დღეს უშედეგოდ დასრულდა დაკარგული ივლიტა ჯიბუტის ძიება; მაშველების მონაწილეობით, მოქალაქეები, ოჯახის წევრებთან ერთად, მთელი დღის განმავლობაშ ასუფთავებდნენ ვაკე-საბურთალოს გადასასვლელთან, რესტორან “ბეღელის“ მოპირდაპირედ, მდინარე ვერეს შემავალ გვირაბს და მის თავზე დაგროვილ, მდინარის ნატანი მასის 7-8 მეტრიან კედელს.
რადგანაც მძიმე ტექნიკის შეყვანა შეუძლებელი იყო, მოქალაქეები ხელით წმენდდნენ ჩახერგილ ადგილს და 3 მეტრზე მეტი სიმაღლის მასის გატანა მოახერხეს.
როგორც მონაწილეები ამბობენ, საღამოსთვის მოხერხდა გზის ნაწილის გაჭრა და ხვალ დილიდან, უკვე ტექნიკის შეყვანაც გახდება შესაძლებელი.
თავის მხრივ, ივლიტა ჯიბუტის ოჯახის წევრები ცდილობენ შემთხვევის ადგილიდან, საიდანაც გოგონა მდინარემ გაიტაცა და სადაც სტიქიურ უბედურებამდე ივლიტას საცხოვრებელი სახლი იდგა, გვირაბამდე, საკუთარი ძალებით ეძებონ დაკარგული. თუმცა, ამ მონაკვეთზე ჩამოტანილი ძირეული ხეების, ნაშალის და შლამის ძალიან დიდი მასაა დაგროვილი. ამ ადგილების მუდმივი დათვალიერება წყლის დონის დაწევის შესაბამისად, პროფესიონალ მაშველებთან ერთად უნდა მოხდეს.
ივლიტას მამა – მამა გიორგი (ჯიბუტი) ამბობს, რომ ამ მონაკვეთზე ვიზუალური დათვალიერება უშედეგოა და ითხოვს, მრავალრიცხოვან მოხალისეებს, დახმარების მსურველ მოქალაქეებს პროფესიონალმა მაშველებმა გაუწიონ კოორდინირება.
სანამ ჯერ კიდევ არსებობს თუნდაც ძალიან მცირე იმედი, რომ გოგონა გამორიყული ხეების და კონსტრუქციების მასაშია მოქცეული და ჩვენი შველა ჭირდება, ყველა ოფიციალურ სტრუქტურას, საგანგებო სიტუაციათა მართვის სამსახურს, საგანგებო შტაბს დაუყოვნებლივ მართებთ გამოყონ დამატებითი პროფესიონალების, საჯარისო ნაწილის შემადგენლობა.
რედაქციას ძალიან ბევრი მოქალაქე უკავშირდება და ითხოვს ინფორმაციას, როგორ შეიძლება ჩაერთონ ივლიტა ჯიბუტის ძებნის ოპერაციაში. ივლიტას ბიძა – მამუკა ჯიბუტი “გურია ნიუსთან“ ამბობს, რომ ხვალ დილით ცხრა საათიდან, ვაკე-საბურთალოს გადასასვლელი გზის მონაკვეთზე, რესტორან “ბეღელის“ მოპირდაპირე მხარეს, შევიკრიბებით და ისევ გააგრძელებენ ძებნას.
გვიყვარხარ და გეძებთ, ივლიტა..
ივლიტა ჯიბუტის ახლობლები მაშველების დახმარებას ითხოვენ
"ძალიან გთხოვთ, ნუ ავრცელებთ არასწორ ინფორმაციას _ ივლიტა არ არის გარდაცვლილთა სიაში"
