მიმდინარე წლის მაისში გურიაში ჩამოსულ პრემიერს „გურია ნიუსმა“ იმ პრობლემების ჩამონათვალი მიაწოდა, რომელიც რეგიონის მუნიციპალიტეტებს აწუხებთ და რომლის მოგვარება სასიცოცხლოდ მნიშნელოვანია.
ჩვენთან ექსკლუზიურ ინტერვიუში ირაკლი ღარიბაშვილმა პირობა დადო, რომ მთავრობისგან „მაქსიმალური ხელშეწყობა“ იქნებოდა.
კითხვაზე ფლობდა თუ არა ინფორმაციას გურიის მუნიციპალიტეტებში არსებული პრობლემების შესახებ? მაგალითად, იმას, რომ ჩოხატაურს, წლებია, ნაგვის მანქანის არ აქვს და დიდი ხანია ადგილობრივი ხელისუფლება მთავრობას დახმარებას სთხოვს; სახანძრო მანქანები, რომელთა არქონის გამო, ბოლო თვეების განმავლობაში 5 სახლი დაიწვა გვიპასუხა:
„ჩემი დავალებით ჩვენ დავამუშავეთ პროექტი და მთელი საქართველოს მასშტაბით წელსვე დავიწყებთ ნაგვის ბუნკერების, ნაგვის და სახანძრო მანქანების შესყიდვას. ლიზინგით ავიღებთ ამ მანქანებს და ყველა რეგიონს მოვამარაგებთ. წელს დაიწყება ეტაპობრივად რეგიონის მომარაგება.“
გურია ნიუსი დაინტერესდა როგორ სრულდება პრემიერის პირობა. როგორც ჩოხატაურის მუნიციპალიტეტის გამგეობაში გვითხრეს ნაგვის და სახანძრო მანქანების გადმოცემასთან დაკავშირებით ჯერჯერობით არაფერი ისმის.
დეტალების გასარკვევად პრემიერის პრესსამსახურს დავუკავშირდით. როგორც უწყებაში გვითხრეს, „25 ივნისს რეგიონული განვითარების და ინფრასტრუქტურის სამინისტროს მყარი ნარჩენების კომპანია გურიის რეგიონს გადასცემს 5 ნაგვის მანქანას. რაც შეეხება სახანძროს, წლის ბოლომდე ჩოხატაურისთვის ეს პრობლემაც მოგვარდება. შინაგან საქმეთა სამინისტროს საზოგადოებასთან ურთიერთობის დეპარტამენტის ინფორმაციით, მიდის მზადება საერთაშორისო ტენდერის გამოსაცხადებლად და ტენდერის საფუძველზე შესყიდული სახანძრო მანქანები წლის ბოლომდე უკვე გადანაწილდება რეგიონების მიხედვით”.
ამ პასუხით მხოლოდ ის გაირკვა, რომ იქნება. თუმცა, როდის და გადასცემენ თუ არა კონკრეტულად ჩოხატაურს ნაგვის და სახანძრო მანქანებს უცნობია.
პრემიერს ბახმაროს სტატუსის არარსებობაზე და ამ უნიკალური კურორტის პრობლემებზეც ვესაუბრეთ. ღარიბაშვილმა ამ თემით დაინტერესების პირობაც დადო.
პრემიერის პრესსამსახურის მიერ მოწოდებული ინფორმაციით „გურიის გუბერნიის მიერ მოწოდებული ინფორმაციით, ბახმაროში წელს იგეგმება წყლისა და გზის სარეაბილიტაციო სამუშაოები”
ამ დრომდე გაურკვეველი რჩება კურორტის სტატუსი. არადა, ადგილობრივ ხელისუფლებას მთავრობასთან დიდი ხანია შესაბამისი პროექტი აქვს გაგზავნილი.
