სამხარეო ადმინისტრაციაში "ICBT CORPORATION"-ის პირველი სამუშაო შეხვედრა გაიმართა ICBT კორპორაცია პროექტის ფარგლებში "შავი ზღვის მარგალიტი" გურიაში 100 მილიონი დოლარის ღირებულების ინვესტიციას განახორციელებს.
ამ საკითხთან დაკავშირებით სახელმწიფო რწმუნებული-გუბერნატორი გურიის მხარეში, გია სალუქვაძე მოადგილეებთან და ადგილობრივი ხელისუფლების წარმომადგენლებთან ერთად გასულ კვირას კომპანიის წარმომადგენლებს შეხვდა. როგორც შეხვედრაზე ითქვა, ჯერჯერობით, სოფლის მეურნეობის სხვადასხვა ორგანული პროდუქტის (ხორცი, რძის პროდუქტები, ხილ ბოსტნეული და ა.შ.) წარმოების საკითხი განიხილება.
ინვესტიცია კომპლექსის მშენებლობას მოიცავს, რომელშიც წარმოებული პროდუქტების ექსპორტირებისთვის ტერმინალი განთავსდება. კომპლექსი უახლესი ტექნოლოგიებით აღიჭურვება. სამუშაოების ეფექტურად შესრულებას მონიტორინგს კომპანიის სპეციალისტები გაუწევენ. აღნიშნული პროექტის განხორციელების შედეგად გურიაში რამდენიმე ათასი ადგილობრივი დასაქმდება. ასევე, განიხილეს "პროფესიულ კოლეჯთან" მემორანდუმის გაფორმებისა და კადრების გადამზადების საკითხიც.
"შავი ზღვის მარგალიტის" ინიციატივა ჩვენი რეგიონისთვის მართლაც სასარგებლო იქნება. მხარის ხელისუფლება კომპანიას პროექტის წარმატებით განხორციელების საქმეში სრულ მხარდაჭერას უცხადებს. გურიის რეგიონში ამ ტიპის ინვესტიციის განხორციელებისთვის ყველანაირი პირობა არსებობს. მსგავსი სახის პროექტები მხარის ეკონომიკის განვითარებას ხელს შეუწყობს." – განაცხადა გია სალუქვაძემ.
აღნიშნული კომპანიის მიერ წარმოებული პროდუქტი სერტიფიცირებული იქნება, რომელიც ევროპის ბაზრის სტანდარტებს სრულად დააკმაყოფილებს. ICBT CORPORATION" პროექტის ფარგლებში იგეგმება გურიის რეგიონში 200-500 ჰა.
მიწის ნაკვეთზე (თავისუფალი ინდუსტრიული ზონის) აგრო-სამრეწველო კომპლექსის მშენებლობა, რომელიც თავისთავში მოიცავს: 1. სასათბურე მეურნეობა; 2. მეფრინველეობის ფერმა; 3. მსხვილფეხა რქოსანი პირუტყვის ფერმა; 4. წვრილფეხა რქოსანი პირუტყვის ფერმა; 5. ბიო-აირის საწარმო; 6. ხორც-პროდუქტების გადამამუშავებელი კომბინატი; 7. რძის კომბინატი; 8. საკონსერვო ქარხანა; 9. ხილისა და ბოსტნეულის სასაწყობე მეურნეობა; 10. სასოფლო-სამეურნეო დანიშნულების ტექნიკის საამქრო; 11. კომბინირებული საკვების ქარხანა; 12. სატრანსპორტო კომპანია; 13. საპორტო ტერმინალი.
აგრო-სამრეწველო კომპლექს "გურია"-ში შეიქმნება 1500-დან 2000-მდე მუდმივი სამუშაო ადგილი. "ICBT CORPORATION"- კომპანიამ გურიაში 100 მილიონი დოლარის ღირებულების ინვესტიციის განსახორციელებლად სამუშაო ჯგუფი გამოაგზავნა. სააქციო საზოგადოება "ICBT CORPORATION"-ის აღმასრულებელი დირექტორი, მერაბ დავითაძე გუბერნატორის მოადგილემ, ქეთევან მოისწრაფეშვილმა მიიღო. პირველი სამუშაო შეხვედრა დღეს სამხარეო ადმინისტრაციაში გაიმართა. შეხვედრაზე სხვადასხვა სახის პროცედურული საკითხები განიხილეს; დასახეს სამოქმედო გეგმა, რომლის ფარგლებშიც სამუშაო ჯგუფები ერთმანეთთან აქტიურად ითანამშრომლებენ. სამუშაო შეხვედრას "ICBT CORPORATION"-ის იურიდიული დეპარტამენტის უფროსი, ადგილობრივი ხელისუფლების წარმომადგენლები, ექსპერტები სოფლის მეურნეობის საკითხებში და სამხარეო ადმინისტრაციის თანამშრომლები ესწრებოდნენ.
