გურიის მხარეში სახელმწიფო რწმუნებულის-გუბერნატორის გია სალუქვაძის გადაწყვეტილებით, რეგიონის ყველა საკრებულოში, მერიასა და გამგეობაში სპეციალური შტაბები შეიქმნა, სადაც მსურველებს 2 დღის განმავლობაში თბილისში სტიქიის შედეგად დაზარალებულთათვის ჰუმანიტარული დახმარების მიტანა შეუძლოთ.
სამხარეო ადმინისტრაციის მიერ სტიქიის შედეგად დაზარალებულთათვის შექმნილ შტაბში მოქალაქეთა ნაკადი ამ დრომდე არ წყდება. ჰუმანიტარული დახმარება გუბერნიაში არაერთმა მოქალაქემ მოიტანა. გურიიდან შეგროვილი ტვირთი თბილისში ხვალ გაიგზავნება, რომელიც საყოფაცხოვრებო ნივთებით, ჰიგიენური საშუალებებით, ტანსაცმლით, არამალფუჭებადი საკვებით და წამლებით დატვირთული იქნება. აქციაში: მოქალაქეები, მოხალისეები, შშმ პირები, ადგილობრივი ხელისუფლების, სამხარეო ადმინისტრაციის თანამშრომლებმა, სხვადასხვა სტრუქტურისა და ორგანიზაციის წარმომადგენლები აქტიურად ჩაერთნენ.
რეგიონში შემავალი ყველა მუნიციპალიტეტში, სპეციალურად შექმნილი მობილური ჯგუფები საჭირო ნივთების შესყიდვასა და მოძიებას ოპერატიულად ახდენენ. სტიქიის შედეგად დაზარალებულთა დასახმარებლად, გურიის სამხარეო ადმინისტრაციაში ჰუმანიტარული დახმარების დღესაც გრძელდება. დახმარება: მოხალისეებმა, ქ.ოზურგეთის მუნიციპალიტეტის სამხედრო სამსახურის, რაგბის განვითარების კავშირის, ბაღების გაერთიანების, მუზეუმის, სხავადსხვა ანსამბლების, სურსათის ეროვნული სააგენტოს, კულტურის ცენტრის, თოჯინების თეატრის, მუსიკალური, სამხატვრო ასევე სასპორტო სკოლის, სპორტის განვითარების ცენტრისა და სურათების გალერეას წარმომადგენლებმა მოიტანეს. ასევე 21 ივნისს ანსამბლი "გურია" ოზურგეთის თეატრში კონცერტს მართავს.
კონცერტი საქველმოქმედო ხასიათის იქნება. შემოსული თანხა თბილისში მომხდარი სტიქიის შედეგად დაზარალებულების დასახმარებლად შექმნილ ფონდს გადაერიცხება. ოზურგეთის მუნიციპალიტეტის გამგეობისა და საკრებულოს ერთობლივი გადაწყვეტილებით ადგილობრივი თვითმმართველობის თანამდებობის პირები, საჯარო მოხელეები, საკრებულოს წევრები, ოზურგეთის ადმინისტრაციულ ერთეულებში გამგებლის წარმომადგენლები, მუნიციპალიტეტის მიერ დაფუძნებული იურიდიული პირები – თბილისში სტიქიით დაზარალებულ მოსახლეობას ფულადი შემოწირულობით დაეხმარება. ვინაიდან, სტიქიით დაზარალებულებს კვების პროდუქტებით, ტანსაცმლითა და ჰიგიენური საშუალებებით სხვადასხვა კერძო კომპანიები და რეგიონები აქტიურად ეხმარებიან, ოზურგეთის მუნიციპალიტეტის ხელმძღვანელობის ინიციატივით დაზარალებულებს დახმარება ფულადი სახით გაეწევა. სპეციალურად გახსნილ ანგარიშზე ოზურგეთის მუნიციპალიტეტის თანამშრომლების პირადი შემოწირულობით, დაახლოებით 10 000 ლარი გადაირიცხება.
ჩოხატაურის მუნიციპალიტეტის გამგეობამ, საკრებულომ და არასამთავრობო ორგანიზაცია "ზრდასრულთა განათლების ცენტრმა", თბილისში მომხდარი სტიქიის შედეგად დაზარალებულთათვის ჰუმანიტარული დახმარება (არამალფუჭებადი პროდუქტი, ტანსაცმელი, საყოფაცხოვრებო ნივთები) შეაგროვეს. ხვალიდან აღნიშნულ აქციაში ჩაებმება მუნიციპალიტეტის ა(ა)იპ-ები. ლანჩხუთის მუნიციპალიტეტის საკრებულო პირადი შემოწირულობით 1675 ლარს გადარიცხავს. ასევე დახმარებას ჩოხატაურისა და ლანჩხუთის მუნიციპალიტეტებიდან ველოდებით.
შემოსული ტვირთი ხვალ გაიგზავნება. 17, 24 ივნისს ქალაქ ოზურგეთის სახელმწიფო თეატრში 18 სთ -ზე სპექტაკლი "აურზაური არაფრის გამო" ეძღვნება თბილისში სტიქიის გამო დაღუპულთა ხსოვნას. სპექტაკლის ბილეთების რეალიზაციით შემოსული თანხა გადაირიცხება შესაბამის ფონდში.
ოზურგეთის დემოკრატიული ჩართულობის ცენტრში უკვე ორი დღეა ახალგაზრდები გაერთიანდნენ სტიქიით დაზარალებულთა დასახმარებლად. იდეის წარმატებით განხორციელებისთვის, მათ თქვენი დახმარების და თანადგომის იმედი აქვთ. 16 წლის ქრისტინა საბაშვილმა კი სტიქიისგან დაზარალებულთათვის ყელსაბამები დაამზადა და შემდეგ კი საქველმოქმედო აქცია გამართა. შემოსული თანხა 60 ლარი შეადგინა.
