სოციალურ ქსელში “სმარტის” და “ვენდის” თანამშრომელთა მიმართ ძალზე არასასიამოვნო ბრალდებები გაჟღერდა. საქმე ეხება თბილისში სტიქიურ უბედურებას, რომლის დროსაც სოციალური ქსელების მომხმარებელთა თქმით, “სმარტის” და “ვენდის” თანამშრომელებმა მომხმარებლები ქუჩაში თავსხმა წვიმაში გაყარეს და კარები ცხვირწინ მიუკეტეს.
"13 ივნისს ვიყავით მე და ჩემი მეგობარი “wendys”-ში, როდესაც საღამოს 9 საათისკენ დაიწყო წვიმა, ვიფიქრეთ გადაიღებდა და სახლში წავიდოდით.მაგრამ წვიმა უფრო ძლიერდებოდა სახლიდანაც დამირეკეს და მითხრეს ცოტახანს დაელოდე გადაიღებს და წამოდითო. მაგრამ გადაღების ნაცვლად, პირიქით წვიმა უფრო და უფრო ძლიერდებოდა. გარეთ გამოსვლა შეუძლებელი გახდა. ცოტახანში მოვიდა ჩვენთან ვენდისის თანამშრომელი და გვითხრა ვენდისი დაიკეტა და გავსულიყავით გარეთ, ჩვენს გარდა იქ სხვებიც იმყოფებოდნენ და ისინიც ჩვენთან ერთად გამოუშვეს გარეთ. იყო თავსხმა წვიმა, არ ვიცოდით რა გვექნება ბოლოს ვიფიქრეთ სმარტში შევიდოდით, რადგან ის 24 საათიანია, მაგრამ სმარტის შესასვლელთან იყო დაცვა, რომელმაც მითხრა სმარტი დაკეტილია და ვერ შემოგიშვებთო, მე ვთხოვე რომ უბრალოდ კარებთან მაინც დავეყენებინე იმ სიცივეში და თავსხმა წვიმაში არ ვყოფილიყავით, მაგრამ მაინც უარი გაანცხადეს და ცხვირწინ დამიკეტეს კარი. მემგონი ყველა ნორმალური პირიქით კარს გაგიღებს და თავშესაფარს შემოგთავაზებს ასეთ მომენტში. ასე ვიდექით გარეთ, გავიყინეთ ბოლოს ისე შევეხვეწეთ დაცვას რომ კართან შეგვიშვა.
საბედნიეროდ იმ ღამეს მე და ჩემმა მეგობარმა მოვაღწიეთ მშვიდობით სახლამდე, მაგრამ იმ ღამეს ბევრი უბედურება დატრიალდა, ჩვენც ბეწვზე გადავრჩით. ვუსამძიმრებ ყველა გარდაცვლილ ოჯახს და ბოლოს მინდა მივმართო ვენდისის და სმარტის წარმომადგენლებს, რომ ასე ნუ მოექცევიან ადამიანებს მსგავს რთულ მდგომარეობაში“ – წერს „ფეისბუქის“ მომხმარებელი ქეთი მუმლაძე.
უკმაყოფილო ადამიანების კრიტიკას სოციალური ქსელების სხვა მომხმარებლებიც შეურთდნენ, რომლებმაც „Wendy's Georgia“ არაადამიანურ ქმედებაში ღიად დაადანაშაულეს. კრიტიკის საპასუხოდ „ვისოლ ჯგუფმა“ „Wendy's Georgia“ -ს ოფიციალურ გვერდზე განცხადება გამოაქვეყნა, რომელსაც უცვლელად გთავაზობთ:
„უპირველეს ყოვლისა, „ვისოლ ჯგუფის“ სახელით კიდევ ერთხელ მწუხარებას გამოვთქვამთ მომხდარის გამო და ვუსამძიმრებთ დაღუპულთა ოჯახებს. ჩვენს მრავალ თანამემამულესთან ერთად ძალისხმევას არ ვიშურებთ, რომ მხარში დავუდგეთ და დავეხმაროთ სტიქიით დაზარალებულებს. რაც შეეხება გავრცელებულ ინფორმაციას იმასთან დაკავშირებით, რომ თითქოს რუსთაველის გამზირზე მდებარე “სმარტის” და “ვენდის” თანამშრომლებმა ”მომხმარებლებს კარი დაუკეტეს” მოკრძალებულად ვაცხადებთ: სტიქიის დროს, ძლიერი წვიმის შედეგად რუსთაველის გამზირზე არსებულ როგორც „სმარტში“ ასევე „ვენდისში“ მოხდა წყლის მასიური ჩამოდინება. აღნიშულის შედეგად ელექტროენერგიის სადენი კაბელების და ტრანსფორმატორის გავლით საფრთხე შეექმნა ადამიანების სიცოცხლეს. დაიტბორა „სმარტის“ მინუს სართულები, გაითიშა ელექტროენერგია და ჩაირთო სავაჭრო ობიექტზე დამონტაჟებული საგანგაშო სისტემები. სტუმრებისა და თანამშრომლების უსაფრთხოების მიზნით, „ვენდისა“ და „სმარტის“ „უსაფრთხოების შინაგანაწესის“ შესაბამისად, დაუყოვნებლად მოხდა სტუმრებისა და თანამშრომლების სრული ევაკუაცია. “სმარტისა” და “ვენდის” დაცვის თანამშრომლებმა ყველა ღონე იხმარეს, რომ თავიდან აეცილებინათ უბედური შემთხვევა. იმისათვის, რომ სრულად აღმოგვეფხვრა მიღებული ზიანი და უზრუნველგვეყო მომხმარებლების, სტუმრებისა და თანამშრომლების უსაფრთხოება „სმარტი“ ამის შემდგომ 
დაკეტილი იყო 2 (ორი) დღის განმავლობაში „ვენდი“ კი მხოლოდ 14 ივნისს შუადღეს გაიხსნა. მიღებული ზიანის შესახებ ჩვენ არ გაგვიცხადებია და არც ახლა ვაპირებთ ამაზე საუბარს. მადლობას ვუხდით „სმარტისა“ და „ვენდის“ ერთგულ მომხმარებელს, რომ გაგებით მოეკიდნენ საგანგებო მდგომარეობას. გვინდა ყველამ იცოდეს, რომ ჩვენ ყოველთვის ვიზრუნებთ და დავიცავთ ჩვენი მომხმარებლების, სტუმრებისა და თანამშრომლების უსაფრთხოებას. გმადლობთ! „- ნათქვამია „ვისოლ ჯგუფის“ განცხადებაში.
თუმცა ამ განცხადებამ უკმაყოფილო მომხმარებლები ვერ დააკმაყოფილა, რომელთა თქმითაც „Wendy's Georgia“ უბრალოდ თავის მართლებას უსირცხვილოდ ცდილობს. მათი განცხადებების თანახმად მომხდარი ფაქტისას „Wendy's Georgia“ -ში თავსხმა წვიმაში მხოლოდ მომხმარებლები გაყარეს.