როგორც პრემიერმა გვითხრა ბახმაროს თემაზე მუშაობდნენ:
„ბახმაროზე ვმუშაობთ, ვმუშაობთ ასევე სხვადასხვა პროექტების განვითარებაზე და გურიის რეგიონის განვითარება არის ჩემი მთავარი პრიორიტეტი, რადგან გურია უნიკალური მხარეა“ _ განმარტა პრემიერმა მაისში, თუმცა, როგორც ზემოთ აღნიშნეთ ეს საკითხი ამ დრომდე გაურკვეველია.
უნდა ითქვას ისიც, რომ ბახმაროში დღემდე პრობლემად რჩება საკუთრების დაკანონება. იუსტიციის მინისტრის თეა წულუკიანის თქმით, მთავრობა ამ საკითხზე აქტიურად მუშაობს, თუმცა, ამ „აქტიურობას“ შედეგი ჯერ არ მოუტანია.
_ ჩაის განვითარება ამ მხარეში აუცილებლად მოხდება; გურიაში, ასევე, განვითარდება მოცვის წარმოება. ეს არის ძალიან რენტაბელური ბიზნესი, _ გვითხრა ღარიბაშვილმა.
"გურია ნიუსმა“ ეს საკითხიც მოიკითხა.
“საქართველოში მეჩაიეობის რეაბილიტაციის პროექტზე მუშაობა დასკვნით ფაზაშია. სოფლის მეურნეობის სამინისტროთვის ბოლოს წარადგენს პროგრამას, რომელიც შემუშავებულია დარგის სპეციალისტების, ექსპერტებისა და საერთაშორისო დონორი ორგანიზაციების ჩართულობით – სოფლის მეურნეობის სამინისტროსთან ერთად.
პროგრამა ითვალისწინებს 10 ათას ჰა-მდე ჩაის კულტურის რეაბილიტაციასა და ახალი ჯიშების დანერგვას სამეგრელოს, გურიის, აჭარისა და იმერეთის რეგიონებში, _ გაგნვიმარტეს მთავრობის მეთაურის პრესსამსახურში.
როგორც ირაკლი ღარიბაშვილის პრესსამსახურიდან მიღებული ინფორმაციით ირკვევა, მიმდინარეობს გურიის კიდევ ერთი კურორტის _ გომისმთის განვითარებაზე მუშაობა.
„ენერგეტიკის სამინისტროს ენერგეტიკული დეპარტამენტი მუშაობს გომის მთის ელექტროგაყვანილობის პროექტის შესწავლაზე და უახლოს მომავალში დაიდება ხარჯახრიცხვა. მთავრობის თანხმობის შემთხვევაში, პროექტი სავარაუდოდ გათვალისწინებული იქნება მომავალი წლის ბიუჯეტში.
წელს პირველად, მუნიციპალიტეტი სასმელი წყლის სისტემას მოაწყობს. ინფრასტრუქტურის სამინისტროსთან დაწყებულია მუშაობა სხვადასხვა პროექტზე. კვალიფიციური ექსპერტები წელს გომის მთაზე თოვლის საფარს შეისწავლიან.
2013 წელს, ოზურგეთის მუნიციპალიტეტის გამგეობამ, კურორტამდე მისასვლელი გზის 19 კილომეტრიანი მონაკვეთის აღდგენითი სამუშაოები განახორციელა. მოეწყო გზის სამაგრი გაბიონები, ახალი მილხიდები, გზის დამცავი ჯებირები და სანიაღვრე არხები.
2014 წლის აგვისტოში, აშენდა აგარაკებიდან კრატერული წარმოშობის ჭინჭაოს ტბამდე მისასვლელი 11 კილომეტრიანი საგზაო მონაკვეთი.
გზა გაყვანილი იქნა ასევე, სამემთაბარეო ფერმებამდე, ე.წ. “ლორისკარავზე”, რაც მომთაბარე ფერმერებს დამსვენებლებისათვის სასოფლო სამეურნეო ნატურალური პროდუქტების მიწოდებას გაუადვილებს“ _ მოგვწერეს პრესსამსახურიდან, სადაც განმარტეს, რომ აღნიშნული ინფორმაცია ადგილობრივმა ხელისუფლებამ მიაწოდა.
