გურიის ტყეებში ისევ ხანძარია

ხანძარი გურიის ტყეებს თითქმის ერთდროულად, 11 დეკემბერს, დღის მეორე ნახევარში გაუჩნდა _ თავდაპირველად ცეცხლი ოზურგეთის მუნიციპალიტეტის სოფელ მთისპირის ტყეს მოედო, რომელსაც ჩოხატაურის მუნიციპალიტეტის სოფელი ბასილეთი ესაზღვრება. 11 დეკემბრის საღამოს კი ქარი ამოვარდა, რის შემდეგაც ხანძარი გაძლიერდა და ბასილეთის ტყეშიც გადმოვიდა.
მოგვიანებით ცნობილი გახდა, რომ ცეცხლი ლანჩხუთის მუნიციპალიტეტის რამდენიმე სოფლის ტყეშიც გაჩნდა.
11 დეკემბერს, გვიან ღამით, სამაშველო სამსახურის წარმომადგენლებმა გვითხრეს, რომ დამწვარია ათობით ჰექტარი ტყე:
_ ხანძარი იმდენად ძლიერია, რომ რამდენიმე საათში გაანადგურა ათეულობით ჰექტარი. ცეცხლის კერა ოზურგეთში გაჩნდა და მალევე გადავიდა ჩოხატაურში, რასაც ხელი ძლიერმა ქარმაც შეუწყო, _ აღნიშნა ჩვენთან სატელეფონო საუბარში გურიის საგანგებო სიტუაციების სამსახურის წარმომადგენელმა.
გურიის გუბერნატორის, ვალერი ჩიტაიშვილის თქმით, ცეცხლის ჩასაქრობად ყველა შესაბამისი სამსახური მობილიზებულია:
_ მეც ამ წუთას ჩამოვედი ტყიდან (საუბარი ჩაწერილია 11 დეკემბერს, 22 საათზე). საკმაოდ რთული სიტუაციაა. საგანგებო სიტუაციების სამსახურის თანამშრომლები, სახანძრო რაზმები, სამართალდამცავები და მოსახლეობა, ხელისუფლება, ყველა მობილიზებულია. ამ ეტაპზე ცეცხლს ჩვენი ძალებით ვუმკლავდებით, თუმცა, არ არის გამორიცხული, სამაშველო სამსახურები სხვა რაიონებიდანაც გამოვიძახოთ, _ აღნიშნა გუბერნატორმა.
მიუდგომელი ადგილების გამო, მაშველებმა ღამით მუშაობა ვერ შეძლეს და ცეცხლის ჩასაქრობად სამუშაოები 12 დეკემბრის დილასვე განაახლეს.
12 დეკემბრის მონაცემებით, მხარის მასშტაბით თითქმის 100 ჰექტრამდე ტყეა დამწვარი.
დაუდგენელია ხანძრის გამომწვევი მიზეზები. სისხლის სამართლის საქმე უკვე აღძრულია და მიმდინარეობს გამოძიება. არსებობს ვერსია, რომ ხანძარი მიზანმიმართულად არის გაჩენილი.
აღსანიშნავია, რომ ბოლო დროს საქართველოში ტყეში ხანძრის გაჩენის შემთხვევებმა იმატა. გასულ თვეში, ერთი კვირის განმავლობაში, ჩოხატაურის მუნიციპალიტეტის სოფელ ბუკისციხეში ტყეს ცეცხლი ხუთჯერ გაუჩნდა და ჯერჯერობით ხანძრის გაჩენის მიზეზი იქაც არ არის დადგენილი.