ბახმაროში საკურორტო სეზონი უკვე დაიწყო. კურორტის დირექტორის დავით საჯაიას ინფორმაციით, მიუხედავად ცუდი ამინდებისა, დამსვენებელი უკვე სტუმრობს კურორტს, ბახმაროში ასულებს კი წელს ბევრი სიახლე დაგვხდებათ:
_ მახარაძის, ინგოროყვას, ვაკიჯვრის და სატყეოს ქუჩების მოსახლეობას წლების განმავლობაში პირველად ექნებათ უწყვეტი წყალმომარაგება _ შენდება დამატებითი მაგისტრალი 16-ტონიანი ავზით, რაც მნიშვნელოვნად აუმჯობესებს კურორტის წყალმომარაგებას; დამსვენებელს საშუალება ექნება ისარგებლოს მაღალსიჩქარიანი Wi Fi ინტერნეტით ორ დასასვენებლ პარკში _ ტაძრის წინ მდებარე პარკსა და ე. წ. საბავშვო პარკში, რომელიც კინოთეატრის მიმდებარე ტერიტორიაზე მდებარეობს; უკვე შევიძინეთ მრავალფუნქციური ექსკავატორ-დამტვირთველი და მაღალი გამავლობის სატვირთო თვითმცლელი ავტომანქანა, რომელსაც გამოვიყენებთ, როგორც შიდა გზების მოსაწესრიგებლად, ასევე, თოვლის საფარის გასაწმენდად, _ ამბობს საჯაია, რომლის თქმით, ადმინისტრაციას წელს ბახმაროში მუშაობა უფრო გაუადვილდება, რაც ადგილობრივი ხელისუფლების მონდომების, მხარდაჭერის და აქტიური მუშაობის შედეგია:
_ მადლობა მინდა გადავუხადო ჩოხატაურის მუნიციპალიტეტის გამგებელს ბატონ ირაკლი კუჭავას, საკრებულოს თავმჯდომარეს ბატონ ზაალ მამალაძეს _ ამ ადამიანების 
მხარდაჭეროთ, წელს, ჩვენ შეგვეძლება საკუთარი ძალებით, სწრაფად და მარტივად გავწმინდოთ არხები, გზები _ ერთი სიტყვით, დროულად მოვაგვაროთ ის პრობლემები, რომელიც ბახმაროში გვაქვს და გვექნება მისი რელიეფიდან გამომდინარე, _ დასძენს საჯაია.
კურორტის დირექტორის თქმით, მიმდინარეობს მინისტადიონის რემონტი და განახლდება საბავშვო პარკი:
_ ბახმაროს არსებობის ისტორიაში, კურორტზე არ ყოფილა ისეთი თანამედროვე ტიპის ატრაქციონები, როგორიც წელს იქნება. ამ სიახლით გავახარებთ პატარებს, რომლებსაც ძალიან უყვართ ჩვენი კურორტი, _ ამბობს საჯაია.
ბახმაროში წელს ერთ-ერთი მნიშვნელოვანი პრობლემა მოგვარდება _ კურორტზე ორი კვების ობიექტი იხსნება, რომელთა არარსებობა დამსვენებელთა უკმაყოფილებას იწვევდა.
_ იქნება მაღალკვალიფიციური სამედიცინო მომსახურება _ უკვე გაფორმებულია ხელშეკრულება კლინიკა "მამქოლთან" და დამსვენებელს წელს პროფესიონალი მედიკოსები მოემსახურებიან, _ ამბობს საჯაია.
კურორტის დირექტორის თქმით, ამ სეზონზე დამსვენებელს ბევრი სიურპრიზი ელოდებათ:
_ ვგეგმავთ კონცერტების, ახალგაზრდული საღამოების, საცხენოსნო ტურების მოწყობას. ვფიქრობ, ეს წამოწყება და სიახლე ბევრს დააინტერესებს.
როგორც კურორტის დირექტორი ამბობს, უკვე დაიდგა სწრაფი გადახდის აპარატები:
_ ბახმაროში პრობლემა იყო და ჯერჯერობით ისევ პრობლემად რჩება ელექტროენერგიის საფასურის გადახდა. სამწუხაროდ, ამ დრომდე ვერ მოხერხდა გამრიცხველიანება, თუმცა, გვპირდებიან, რომ მომავალ სეზონზე იქნება. მანამდე კი გეტყვით, რომ წელს თანხის გადახდა მოხდება "ლიბერთი ბანკის" ოპერატორებისა და სწრაფ გადახდის აპარატების საშუალებით, რაც დამსვენებელს სიტუაციას გაუიოლებს.
დავით საჯაია პირად სატელეფონო ნომერს ასაჯაროებს და დასვენების მსურველებს ურჩევს:
_ მობრძანდით _ გელოდებით ბახმაროში! 24 საათის განმავლობაში შეგიძლიათ დამირეკოთ ჩემს პირად ნომერზე 577954368 და მე და ჩემი გუნდი მაქსიმალურად ვეცდებით თქვენს დახმარებას!
