“მედალფამ“ სტიქიით დაზარალებულებს დახმარება გაუგზავნა

თბილისში, 13 ივნისის სტიქიისას დაზარალებული მოსახლეობისთვის შპს "მედალფას" ოზურგეთის სამედიცინო ცენტრის ხელმძღვანელობამ და ცენტრში მომუშავე მედპერსონალმა დახმარება გამოგზავნა.

ცენტრის თანამშრომლებმა დაზარალებულებს საკვები პროდუქრები, პირველადი მოხმარების ნივთები და ტანსაცმელი "გურია ნიუსის" საქველმოქმედო აქციის ფარგლებში გამოუგზავნეს.

ტვირთი ვაკის რაიონის გამგეობას "გურია ნიუსის" თბილისის ოფისის წარმომადგენლებმა ჩააბარეს.

როგორც "გურია ნიუსთან" საუბრისას გამგეობის წარმომადგენელმა აღნიშნა, ამ ეტაპისთვის დაზარალებულების დასახმარებლად პროდუქტებითა და საჭირო ნივთებით სამი საწყობია სავსე.

დაზარალებულები პერიოდულად, კოორდინატორების საშუალებით უკავშირდებიან გამგეობას და მათთვის საჭირო ნივთებს ადგილზე აწვდიან.

"ამ დროისთვის მხოლოდ ვაკის რაიონის გამგეობაში 110 ოჯახია აღრიცხვაზე. ყველა ოჯახს ჰყავს თავისი კოორდინატორი, რომელთა საშუალებითაც გვიკავშირდებიან. ამ ეტაპზე არცერთი ისეთი პროდუქტის საჭიროება არ გვაქვს, რაც საწყობებში არ არის. თავიდან მედიკამენტების ნაკლებობა იყო, თუმცა ეს პრობლემაც უკვე მოგვარებულია", _ უთხრა "გურია ნიუსს" გამგეობის წარმომადგენელმა თამუნა ივანიშვილმა.

შეგახსნებთ, რომ "გურია ნიუსმა" სტიქიით დაზარალებული მოსახლეობის დასახმარებლად,  აქცია დაიწყო.  

თუ ვინმეს გაქვთ სურვილი და შესაძლებლობა  დაზარალებულებს ტანსაცმლით, საკვებით, ფულადი თანხით დაეხმაროთ,  გამოგვეხმაურეთ.

"გურია ნიუსის" თბილისის, ოზურგეთის, ჩოხატაურის და ლანჩხუთის ოფისები 24 საათის განმავლობაში, საგანგებო რეჟიმში მუშაობენ.

მსურველები დაგვიკავშირდით ტელეფონის ნომრებზე: 599 37 53 73; 551 37 36 36; 599 93 18 13; 571 90 39 91; 599 40 41 82; 571903979;  571 90 39 91; 571 90 39 89; 577 72 58 54.

ან მობრძანდით "გურია ნიუსის" რედაქციის ოფისებში: ჩოხატაური _ დუმბაძის 25; ოზურგეთი _  ჭავჭავაძის გამზირი #4, III სადარბაზო, I სართული, ბინა #32; ლანჩხუთი _ ნოე ჟორდანიას ქუჩა #114/3; თბილისი _ ვაჟა-ფშაველას 78ა, III სადარბაზო, ბინა 8.

აღსანიშნავია ისიც, რომ დაზარალებული მოქალაქეების მხარდასაჭერად თბილისის მერიამ ახალი ვებ გვერდი  შექმნა.

როგორც ვებ-გვერდის პრეზენტაციაზე თბილისის ვიცე-მერმა დიმიტრი ქუმსიშვილმა აღნიშნა, გვერდზე განთავსებულია დეტალური ინფორმაცია სტიქიით დაზარალებულთა საჭიროებების შესახებ.

მსურველებს შეუძლიათ დაზარალებულებს  დახმარება საჭიროებების მიხედვით გაუწიონ, ასევე მოცემულია ინფორმაცია სტიქიის ზონაში სპეცტექნიკის საჭიროების შესახებ.

ამასთან, მოქალაქეს თავად შეუძლია შეავსოს შესაბამისი ველი და საკუთარი სურვილის მიხედვით დაეხმაროს დაზარალებულებს.

მსურველებს დაზარალებულთათვის დახმარების გაწევა ონლაინ რეჟიმში შეეძლებათ. ვებ-გვერდზე ასევე განთავსდება განახლებადი ინფორმაცია სტიქიის ზონაში მიმდინარე პროცესებისა და გაწეული სამუშაოს შესახებ. მოქალაქეების მიერ განხორციელებული აქტივობა ვებ-გვერდზე მომენტალურად აისახება და ოპერატორები ქველმოქმედს ოპერატიულ რეჟიმში დაუკავშირდებიან.