გურიის სამივე მუნიციპალიტეტში სოფლის მეურნეობის განვითარების სამსახური იქმნება. აღნიშნული ინფორმაცია “გურია ნიუსს” გურიის სამხარეო ადმინისტრაციაში დაუდასტურეს. ადმინისტრაციის ინფორმაციით, ახალი სამსახურები უახლოეს დღეებში შეიქმნება. თუმცა, ჯერჯერობით, გაურკვეველია მათი სტრუქტურა და საშტატო განრიგი. აღსანიშნავია, რომ ოზურგეთის, ლანჩხუთის და ჩოხატაურის მუნიციპალიტეტების 2012 წლის ბიუჯეტებში სოფლის მეურნეობის განვითარებისთვის ფინანსები გამოყოფილი არ არის. თუმცა, ამ მიმართულებით მუნიციპალიტეტში გამგებლის მოადგილეები გასულ წელს დაინიშნენ, აგრეთვე, შექმნილია ა(ა)იპ სოფლის მეურნეობის ცენტრები, რომლებიც, ჯერჯერობით, მხოლოდ დასაქმების ფუნქციას ასრულებს.
“გურია ნიუსმა” სამივე მუნიციპალიტეტის გამგეობის პრესსამსახურის ხელმძღვანელებს იდენტური კითხვები დაუგზავნა: როდის იქმნება ოზურგეთის, ლანჩხუთის და ჩოხატაურის მუნიციპალიტეტების გამგეობებში სოფლის მეურნეობის სამსახური? დაამტკიცა თუ არა მუნიციპალიტეტის საკრებულოებმა სამსახურის დებულება? რამდენი ადამიანი დასაქმდება ახალ სამსახურში და რამდენი ათასი ლარია გამოყოფილი სოფლის მეურნეობის განვითარებისთვის ოზურგეთის, ლანჩხუთის და ჩოხატაურის მუნიციპალიტეტების 2012 წლის ბიუჯეტში?
ოზურგეთის მუნიციპალიტეტის გამგეობაში “გურია ნიუსს” ვერ დაუკონკრეტეს, რამდენი შტატით დაკომპლექტდება ახალი სამსახური და ვინ უხელმძღვანელებს მას. როგორც გავიგეთ, ანალოგიური სამსახურები სხვა მუნიციპალიტეტებშიც იქმნება. აღსანიშნავია, რომ წელს საარჩევნო წელია და “ნაციონალებს” ჯერ კიდევ ბევრი პოტენციური მხარდამჭერი დარჩათ დასასაქმებელი.
ოზურგეთის მუნიციპალიტეტის საკრებულომ, 18 იანვრის სხდომაზე, გამგეობის სოფლის მეურნეობის სამსახურის დებულების დამტკიცების შესახებ გადაწყვეტილება მიიღო. როგორც საკრებულოში გვითხრეს, დადგენილების მისაღებად, საჯარო ადმინისტრაციული წარმოება დაწყებულია.
ოზურგეთის მუნიციპალიტეტის საკრებულოში აკონკრეტებენ, რომ არასამთავრობო ორგანიზაციების წარმომადგენლებთან ერთად, მიმდინარეობს მუშაობა ახალი სამსახურის დებულების საბოლოო ვარიანტის ჩამოსაყალიბებლად. დებულებას კენჭს, სავარაუდოდ, 1 თებერვალს, ოზურგეთის მუნიციპალიტეტის საკრებულოს მორიგ სხდომაზე უყრიან.
ჩოხატაურის მუნიციპალიტეტის გამგებელი ლელა იმედაშვილი ჩვენთან საუბარში ამბობს, რომ სოფლის მეურნეობის სამსახური ჩოხატაურის მუნიციპალიტეტშიც იქმნება. იმედაშვილის თქმით, სამსახურის ბიუჯეტი 20 000 ლარს შეადგენს. სამსახურის საშტატო ნუსხა კი 3 ერთეულით განისაზღვრება. სამსახურის დებულებაზე ადმინისტრაციული საქმის წარმოება ჩოხატაურშიც დაწყებულია.
