"ბრიტანელი შინდლერი", ნიკოლას ვინტონი 106 წლის ასაკში გარდაიცვალა. ინფორმაცია ამერიკულ ტელეკომპანიას ვინტონის შვილმა დაუდასტურა. როგორც ცნობილია, ის ოჯახის წევრების გარემოცვაში აღესრულა.
CNN-ის ინფორმაციით, ბრიტანეთის პრემიერ-მინისტრმა, დავით კამერონმა ვინტონს უწოდა ადამიანი, რომლის გაკეთებული საქმეც მთელ მსოფლიოს ყოველთვის ემახსოვრება.
"მსოფლიომ დაკარგა დიდებული კაცი, ჩვენ არასდროს დავივიწყებთ, რომ ჰოლოკასტიდან ამდენი ბავშვი გადაარჩინა", _ განაცხადა ბრიტანეთის პრემიერ მინისტრმა.
როგორც ცნობილია, მეორე მსოფლიო ომის დაწყებამდე 9 თვით ადრე, გერმანელების მიერ ოკუპირებული ჩეხოსლოვაკიიდან, ბრიტანელმა მამაკაცმა 669 ბავშვის გაყვანა მოახერხა. 17 წლამდე ასაკის ბავშვების უმრავლესობა ებრაელი იყო. ბრიტანეთმა მაშინ 10 ათასამდე დევნილი ბავშვი შეიფარა ნაცისტური გერმანიიდან, პოლონეთიდან, ავსტრიიდან და ჩეხოსლოვაკიიდან. ბავშვები ბრიტანულ სკოლებში ფერმებში და სასტუმრო-სახლებში გაანაწილეს. მათგან ბევრი, ოჯახიდან ერთადერთი იყო, ვინც ჰოლოკოსტს გადაურჩა.
ვინტონის გმირობის ამბავი მსოფლიომ მოგვიანებით, 1988 წელს შეიტყო, როცა ბრიტანულ მაუწყებელ BBC-ის ეთერში გადაცემა THAT IS LIFE გავიდა, სადაც ვინტონი მიწვეული ჰყავდათ.
2002 წელს ინგლისის დედოფალმა ელისაბედ მეორემ, ის რაინდის წოდებით დააჯილდოვა.
აღსანიშნავია, რომ პრაღის მთავარ სარკინიგზო სადგურზე დგას ვინტონის ქანდაკება, ორ ბავშვთან ერთად. მონუმენტი 2009 წლის პირველ სექტემბერს სიმბოლურად დაიდგა იმ დღიდან 70 წლის აღსანიშნავად, როცა ამ სადგურიდან ჰოლოკოსტს გადარჩენილი ბავშვებით სავსე ბოლო მატარებელი გავიდა.
