ჩვენი გაზეთის წინა ნომერში გამოქვეყნებულ ინფორმაციას, რომ, შესაძლოა, ლანჩხუთის დეპუტატობის მაჟორიტარ კანდიდატებს შორის ფეხბურთის ფედერაციის ყოფილი თავკაცი და ახლა ჰოლანდიური კლუბის მეპატრონე მერაბ ჟორდანია ვიხილოთ, დიდი გამოხმაურება მოჰყვა. წერილს ჰოლანდიიდან თვით მერაბ ჟორდანია გამოეხმაურა.
ამ ინფორმაციის გაჟღერების შემდეგ, მერაბ ჟორდანიას ფორმაციის ფედერაციის გენმდივანი ვალერი ჩოლარია დაგვიკავშირდა:
_ თქვენთან დაკავშირება წერილის გამო გადავწყვიტე. აი, მერაბთან დაკავშირებით რომ არის ინფორმაცია.
_ დიახ, გისმენთ.
_ მერაბი დამიკავშირდა და მითხრა, რომ პოლიტიკით მისი დაინტერესება კატეგორიულად გამორიცხულია.
_ გასაგებია, ჩვენც მივანიშნეთ, რომ ეს ვარიანტი ნაკლებად დამაჯერებელი იყო.
_ კი, ყველაფერი კარგად გეწერათ, არანაირი პრეტენზია მაგაზე არ გვაქვს. კარგად იყო აღნიშნული, რომ ეს გამორიცხულია. უბრალოდ, ბატონმა მერაბმა კიდევ ერთხელ დაადასტურა, რომ მას აქვს საქმე და სხვა არაფერი აინტერესებს.
_ გასაგებია.
_ თქვენი წერილის შემდეგ დამირეკა რამდენიმე ადამიანმა მობილურზე და მერაბის ტელეფონის ნომერი მთხოვა. რეკავდნენ დაფარული ნომრით. მე ვკითხე, რატომ რეკავდნენ დაფარული ნომრით? მე მაქვს მერაბის ტელეფონი, მაგრამ ჩემი მხრიდან ნომრის გაცემა გამორიცხულია. მე მათ ვუთხარი, მოდით ჩემთან ოფისში და დავილაპარაკოთ,-მეთქი. 10-მილიონიან ბაზას აკეთებსო და ეგ აინტერესებთ. იმით არავინ ინტერესდება, რომ მერაბი აკეთებს ქართულ საქმეს _ კლუბში წაიყვანა რამდენიმე ქართველი, კიდევ აპირებს, ყველანაირად გვერდში დაუდგეს ქართულ ფეხბურთს. ამასწინათ შეხვედრა მოუწყო ხურცილავას, ჩივაძეს და სხვა სასიქადულო ვეტერანებს; “ვიტესის” ჭაბუკთა გუნდი თავისი სახსრებით გამოუშვა თბილისში გამართულ ტურნირზე. ახლა სურს ჩვენი ახალგაზრდული ნაკრების მიწვევა შეკრებაზე, სპარინგების გამონახვა და ა. შ. ამით არავინ ინტერესდება _ ის აინტერესებთ, რამდენმილიონიან ბაზას აკეთებს და ამგვარი.
_ გეთანხმებით, ბატონო ვალერი, მერაბ ჟორდანია ნამდვილად დიდ საქმეს უკეთებს ქართულ ფეხბურთს.
_ გაიხარეთ, მხოლოდ ეგ მინდოდა მეთქვა.
_ ბატონ მერაბს როცა შეეხმიანებით, ჩვენი სახელით მოკითხვა გადაეცით და წარმატებები უსურვეთ.
_ აუცილებლად, აუცილებლად! მან მითხრა, რომ თქვენთან აქვს კარგი ურთიერთობა და ამიტომაც მინდოდა თქვენთან დაკავშირება, სხვა შემთხვევაში არც დაგირეკავდით.
მოკლედ, მერაბ ჟორდანია პოლიტიკაზე და ლანჩხუთის მაჟორიტარობაზე უარს ამბობს. ზემოთ ნახსენები ფაქტორების გათვალისწინებით, ეს გასაკვირი სულაც არ არის. ერთი კია _ 2003 წლის საპარლამენტო არჩევნებში მისი გამარჯვება ლანჩხუთის რაიონისთვის ნამდვილად პოზიტიური საქმე იქნებოდა, რადგან მას საკმაოდ დიდი ბერკეტები (ფინანსურიც და სანაცნობო წრეებიც) გააჩნდა იმისთვის, რომ ლანჩხუთის ისტორიაში ყველაზე გამორჩეულ მაჟორიტარად დარჩენილიყო _ ბოლოს და ბოლოს, ლანჩხუთის “გურიას” მაინც გამოუძებნიდა პატრონს. იმ დროისთვის დაწყებული იყო კავშირების გამონახვა მარსელის “ოლიმპიკის” მესვეურებთან _ ჟორდანია პირად საუბრებში აცხადებდა, რომ მისი მეგობარი პლატინი მას ფრანგული ინვესტორის მონახვას დაჰპირდა.
საფეხბურთო წრეებში ჟორდანია ქართველებიდან ყველაზე ცნობილი სახეა. ეს იმითაც დასტურდება, რომ მეგობრობს ფიფასა და უეფას პრეზიდენტებთან _ იოზეფ ბლატერსა და მიშელ პლატინისთან, “ჩელსის” მილიარდერ მფლობელ რომან აბრამოვიჩთან და სხვებთან. არ არის გამორიცხული მას რაღაც გეგმა ჰქონდეს საქართველოსთან დაკავშირებითაც, ოღონდ საფეხბურთო კუთხით. სხვათა შორის, მას “ვიტესამდე” თბილისის “დინამოს” შეძენა სურდა, მაგრამ არც მაშინ და როგორც ჩანს, არც ახლა, ქართული ფეხბურთი მის გავლენებს საკმარისად არ იყენებს.
