საქართველოს პრემიერ-მინისტრი ირაკლი ღარიბაშვილის განცხადებით, თუკი ბიძინა ივანიშვილი პოლიტიკაში დაბრუნებას გადაწყვეტს დაბრუნდება კიდეც:
_ თავის დროზე, როდესაც იგი პოლიტიკიდან წავიდა, ვფიქრობდი, რომ არ უნდა წასულიყო, მაგრამ მან სხვაგვარად გადაწყვიტა. ასე, რომ თუ დაბრუნებას გადაწყვეტს, დაბრუნდება კიდეც და ხელს არაფერი შეუშლის.
როგორც თავიდან განაცხადა, თუკი საჭიროებას დაინახავს, დაბრუნების გადაწყვეტილებას მიიღებს და ამას გააკეთებს მხოლოდ ქვეყნის ინტერესებიდან გამომდინარე, _ განაცხადა ღარიბაშვილმა "ასავალ-დასავალისთვის" მიცემულ ინტერვიუში.
პრემიერის განცხადებით მასსა და ივანიშვილს შორის წყლის ამღვრევას ვერავინ შეძლებს:
_შეეცდებიან ჩემსა და ივანიშვილს შორის წყლის ამღვრევას და ჭორების მიტან-მოტანას, მაგრამ ეს სპეკულაციები სპეკულაციებად დარჩება და ამით დაინტერესებული ადამინები საწადელს ვერ მიაღწევენ.
რაც ხელისუფლებაში ვარ, მტერი გავიმრავლე, იმიტომ, რომ ჩემი პრინციპებიდან და ცხოვრების წესიდან გადახვევა არ მჩვევია.
ჩემთვის კანონზე მაღლა არაფერი დგას – ეს არაერთხელ განმიცხადებია და საქმით არაერთხელ დამიმტკიცებია, რაც ყველაზე უკეთ ივანიშვილმა იცის.
სამართლიანობა, კანონიერება და ადამიანურობა – ამ პრინციპებზე გამზარდეს ჩემმა მშობლებმა და ამ პრინციპებზე ვზრდი ჩემს შვილებს.
არც ერთმა თანამდებობამ და ძალაუფლებამ ადამიანური სახე არ უნდა დაგაკარგვინოს.
სპეკულაციები და ტალახის სროლა, რასაც ამ თვეების განმავლობაში ჩემი და ჩემი ოჯახის წინააღმდეგ ჰქონდა ადგილი, აბსოლუტურად მიზანმიმართული, ბინძური კამპანია იყო, მაგრამ, როცა პოლიტიკაში ხარ, ასეთი რამ არ უნდა გამიკვირდეს და უნდა აიტანო კიდეც, _ აღნიშნავს პრემიერ-მინისტრი.
