ოზურგეთის მუნიციპალიტეტში ძალიან ბევრი გაჭირვებული მარტოხელა პენსიონერი ცხოვრობს და ისინი ოზურგეთის მუნიციპალიტეტის გამგეობას დახმარებისთვისაც ხშირად მიმართავენ, თუმცა ხშირად უკან უარით გამოსტუმრებული ბრუნდებიან. არ გვაქვს შეშა და რა ვქნათო, _ ეუბნებიან. ერთ-ერთი ასეთი მარტოხელა პენსიონერი სოფელ დვაბზუში მცხოვრები ნადია ვასაძეა. როგორც თავად ამბობს, სამი წელია, ზედიზედ მიმართავს ოზურგეთის მუნიციპალიტეტის გამგეობას დახმარებისთვის, თუმცა _ ამაოდ.
ოზურგეთის მუნიციპალიტეტის სოფელ დვაბზუში გზად მომავალი ყავარჯნით ხელში, მაშინ შეგხვდა, როცა სოფლის რწმუნებულისგან ბრუნდებოდა. მან თავისი გასაჭირის შესახებ “გურია ნიუსს” უამბო.
_ ნახეთ, ბებო, გზა არაა და კვალი, ამ ამინდში ძლივს დავდივარ. მარტო ვცხოვრობ, პენსიონერი ვარ. ახლა ვიყავი ჩემი სოფლის რწმუნებულთან დახმარებისთვის, ვთხოვე, შეშით დამეხმარეთ-მეთქი, მაგრამ შენც არ მომიკვდე, დაგპირდებიან და არაფერი. გუშინ ვიყავი ოზურგეთის მუნიციპალიტეტის გამგებელთან, ილია ვაშაყმაძესთან, რომელმაც მიმიღო და მითხრა, შენი სოფლის რწმუნებულს მიმართეო, შენი განცხადებები მას გადაეცემაო. ახლა ვიყავი ჩემი სოფლის რწმუნებულთან და მითხრა, ეს განცხადებები გამგებელმა უნდა წაიღოსო… მე სად შემიძლია აქეთ-იქით სიარული, მატყუებენ, კონკრეტულ პასუხს ვერ მაძლევენ, სამი წლის განმავლობაში ვწერ განცხადებებს. როგორ გამაქვს თავი, არ ვიცი. პენსია როგორ გადავანაწილო? გაჭირვებით ვარ, ეზოში გავანადგურე ყველაფერი, რაც მქონდა. გამაკეთებინეს რაღაც ქაღალდები ამ ინვალიდ ქალს. უჭმელ-უსმელი ვარ, თვალის პრობლემაც მაქვს, “კატარაქტა” მაწუხებს, ასე რატომ აწვალებენ ხალხს, ჩემნაირ მოხუცებს არ უნდა დაეხმარონ? 78 წლის ვარ. 17 წელია, რაც შვილი გარდამეცვალა. წინა გამგებელი, მიშიკო ხუჭუა, სხვათა შორის, მეხმარებოდა, ახლა მეზობლების იმედად ვარ. თქვენ ჩემსავით გაჭირვებულს ვერსად ნახავთ, _ გვითხრა ქალბატონმა ნადიამ.
ოზურგეთს მუნიციპალიტეტის გამგეობაში ამ საკითხთან დაკავშირებით ასეთ კომენტარს აკეთებენ:
_ ეს ქალბატონი ნამდვილად იყო ოზურგეთის მუნიციპალიტეტის გამგებელთან, ილია ვაშაყმაძესთან მიღებაზე. თუმცა, მას განცხადება წელს დაწერილი არ აქვს. ბატონმა ილიამ, ის თავისი სოფლის რწმუნებულთან გაუშვა, რათა მოეწესრიგებინა დახმარების მიღებისთვის საჭირო საბუთები; ესაა, სოფლის რწმუნებულის შუამდგომლობა, რომ ის ნამდვილად საჭიროებს დახმარებას, ამონაწერი სოციალური სააგენტოდან, პირადობის მოწმობის ასლი და და ანგარიში ვითიბი ბანკიდან. ამ ქალბატონს არ ჰქონდა შესაბამისი საბუთები. თუმცა, 2011 წელს, მას ოზურგეთის მუნიციპალიტეტის გამგეობა 100 ლარით დაეხმარა.
ოზურგეთის მუნიციპალიტეტის სოფელ დვაბზუს რწმუნებული ვაჟა მახარაძე “გურია ნიუსთან” საუბარში ადასტურებს ინფორმაციას, იმის შესახებ, რომ ნადია ვასაძეს ნამდვილად უჭირს, თუმცა მისთვის განცხადებით ჯერ არ მიუმართავს:
_ კი, ბატონო, ეს ქალბატონი ნამდვილად იყო ჩემთან დახმარების სათხოვნელად, მას გათბობისთვის შეშა ესაჭიროება. მე ერთი რამ შემიძლია, დავეხმარო საჭირო საბუთების შეგროვებაში, მივცე შუამდგომლობა, დანარჩენი კი ოზურგეთის მუნიციპალიტეტის გამგეობამ უნდა გადაწყვიტოს.
_ ანუ კონკრეტულ პასუხს მაინც ვერ ამბობთ, დაეხმარებით თუ არა ამ ქალბატონს?
_ მე რომ გითხრათ, სოფელში მაქვს შეშა მოსაჭრელი, მოვჭრი და დავეხმარები-მეთქი, ამის საშუალება ნამდვილად არ არის, ეს გამგეობამ უნდა უზრუნველყოს, _ გვითხრა მახარაძემ.
