კარატისტთა ღია პირველობაზე, რომელსაც ქალაქმა ბორჯომმა უმასპინძლა, ლანჩხუთის სპორტული ცენტრის კარატისტთა გუნდმა შვიდი ოქროს, სამი ვერცხლისა და ორიც ბრინჯაოს მედალი აიღო.
პირველობის ჩემპიონები და შესაბამისად ოქროს მედლის პრიზიორები ლანჩხუთელთაგან გახდნენ: ზურა ბერიძე, ლუკა ლომაძე, ზურა ლომაძე, თიკა ლომაძე, ბათა დუმბაძე, ონისე ცინცაძე და გიორგი ჩხაიძე
ვერცხლის მედლები მოიპოვეს ანრი ჩხარტიშვილმა, აკაკი პატარაიამ და გიორგი საჯაიამ, ხოლო ბრინჯაო მიითვალეს საკუთარ მონაგარში მერაბ ლომაძემ და გიორგი ზენაიშვილმა.
უნდა ითქვას, რომ ლანჩხუთის სპორტულ ცენტრთან არსებულ კარატისტთა გუნდს საკმაოდ მაღალკვალიფიციური მწვრთნელები ყავს ლაშა ბერიძისა და ევროპის ორგზის ჩემპიონის, შავი ქამრის მფლობელის, საქართველოს კარატეს ეროვნული ფედერაციის ლიცენზირებული ინსტრუქტორის ნათია თურქიას სახით.
ლანჩხუთელ კარატისტთა არაერთი წარმატებითა და მიღწევით კმაყოფილია გურიის რეგიონის კარატე დო-ს ფედერაციის პრეზიდენტი მერაბ თურქია, რომელიც იმედს გამოთქვამს, რომ თავის შეგირდებთან ერთად კვლავაც არაერთხელ დაიპყრობს წარმატების მაღალ მწვერვალებს.
"მთლიანობაში ამდენი მედალი, რაც ლანჩხუთელ კარატისტთა გუნდს აქვს მოპოვებული, იშვიათობაა, რაც ალბათ, იმის შედეგიცაა, რომ ბავშვების მიმართ განსაკუთრებით მომთხოვნი ვარ.
კარატე ვაჟკაცური სპორტია და წარმატების მისაღწევად ნიჭი, ნებისყოფა და დაბრკოლების გადალახვის უნარია საჭირო. იგი ლანჩხუთში ერთ-ერთ წარმატებულ და დომინანტ სპორტის სახეობად ითვლება, მსოფლიოშიც ერთ-ერთ გამორჩეული სპორტის სახეობაა და მას სამომავლოდ ძალიან დიდი პერსპექტივა აქვს. იმედია, კარატე მალე ოლიმპიური სახეობაც გახდება და ლანჩხუთელებიც თავიანთ ღირსეულ სიტყვას იტყვიან აქ,- ამბობს მერაბ თურქია.
