ოზურგეთის სამედიცინო ცენტრის ეკონომისტმა ირაკლი სირაძემ თანამდებობა გასულ კვირას დატოვა. თანამდებობის დატოვების შესახებ დაწერილ ოფიციალურ განცხადებაში სირაძე მხოლოდ რამდენიმე სიტყვით შემოიფარგლა. მან განცხადება ამავე ცენტრის გენერალური დირექტორის, ზაზა ჯაფარიძის სახელზე დაწერა. “გურია ნიუსისთვის” ასევე გახდა ცნობილი, რომ თანამდებობა შესაძლოა, სამედიცინო ცენტრის გენერალური დირექტორის მოადგილემ, ლევან ანთაძემ დატოვოს. ასევე, ჩვენი წყარო ამბობს, რომ ექიმების მიერ დაწერილი განცხადებების გამო, საყვედური მიიღეს ცენტრის კლინიკურმა დირექტორმა, დავით მდინარაძემ და ქირურგმა ნესტორ თოიძემ.
“გურია ნიუსი” ამ საკითხთან დაკავშირებით დავით მდინარაძეს და ლევან ანთაძეს დაუკავშირდა.
_ ბატონო ლევან, რატომ დატოვა თანამდებობა სამედიცინო ცენტრის ეკონომისტმა ირაკლი სირაძემ?
_ ჰკითხეთ მას, მე არ ვიცი.
_ გავიგეთ, რომ მალე თანამდებობას თქვენც დატოვებთ.
_ არ ვიცი, ვინ გაავრცელა ეს ინფორმაცია. მას ჰკითხეთ. ყოველ შემთხვევაში, მე არ ვაპირებ პოსტის დატოვებას.
მისივე თქმით, სამედიცინო ცენტრში, ექიმებთან დაკავშირებით არსებული ყველა პრობლემატური საკითხი გადაიჭრა და არავინ აპირებს თანამდებობის დატოვებას.
ანთაძის მსგავსად, დავით მდინარაძემაც გვითხრა, რომ არ იცოდა, თუ რატომ დატოვა თანამდებობა სირაძემ:
_ მხოლოდ ის ვიცი, რომ მან თავისი სურვილით დატოვა თანამდებობა.
_ მართალია თუ არა ინფორმაცია, რომ თქვენ და ნესტორ თოიძემ საყვედური მიიღეთ სამედიცინო ცენტრის მესვეურებისგან?
_ ნამდვილად არ ყოფილა მსგავსი რამ და არც არავის უთქვამს ჩვენთვის საყვედური, _ გვითხრა მდინარაძემ.
ჩვენ ირაკლი სირაძეს ტელეფონით დავუკავშირდით. მან გვითხრა, რომ საჭესთან იყო და ნახევარ საათში დავკავშირებოდით, ნახევარ საათში კი მისი ტელეფონი “გასული იყო მომსახურეობის ზონიდან”.
“გურია ნიუსს” ასევე მიაწოდეს ინფორმაცია იმის შესახებ, რომ სამედიცინო ცენტრიდან გაუშვეს გინეკოლოგი ირინა კოპალეიშვილი, რომელსაც ამავე ცენტრის გენერალურ დირექტორთან, ზაზა ჯაფარიძესთან, ერთ-ერთ შეხვედრაზე შეკამათება მოუხდა:
_ ქალბატონო ირინა, გავრცელებული ინფორმაციით, თქვენ სამედიცინო ცენტრი დატოვეთ.
_ არა, ეს ინფორმაცია არ შეესაბამება სიმართლეს.
_ როდესაც სამედიცინო ცენტრის გენერალური დირექტორი იყო ჩამოსული ოზურგეთში, მან მართლა გითხრათ, რომ ახალგახსნილ ცენტრში თქვენი გადასვლის საკითხში ნახევარი საქართველო ჩაერიაო?
_ დიახ, ეს სიმართლეა.
_ კონკრეტულად დაასახელეს, ვინ ჩაერია თქვენი სამედიცინო ცენტრში დასაქმების საქმეში?
_ არა, მან არ დაასახელა. მართლაც, ჩვენ შორის დგას ბევრი ახლობელი. არანაირ აწიოკებას არ ჰქონია ადგილი, უბრალოდ, რეკომენდაცია გამიწიეს.
_ ქალბატონო ირინა, თქვენ, როგორც დანარჩენმა მედპერსონალმა, გაიარეთ ტესტირება და ისე მოხვდით სამედიცინო ცენტრში თუ ახლობლები დაგეხმარნენ?
_ არა, მეც ჩვეულებრივად გავიარე ტესტირება.
_ ქალბატონო ირინა, ასევე გავიგეთ, რომ “ქართულ ოცნებაში” აპირებთ გაწევრიანებას.
_ არა, ეს არ არის სიმართლე.
