ქალაქ ოზურგეთის მუნიციპალიტეტის საკრებულოს ფრაქცია "ოზურგეთის მომავლისათვის" წევრებმა, ქალაქ ოზურგეთის მერს ბეგლარ სიორიძეს ინფორმაციის გამოთხოვის მიზნით მიმართეს. განცხადებაში აღნიშნული იყო, რომ საკრებულოს დეპუტატი ითხოვდა ქალაქ ოზურგეთის მერიის საშტატო განრიგს, სახელფასო სარგოს თანამდებობის პირების მითითებით, დოკუმენტაციას მერიაში დასაქმებულ შტატგარეშე თანამშრომლებზე და მათთან გაფორმებულ ხელშეკრულებების ასლებს, ასევე ა.(ა)ი.პ. -ში დასაქმებულთა შესახებ ყველა ინფორმაციას.
როგორც ფრაქცია "ოზურგეთის მომავლისათვის"თავმჯდომარე თამარ ნადირიძე "გურია ნიუსთან" აცხადებს, ქალაქ ოზურგეთის მერიამ მათ ეს ინფორმაცია სრულყოფილად არ მიაწოდა, კონკრეტულად კი მითითებული არ იყო ა (ა) ი.პ. -ში როგორც შტატგარეშე, ასევე საშტატო განრიგით დასაქმებულ პირთა სახელი და გვარი.
ფრაქცია "ოზურგეთის მომავლისათვის"თავმჯდომარე თამარ ნადირიძე მიიჩნევს, რომ აღნიშნული ფაქტი არის კანონდარღვევა.
"ჩვენი ფრაქცია "ოზურგეთის მომავლისათვის" , თავისი უფლებამოსილების ფარგლებში მერიის მოქმედებათა კონტროლის მიზნით, ახორცილებს სხვადასხვა საქმიანობას, მათ შორის ჩვენ ვაპირებდით მოგვეხდინა მერიის მიერ დაარსებული არაკომერციული და კერძო სამეწარმეო იურიდიული პირების საქმიანობის მონიტორინგი, რა დროსაც გამოვითხოვეთ აქ დასაქმებულთა შესახებ ინფორმაცია. აღმოჩნდა, რომ მერიის მაღალჩინოსნების აზრით, ჩვენთვის ამ სახის ინფორმაციის მოწოდებას კანონი კრძალავდა, რადგანაც იგი შეიცავდა პერსონალურ მონაცემებს. ხსენებულ მოსაზრებას აქტიურად უწევენ ადვოკატირებას დაბალი რანგის საჯარო მოხელეებიც. მთლიანობაში მერიამ მიიჩნია, რომ ჩვენს მიერ მოთხოვნილი ინფორმაცია არ განეკუთვნებოდა საჯარო ინფორმაციის კატეგორიას და მოგვცა სხვადასხვა სახის დოკუმენტაცია, რომელშიც წაშლილი გახლავთ დასაქმებულის საიდენტიფიკაციო მონაცემები.
პირდაპირ გეტყვით, ჩემს ხელთ არსებული ინფორმაციით, არაერთი მერთან და მმართველ კლანთან დაახლოებული პირი ხელფასს ისე იღებს, რომ არც კი დადის სამსახურში.
როგორ უნდა გადავამოწმოთ ესა თუ ის ინფორმაცია, თუ ჩვენთვის ხელმისაწვდომი არ იქნება ამ პირების სახელი და გვარი"_აღნიშნავს ნადირიძე და აღნიშნულ ფაქტთან დაკავშირებით, მერიის მხრიდან არაკვალიფიციურ და დაუსაბუთებულ მოქმდებებზე საუბრობს
"რა თქმა უნდა, ჩვენ არ ვითხოვდით საჯარო ინფორმაციას ჩვენი ცნობისმოყვარეობის დაკმაყოფილების მიზნით. ეს ინფორმაცია გვჭირდება იმისათვის, რომ შევასრულოთ ნაკისრი ვალდებულებები და განვახორციელოთ ჩვენი უფლებამოსილებები. მარტივად გეტყვით თუ კი ჩვეულებრივ საჯარო მოხელეს, რომელმაც ააიპ-ებში დასაქმებული ხალხის საიდენტიფიკაციო მონაცემები წაშალა, უფლება აქვს წაშლამდე გაეცნოს ამ ინფორმაციას, რატომ უნდა იყოს იგი ჩვენთვის დაბლოკილი.
როგორც ცნობილია, მერია ძალიან ხშირად ვარდება, რბილად რომ ვთქვათ, ძალიან უხერხულ მდგომარეობაში, არაკვალიფიციური და სამართლებრივად დაუსაბუთებელი მოქმდებების გამო. დარწმუნებული ვარ, რომ ამ შემთვევაშიც იგივე განმეორდება“
_ ქალბატონო თამარ, თქვენი მოსაზრების მიხედვით ეს დაბალი კვალიფიკაციის ბრალია თუ მიზან მიმართულად ხდება თქვენთვის საქმიანობაში ხელისშეშლა?
