რეგიონული განვითარებისა და ინფრასტრუქტურის ყოფილ მინისტრს, დავით შავლიაშვილს ქონებრივი დეკლარაციის შევსების ვადა, თანამდებობის დატოვების შემდეგ, 22 ივნისს ამოეწურა.
საჯარო სამსახურის ბიუროს ვებ-გვერდზე მისი ქონებრივი დეკლარაცია სწორედ 22 ივნისს არის განთავსებული.
ყოფილი მინისტრის ქონებრივი მდგომარეობა, 2014 წელს შევსებულ დეკლარაციასთან შედარებით შეცვლილი თითქმის არ არის, თუ არ ჩავთვლით ნაღდი ფულის ოდენობას რომელიც შავლიაშვილს თანამდებობამდე და თანამდებობის შემდეგ ჰქონდა.
2014 წლის დეკლარაციაში აღნიშნულია, რომ მას ნაღდი ფულის სახით 80 ათასი დოლარი ჰქონდა, 2015 წლის 22 ივნისს შევსებულ დეკლარაციაში კი ეს თანხა 50 ათასი დოლარია.
ასევე, გაიზარდა შავლიაშვილის ანაბრის თანხა "თი ბი სი ბანკში".
რაც შეეხება სხვა ქონებას, ყოფილი მინისტრის სახელზე დეკლარაციების მიხედვით, უძრავ მოძრავი ქონება არ ირიცხება. დეკლარაციებიდან ირკვევა, რომ შავლიაშვილის მეუღლე თბილისში, გოძიაშვილის პირველი შესახვევი #139-141, 214.00 კვ.მ ფართობის მიწის ნაკვეთს ფლობს. თათია იოსავაა კეკელიძის ქ. 14, ბინა 21, ფართობი – 58.00 კვ.მ საცხოვრებელი სახლის 100%-იანი მფლობელი, ასევე დაბა წყნეთში, არსენას ქ. 19, ფართობი – 1163.00 კვ.მ, მიწის ნაკვეთის 50%-იანი წილის მფლობელი.
რაც შეეხება საბანკო ანგარიშებზე არსებულ თანხას, დეკლარაციის შევსების მომენტში შავლიაშვილის სახელფასო ანგარიშზე "თი ბი სი ბანკში" 1 138.95 ლარი, ამავე ბანკის ანაბარზე კი, 18 164.42 დოლარი და 11 443.76 ევრო იყო; საკრედიტო ანაბარზე კი, 15 000.00 ლარი.
შავლიაშვილის მეუღლის საბანკო ანგარიშები კი ასე გამოიყურება: ბანკი "ქართუ" სახელფასო 111.73 ლარი, "თი–ბი–სი ბანკი" 122.84 ლარი; "თი–ბი–სი ბანკი" სახელფასო 6.61 ლარი.
რაც შეეხება შავლიაშვილის შემოსავლებს, რომელიც მან ერთი წლის განმავლობაში მიიღო, დეკლარაციის მიხედვით ასეთია:
საქართველოს რეგიონული განვითარებისა და ინფრასტრუქტურის სამინისტრო სახელმწიფო საქვეუწყებო დაწესებულება- საქართველოს საავტომობილო გზების დეპარტამენტის თავმჯდომარის პოსტიდან მან 47 100.00 ლარის შემოსავალი მიიღო. მინისტრის პოსტიდან – 33 423.91 ლარი;
მისი მეუღლის საერთო შემოსავალმა კი, 623,96 ლარი შეადგინა. კერძოდ, თათია იოსავამ საოჯახო მედიცინის ეროვნული სასწავლო ცენტრიდან, სადაც მას ექიმი ოფთალმოლოგის თანამდებობა უჭირავს, 136.56 ლარი, ხოლო შპს-აკადემიკოს ნიკოლოზ ყიფშიძის სახელობის ცენტრალური საუნივერსიტეტო კლინიკაში დაკავებული ამავე თანამდებობიდან 487.40 ლარი მიიღო.
რაც შეეხება შავლიაშვილების ოჯახის გასავალს, დავით შავლიაშვილმა შვილების, ირაკლი და მარიამ შავლიაშვილების სწავლის საფასური, 6000 ლარი გადაიხადა.
შეგახსენებთ, რომ პრემიერმა დავით შავლიაშვილის გადადგომის მოთხოვნა 21 აპრილს დააკმაყოფილა. როგორც რეგიონული განვითარებისა და ინფრასტრუქტურის სამინისტრომ ოფიციალურად განაცხადა, შავლიაშვილის გადაწყვეტილების მიღების მიზეზი მისი ჯანმრთელობის მდგომარეობის გაუარესება გახდა, რაც შემდგომ პრემიერ-მინისტრმაც დაადასტურა:
"შავლიაშვილის გადაწყვეტილების მიზეზი არის ის, რომ მას დეკემბერში აღმოაჩნდა საკმაოდ სერიოზული დაავადება, როგორც ჩანს – თანდაყოლილი. თუმცა სწორედ მაშინ ჰქონდა პირველი შეტევა. იმის მერე, ბოლო ოთხ თვეში ბატონმა დავითმა რამდენჯერმე მომმართა გადადგომის თხოვნით", _ აღნიშნა პრემიერმა ღარიბაშვილმა.
