ოზურგეთში, ფარნავაზ მეფის ქუჩაზე მცხოვრებ მარტოხელა მოხუცის, სეფე კუპატაძის შესახებ ჩვენი გაზეთი რამდენჯერმე წერდა. გასულ კვირას კი, საგაზეთო სტატიაში _ “დავალიანებასა და სიკვდილს შუა გამოკიდებული” აღნიშნული იყო, რომ კუპატაძეს, საკალანდოდ, “ენერგო-პრო ჯორჯიასგან” ქვითარი მიუვიდა, რომლის თანახმადაც, 282 ლარისა და 43 თეთრის დავალიანება, 20 იანვრამდე უნდა გადაეხადა.
კუპატაძე წარმოშობით იმერეთის ერთ-ერთი რაიონიდანაა, გურიაში ათეული წლების წინ ჩამოვიდა. გარკვეული დროის განმავლობაში ქირით ცხოვრობდა. შემდეგ ფარნავაზ მეფის ქუჩაზე მდებარე სახლში დროებით შეუშვეს, სადაც ორგანიზაცია “ოზურგეთის წყალკანალი” იყო განთავსებული. კუპატაძე და ეს ორგანიზაცია ერთი მრიცხველით სარგებლობდნენ. გასული წლის მაისში, “წყალკანალი” სხვაგან გადავიდა. სწორედ “წყალკანალის” დავალიანების გამო, აღნიშნულ სახლში შეწყდა გაზის მიწოდება. დალუქეს მილი, რის გამოც სეფე კუპატაძეც დაზარალდა. იმავე ორგანიზაციას ელექტროენერგიის დავალიანებაც გააჩნდა, თუმცა, “ენერგო პრო ჯორჯიას” ოზურგეთის სერვისცენტრის ხელმძღვანელი, გია ნაკაიძე “გურია ნიუსთან” ამბობს, რომ იმ ორგანიზაციამ საკუთარი დავალიანება დაფარა, ეს კი კუპატაძის დავალიანებაა გასული წლის 6 თვის განმავლობაში. თუმცა, კუპატაძეს ხელთ აქვს 2011 წელს მიღებული ქვითარი, სადაც მითითებულია დეკემბრის თვეში გახარჯული ელექტროენერგიის საფასური _ 46 ლარი და 38 თეთრი, რაც აბონენტს გადახდილი აქვს.
“სეფე კუპატაძე დღეის მდგომარეობით იმდენად დაუძლურებულია, უმწეოთა სასადილოშიც ვეღარ მიდის, რათა საკუთარი ულუფა მიიღოს. ქვედა კიდურები დაუსივდა, რის გამოც ყავარჯნით გადაადგილებაც უჭირს. მართალია, მას ოზურგეთის მუნიციპალიტეტის გამგეობამ გასულ წელს დახმარება გაუწია საშეშე მერქნით და შინ მიტანაშიც დაეხმარა, მაგრამ კუპატაძის მდგომარეობა მაინც გამოუვალია. მოხუცი ამბობს, რომ ელექტროქურის გარეშე მას არსებობა არ შეუძლია. მისივე თქმით, შეამოწმეს კიდეც, თუ რამდენს გახარჯავდა მისი ქურა 24 საათის განმავლობაში. ასეთი რაოდენობით მოხმარება წარმოუდგენელიაო, უთხრეს თურმე,” _ ნათქვამი იყო ჟურნალისტის, მარინე ჩიხლაძის სტატიაში.
ერთი სიტყვით, “ენერგო პრო ჯორჯიამ” მომხმარებლის არგუმენტები და მტკიცებულები, როგორც ყოველთვის, ახლაც არ გაითვალისწინა და 20 იანვარს, კუპატაძეს ელექტოენერგია გამოურთო.
ეს სტატია, რომელიც “გურია ნიუსის” ვებ-გვერდზეც განთავსდა, ოზურგეთელმა გია ცეცხლაძემ წაიკითხა და დაგვიკავშირდა. ცეცხლაძემ კუპატაძის ანგარიშის ნომერი მოითხოვა და მიღებისთანავე, დავალიანება სრულად დაფარა. გია ცეცხლაძე, რამდენიმე წლის წინ, გურიის სამხარეო ადმინისტრაციის თანამშრომელი იყო. დღეს თბილისში ცხოვრობს და მუშაობს. მან საკუთარ თავზე საუბარი არ ისურვა.
_ ეს იმისთვის არ გამიკეთებია რომ გაზეთში დაწერილიყო. ძალიან შემეცოდა ეს ადამიანი და იმიტომ გადავწყვიტე მისი დახმარება, _ გვითხრა ცეცხლაძემ.
ამ დახმარებით კმაყოფილებას ვერ ფარავს სეფე კუპატაძე, რომელსაც ელექტრო ენერგიის მიწოდება 21 დეკემბერს, თანხის გადახდისთანავე აღუდგინეს:
_ დიდი მადლობა თქვენ და იმ ადამიანს, რომელმაც ის თანხა გადაიხადა. როცა გავიგე, რომ უცხო კაცმა ჩემი დენის ფული გადაიხადა და სიკვდილს ამარიდა, ტირილი დავიწყე… ძალიან დიდი მადლობა! სიცოცხლეს მიხანგრძლივებს, შეგრძნება, რომ ასეთი ადამიანები ჯერ კიდევ არსებობენ, _ გვითხრა ბატონმა სეფემ.
