ხალხური სამკურნალო საშუალებები პოპულარობას არ კარგავს.ამჯერად გთავაზობთ რამდენიმე საჭირო რეცეპტს.
დამწვრობის მალამო მოვამზადოთ ასე: ორთქლზე დადგმულ გაცხელებულ ზეითუნის ზეთში ჩავაგდოთ ფუტკრის ცვილი. როცა წამოდუღდება, გადმოვდგათ. შერევა უნდა მოვახდინოთ თვალის ზომით ისე, რომ გაგრილებული მასა გასქელდეს და მალამოს სახე მიიღოს. შესანიშნავია დამწვრობის მოსარჩენად, რა თქმა უნდა, ძირითადად პირველადი დამწვრობისას.
გვირილის ნაყენი _ ზაფხულში განსაკუთრებით ბევრი შრომა გვიწევს და ძალიან კარგია საღამოობით გვირილის ნაყენით ფეხის აბაზანის გაკეთება. გვირილა ჩვენში უხვად მოიპოვება და მისი ყიდვა რომ არ დაგვჭირდეს, ზაფხულში მოვკრიფოთ და ჩრდილში გავახმოთ. ხუთი კოვზი გვირილის დაფშვნილი ყვავილი ჩავყაროთ ორ ლიტრ მდუღარე წყალში. როცა გაგრილდება, დავამატოთ თბილი წყალი და 20 წუთის განმავლობაში ფეხები ჩავაწყოთ. ასე გავიმეოროთ ყოველი დაღლილობისას. სიმძიმის უსიამო შეგრძნება აუცილებლად მოგეხსნებათ.
კაკლის წენგოს მრავალი სიკეთე ახასიათებს _ ზაფხულში უხვად მოიპოვება უმწიფარი კაკალი. ქალბატონებს ვთავაზობ წენგოს მეშვეობით თმის შეღებვის მეთოდს სასიამოვნო წაბლისფერად _ ავიღოთ წენგო და წვრილად დავჭრათ. ასე 4-5 სუფრის კოვზი ჩავყაროთ ერთ ლიტრ წყალში და ვადუღოთ15 წუთის განმავლობაში. გადმოვდგათ და როცა გაგრილდება ისე, რომ თავის ქალის კანი არ დაგვწვას, დავიდოთ თმებზე და დავიხუროთ ცელოფნის ქუდი. 20 წუთის შემდეგ მოვიხსნათ, დავიბანოთ. სასურველია, შევიზილოთ ბალზამი. თმა სასიამოვნო წაბლისფერი და ბზინვარე გახდება. ყოველივე ეს აუცილებლად ხელთათმანით გავაკეთოთ.
კუჭის აშლილობის და ათეროსკლეროზის საწინააღმდეგოდ ძალიან კარგია ივნის-ივლისში მოკრეფილი კაკლის ფოთლის ნახარში _ ქართული ნიგოზის 15 ფოთოლი მოვხარშოთ ერთ ლიტრ წყალში 20 წუთის განმავლობაში. დავდგათ გრილ ადგილზე. დავლიოთ დღეში ორჯერ, თითო ჩაის ჭიქა.
კაკლის ფოთოლი "ნაფტალინი" _ ახლა ზაფხულია და ჩვენს გარდერობში ვიდრე ზამთრის ქურქს თუ შალეულის ჯემპრებსა და სხვა სამოსს შევინახავდეთ, პალტოების თუ სვიტერების შუაში დავალაგოთ კაკლის ფოთლები, დავკეცოთ და ისე შევინახოთ. პალტოების ჯიბეებსა და სარჩულშიც შესაძლოა მოხერხებულად მოვათავსოთ კაკლის ფოთლები. მერწმუნეთ, ნაფტალინს ტოლს არ უდებს.
ყავა დარიჩინით _ მწიკვი დარიჩინი ჩავაგდოთ სასურველი სახეობის დასალევად მომზადებული ყავის სითხეში. ძალიან არომატულ, სულ სხვა ყავას დალევთ.
