საქართველოს ადვოკატთა ასოციაციის თავმჯდომარე ზაზა ხატიაშვილი თბილისის საქალაქო სასამართლოს მოსამართლეებს ლელა ცანავას და გიორგი მიქაუტაძეს კორუფციულ გარიგებაში ადანაშაულებს.
როგორც ხატიაშვილი აცხადებს, მოსამართლეების ლელა ცანავას და გიორგი მიქაუტაძის მხრიდან სავარაუდოდ ჩადენილი კორუფცია, სამსახურებრივი სიყალბე, სამსახურებრივი უფლებამოსილების ბოროტად გამოყენება, რაც მისივე თქმით, შემდეგი მტკიცებულებებით დასტურდება:
„ვალერი გრიგალაშვილმა საქართველოს ადვოკატთა ასოციაციას გაწევრიანების მოთხოვნით მიმართა. საქართველოს ადვოკატთა ასოციაციის" აღმასრულებელი საბჭოს 2015 წლის 24 მარტის გადაწყვეტილებით ვალერი გრიგალაშვილს უარი ეთქვა ადვოკატთა ასოციაციაში გაწევრიანებაზე და ეცნობა აღნიშნულის თაობაზე 2015 წლის 3 აპრილის წერილით.
ვალერი გრიგალაშვილმა საჩივრით მიმართა თბილისის სააქალაქო სასამართლოს და მოითხოვა ადვოკატთა ასოციაციის თავმჯდომარის 2015 წლის 3 აპრილის წერილის (გადაწყვეტილების) ბათილად ცნობა. მოსამართლე ლელა ცანავამ 2015 წლის 29 მაისის, გამოიტანა გადაწყვეტილება საქართველოს სახელით და გამოაცხადა, რომ ბათილად იქნას ცნობილი 2015 წლის 3 აპრილის გადაწყვეტილება .
როდესაც ადვოკატთა ასოციაციამ მივიღეთ მოსამართლე ცანავას გადაწყვეტილება აღმოჩნდა, რომ სასამართლოს გადაწყვეტილება იყო გაყალბებული; კერძოდ, 2015 წლის 29 მაისის თბილისის საქალაქო სასამართლოს ადმინისტრაციულ საქმეთა კოლეგიის მოსამართლის ლელა ცანავას გადაწყვეტილებაში მითითებული იყო არა ის, რაც გამოაცხადა მოსამართლემ სხდომის დამთავრების შემდეგ, არამედ ის, რაც მხარეს არ მოუთხოვია და რაზეც სასამართლოს არ უმსჯელია.
კერძოდ, გადაწყვეტილებაში მითითებულია, რომ მოსამართლემ ბათილად ცნო „საქართველოს ადვოკატთა ასოციაციის" აღმასრულებელი საბჭოს 2015 წლის 24 მარტის გადაწყვეტილება ვალერი გრიგალაშვილს ადვოკატთა ასოციაციაში გაწევრიანებაზე უარის თქმის ნაწილში, რაზედაც როგორც აღვნიშნეთ არ ყოფილა საერთოდ საუბარი სასამართლოს მიმდინარეობის დროს“, _ აღნიშნავს ხატიაშვილი.
ხატიაშვილი ასევე დასძენს, რომ მოსამართლე ლელა ცანავას მხრიდან სავარაუდოდ სამსახურებრივი სიყალბისა და თანამდებობის ბოროტად გამოყენების ფაქტი სხვა შემთხვევაშიც დასტურდება, კერძოდ კი, მას მანანა მოსულიშვილის საქმე მოჰყავს, რომელიც გრიგალაშვილის მსგავსად ადვოკატთა ასოციაციაში გაწევრიანებას ითხოვდა.
ხატიაშვილის მტკიცებით, მოსამართლე ცანავას მხრიდან ამ შემთხვევაშიც გაყალბებული იყო სასამართლოს გადაწყვეტილება.
რაც შეეხება მოსამართლე გიორგი მიქაუატაძეს, როგორც ზაზა ხატიაშვილი აცხადებს, მისი მხრიდანაც სავარაუდოდ, ასევე ჩადენილია სისხლის სამართლის კოდექსით გათვალისწინებული დანაშაულები, კერძოდ, სამსახურებრივი უფლებამოსილების ბოროტად გამოყენება და სამსახურებრივი სიყალბე.
ამ შემთხვევაში ხატიაშვილს მაგალითად მოჰყავს რობერტ გრიგალშვილის განცხადება, რომელიც ზემოთ აღნიშნული შემთხვევების მსგავსად საქართველოს ადვოკატთა ასოციაციაში გაწევრიანებას ითხოვდა.
ხატიაშვილის მტკიცებით, მოსამართლე მიქაუტაძემაც სამსახურებრივი სიყალბე ჩაიდინა.
„საქართველოს ადვოკატთა ასოციაციამ გამოითხოვა ქ.თბილისის საქალაქო სასამართლოდან სასამართლო სხდომის ვიდეოჩანაწერები, რომელიც ადასტურებს მოსამართლეების მხრიდან, სავარაუდოდ, სისხლის სამართლის დანაშაულის ჩადენის ფაქტებს. გამოთხოვილი ვიდეო მტკიცებულებებით დასტურდება, რომ მოსამართლეები ცანავა და მიქაუტაძე აცხადებენ არა იმ გადაწყვეტილებას, რომელიც სასამართლოს გადაწყვეტილებაში მიუთითეს, არამედ სულ სხვა გადაწყვეტილებას“, _ აღნიშნავს ხატიაშვილი.
მისივე თქმით, სასამართლომ დიდი ხანია კრახი განიცადა და სისტემაში მდგომარეობა დღითიდღე უარესდება.
„მაგრამ ვინაიდან სასამართლოებმა დაიწყეს ხელისუფლებისთვის სასიამოვნო გადაწყვეტილებების გამოტანა ხელისუფლება დუმს, რაც არის დანაშაულის ტოლფასი.
მოსამართლეები სანამ დაინიშნებიან მოსამართლეებად გადიან სწავლების კურსს, ამიტომ მათ კარგად იციან რომ სასამართლო გადაწყვეტილების თვითნებურად შეცვლა არის სისხლის სამართალი დანაშაული, დასადგენია ისეთი რა დონის ზეწოლა განხორციელდა მოსამართლეებზე, რომ მათ მიიღეს და შეცვალეს სასამართლო გადაწყვეტილება. თუ მოსამართლეებმა თავისით შეცვალეს გადაწყვეტილება , მაშინ მოსამართლეთა სასწავლო პროგრამა არის გადასახედი ვინაიდან თუ მოსამართლეებს არ ასწავლიან რომ მათ არ შეცვალონ მიღებული გადაწყვეტილება გამოცხადების შემდეგ, ეს უფრო დიდი პრობლემაა“, _ ამბობს ხატიაშვილი და დასძენს, რომ თუ საქართველოს პროკურატურის მხრიდან არ მოხდება მოსამართლეების ცანავას და მიქაუტაძის მიმართ სისხლის სამართლებრივი დევნის დაწყება 48 საათში, მაშინ ადვოკატთა ასოციაცია ჩათვლის, რომ მოსამართლეები გარიგებულები იყვნენ ხელისუფლებასთან და ხელისუფლების მაღალი თანამდებობის პირები იყვნენ დაინტერესებულები მოსამართლეების მხრიდან მიღებული გადაწყვეტილების გაყალბებით.
