასრულებს იმ ნაკისრ ვალდებულებებს, რომელიც ძირითადად აისახება ინვესტიციებსა და ახალი საავადმყოფოს მშენებლობაზე, საჯარიმო სანქციების შემდეგ, შეუძლიათ გაწყვიტონ კონტრაქტი. მაგრამ მხოლოდ საარბიტრაჟო სასამართლოს მეშვეობით. ასე რომ, “ადითის” წასვლის მოლოდინი არ მართლდება, მიუხედავად იმისა, რომ მართლა გასაგდებია ეს კომპანია. აღსანიშნავია ისიც, რომ მინისტრი ჩოხატაურში ურეკიდან მოვიდა, სადაც დაგეგმილ შეხვედრაზე იმყოფებოდა. სავარაუდოდ, ქართული ტრადიციის მიხედვით, სადილის შემდგომ ჩამოვიდნენ ჩვენთან ის და გუბერნატორი, რომლებიც სამუშაო ფორმაში ნამდვილად არ იმყოფებოდნენ.
_ გინდათ თქვათ, რომ ნასვამები იყვნენ?
_ მე ქართული ტრადიციების მოყვარული ვარ _ სტუმარს პატივი უნდა სცე, მაგრამ სასურველი იქნებოდა, შეხვედრა მანამდე მომხდარიყო, _ დასძინა გაჩეჩილაძემ.
გურიის გუბერნატორის, ვალერი ჩიტაიშვილის თქმით, ამ საკითხზე კომენტარის გაკეთება სისულელეა:
_ სულ არ ვიცი, ვინ არის გაჩეჩილაძე. რა კომენტარი უნდა გავაკეთო, რა სისულელეა?! _ გვითხრა ჩიტაიშვილმა.
თუმცა, შეხვედრაზე მყოფმა ექიმებმა, ჩვენთან საუბრისას, იმ პირობით თუ მათ ვინაობას არ გავამხელდით, აღნიშნეს, რომ მინისტრიც და გუბერნატორიც ნასვამები იყვნენ.
ვიზიტის ბოლოს, ანდრია ურუშაძემ ჩოხატაურის ცენტრში, გუდავაძის მშენებარე კლინიკა მოინახულა. შენობით მინისტრი კმაყოფილი დარჩა, თუმცა, მცირე შენიშვნები გააკეთა და აღნიშნა, რომ საავადმყოფოს სტანდარტები ცოტა განსხვავებულია და მფლობელს შენობის გადაკეთება ურჩია. ურუშაძე არ დაინტერესებულა, აქვს თუ არა პრობლემები მამული გუდავაძეს, რომელიც კლინიკას საკუთარი სახსრებით აშენებს და რომელსაც ხელისუფლება არ ეხმარება.