_ ალბათ ამ შემთხვევაში ორივე ფაქტორია გაერთინებაული, ანუ მერიას არანაირი სურვილი არ გააჩნია მოხდეს იმ გაბერილ შტატებზე გამწესებული ადამიანების კვალიფიკაციისა და საქმიანი რეპუტაციის შეჯერებით ვინმემ რაიმე სახის დასკვნები გააკეთოს. რადგანაც მერიის მიერ დაარსებული იურიდიული პირები გახლავთ მერის საარჩევნო აქტივისტების თავშესაფარი, რომელთა დიდი ნაწილის დამსახურება მხოლოდ მერისვე თანამზრახველობაშია და რომელთა ძალისხმევის გამოყენებით აპირებს ოზურგეთში გაბატონებული კლანი თავისი პირობები წაუყენოს მომავალ არჩევნებზე მმართველ პოლიტიკურ ძალას.
შესაბამისად მმართველი კლანი, რომელიც დღეს ადგილობრივ ხელისუფლებაშია გაბატონებული, ხალხის ხარჯზე ინახავს და კომფორტსაც უქმნის თავის აქტივისტებს, მაგალითად სხვას ვერაფერს ვერ დავარქმევთ მერის ახირებას საბილიარდოსთან დაკავშირებით_ ამბობს ფრაქცია "ოზურგეთის მომავლისათვის" თავმჯდომარე. ის აღნიშნულ ფაქტს საკრებულოს წევრებისათვის საქმიანობის განხორციელებაში ხელშეშლად აფასებს და სამომავლო ნაბიჯზე საუბრობს:
"ეს კიდევ უფრო ხელსაყრელ პირობებს ქმნის კორუფციული გარემოს შემქნისათვის, ამ ყველაფერს თუ კი დავუმატებთ ჩვენი ადგილობრივი ხელისუფლების ავტორიტეტსა და რეპუტაციას გავითვალისწინებით, საქმე იმაზე მეტად რთულადაა ვიდრე რეალურად ჩანს. ჩვენ ამ ეტაპზე გავდივართ კონსულტაციებს იურისტებთან, რის შემდეგაც მივიღებთ გადაწყვეტილებებს მე პირადად ამ საქმიდან გამოსავალს სასამართლოსათვის მიმართვაში ვხედავ. როგორი იქნება ფრაქციის გადაწყვეტილება, ამას უახლოეს დღეებში მოგახსენებთ.
ასევე გეტყვით, რომ ამ შემთხვევაში ჩვენი მოთხოვნა იქნება არამარტო ინფორმაციის სრულფასოვნად მიღება, არამედ იმ პირებისათვის თანამდებობასთან შესაბამისობის საკითხის და სხვა სახის პასუხისმგებლობის საკითხის დაყენებაც, რომელთა ჩართულობით მიღებული გადაწყვეტილებები ხელს უშლის საკრებულოს წევრებს მუშაობაში. ასეთ ფაქტებს ძალიან ხშირად აქვს ადგილი მიუხედავად ამისა, არასდროს არავის არანაირი პასუხისმგებლობა არ დაკისრებია არაკვალიფიციური ან უკანონო ქმედებებისათვის“_ განმარტავს ქალაქ ოზურგეთის მუნიციპალიტეტის საკრებულოს დეპუტატი.
ქალაქ ოზურგეთის მუნიციპალიტეტის მერიის პრესსამსახური აღნიშნულთან დაკავშირებით ასეთ კომენტარს აკეთებს:
"ქალაქ ოზურგეთის მუნიციპალიტეტის მერიამ საჯარო ინფორმაციის გაცემისას იმოქმედა კანონით დადგენილ ფარგლებში. პირის პერსონალური ინფორმაციის გაცემა იკრძალება საქართველოს ადმინისტრაციული კოდექსითა და პერსონალურ მონაცემთა დაცვის შესახებ კანონით.
აღნიშნული ეხება, როგორც რიგით მოქალაქეებს, ისე საკრებულოს წევრს. შესაბამისად, ეს არ გახლავთ კანონდარღვევა და არ წარმოადგენს საკრებულოს წევრის საქმიანობისთვის ხელის შეშლას. რაც შეეხება თამარ ნადირიძის განცხადებას მერიაში თუ მის დაქვემდებარებული ა.(ა).ი.პ. _ ში დასაქმებულ ადამიანებთან მიმართებაში, ეს გახლავთ მორიგი ტყუილი. დაასახელოს ნადირიძემ კონკრეტულად რომელ თანამშრომელს გულისხმობს. ყველა თანამშრომელი ჩვეულებისამებრ ასრულებს სამსახურეობრივ ვალდებულებებს" _ აღნიშნულია პრესსამსახურის მიერ მოწოდებულ ინფორმაციაში.