ანალოგიური სიტუაციაა ლანჩხუთის მუნიციპალიტეტშიც, რომლის პრესსამსახურის წარმომადგენლის წერილიდან ირკვევა, რომ ლანჩხუთის საკრებულოს #21 განკარგულებით (2012 წ. 12 იანვარი), დაწყებულია სოფლის მეურნეობის განვითარების სამსახურის დებულების მიღებისთვის ადმინისტრაციული საქმის წარმოება. სამსახურის ფუნქციონირებისთვის გამოიყო 20 ათასი ლარი, დასაქმდება სამი თანამშრომელი. რაც შეეხება დებულებას, ის საკრებულოს უახლოეს სხდომაზე დამტკიცდება.
როგორც “გურია ნიუსს” “რესპუბლიკელმა”, სპეციალობით აგრონომმა მარინე სუნგულიამ უთხრა, სოფლის მეურნეობის კუთხით, რეგიონში უკვე არსებობს სხვადასხვა სამსახურები:
_ მაგალითად, ა(ა)იპ “სოფლის მეურნეობის განვითარების სამსახური”. ამ სამსახურის უშუალო მოვალეობაა სოფლის მეურნეობის განვითარებაზე ზრუნვა; ასევე, გამგებლების მესამე მოადგილეები, ოფიციალურად, სოფლის მეურნეობის განვითარებას კურირებენ. სოფლის მეურნეობის განვითარების სამსახური, რომელიც გურიის რეგიონის სამივე მუნიციპალიტეტში უახლოეს დღეებში შეიქმნება, თავისთავად იწვევს ეჭვს _ რა ფუნქცია აქვს ამ სამსახურს თუკი მსგავსი სამსახურები უკვე არსებობენ? ვფიქრობ, რომ ეს ამ ხელისუფლების არა ერთხელ ნაცადი მეთოდია, რომ მოახლოებული არჩევნების წინ შექმნან სამსახურები, სადაც თავიანთ ერთგულ მსახურებს დაასაქმებენ. ალბათ, უნდა ველოდოთ, რომ მსგავსი სამსახურები ბევრ სფეროში შეიქმნება. მაგალითად, როგორიც არის დასუფთავების სამსახურის პრესსამსახური, _ აღნიშნა სუნგულიამ.
“გურია ნიუსი” ჯერ კიდევ გასულ წელს წერდა, რომ დასასაქმებელი ბევრი ნაციონალი და მათი მხარდამჭერი დარჩა. წინასაარჩევნო პერიოდში და არჩევნების დღეს აქტიურობით გამორჩეული “ნაცმოძრაობის” მრავალი აქტივისტი, ჯერ კიდევ დაუსაქმებლები არიან.
ოზურგეთის მუნიციპალიტეტის გამგეობაში, ისედაც ზედმეტად გაზრდილ შტატებს, მაშინ ახალ სამუშაო ადგილებს ვერ დაუმატებდნენ და სავარაუდოდ, სწორედ ამ მიზეზით გადაწყვიტა ოზურგეთის მუნიციპალიტეტის საკრებულომ რამდენიმე ერთეული არასამეწარმეო იურიდიული პირის (აიპ-ის) დაფუძნება. “ოზურგეთის მუნიციპალიტეტის სოფლის მეურნეობის განვითარების და დასაქმების ხელშემწყობი ცენტრი” გასულ წელს შეიქმნა, რომლის მიზანი სოფლის მეურნეობის და ბიზნესის განვითარება და მოდერნიზებაა.
ახლა ისედაც შტატებგადავსებულ გამგეობებში ახალი სამსახური იქმნება. ჯერჯერობით, გაურკვეველია, რას გააკეთებენ ახალშექმნილ სამსახურებში დასაქმებულები და განვითარდება თუ არა გურიის რეგიონში სოფლის მეურნეობა.
