13 ივნისის ღამეს მომხდარ წყალდიდობის შემდეგ განვითარებულ მოვლენებზე ამერიკული გამოცემა "გარდიანი" სტატიას სათაურით: "თბილისის ზოოპარკის ტრაგედია _ რა იქნება შემდეგ?" აქვეყნებს.
"გურია ნიუსი" სტატიის თარგმანს გთავაზობთ:
"გასულ თვეს თბილისში მძიმე დღეები იყო. საქართველოს დედაქალაქი ჯუნგლებად გადაიქცა. წყალდიდობის დროს ზოოპარკიდან გამოქცეული ველური ცხოველები ქუჩებში დაძრწოდნენ. დიდი აფრიკული ჰიპოპოტამი ქუჩაში დადიოდა, ვიდრე ტრანკვილიზატორი არ ესროლეს და ზოოპარკში არ დააბრუნეს.
ამ ამბებმა მსოფლიო პრესის პირველ გვერდებზე დაიკავა ადგილი. ბიბლიურ სცენას გავდა, როგორ აძვრა დათვი წყალდიდობისგან თავგადასარჩენად კონდიციონერზე, ან ტალახში დამხრჩვალი თუ ჩაცხრილული ლომები, რომელთა გადასარჩენად კიდობანი არ მოვიდა.
გამოცემის ინფორმაციით, ზოგიერთი ადამიანი შეწუხებული იყო იმით, რომ ცხოველებმა მსოფლიოს ყურადღება მიიქციეს. როგორც ცნობილია, წყალდიდობის დროს 19 ადამიანი დაიღუპა. სამი გაუჩინარებულია და ათეულობით მოსახლემ საცხოვრებელი სახლი მიატოვა. წყალდიდობიდან მეოთხე დღეს გაქცეულმა ვეფხვმა ადამიანი იმსხვერპლა.
"ეს ტრაგედია ჩემ ფანტაზიებს სცდება"_თქვა ზოოპარკის დირექტორმა ზურაბ გურიელიძემ. გამოცემის ინფორმაციით, ტრაგედიიდან სამი კვირა გავიდა და ზოოპარკში ყველა ცხოველი აღწერეს დაკარგული ვეფხვის ჩათვლით, რომელიც რამდენიმე დღის წინ მკვდარი იპოვეს.
ზოოპარკმა სამასზე მეტი ცხოველი დაკარგა, ნაწილი დაიხრჩო, ნაწილი პოლიციელებმა მოკლეს. ზოოპარკში ასევე გლოვებენ სამ თანამშრომელს, რომლებიც იქვე ცხოვრობდნენ და წყალდიდობისგან დაიღუპნენ.
THE GUARDIAN -ის ინფორმაციით, ბევრი ცხოველის გალია დაიშალა. ერთ-ერთი ნიანგი ახლა პინგვინების ყოფილ ადგილსამყოფელში იმყოფება, ხოლო რვა გადარჩენილ პინგვინს ადგილი შეუცვალეს და მტაცებელ ფრინველებთან ახლოს პატარა გალიაში შეასახლეს.
გურიელიძეს დაჟინებული თხოვნით, მუშები სწრაფ ტემპში მუშაობენ, რომ 1 აგვისტოსთვის მოესწროს ზოოპარკის გახსნა.
"თუ ვერ მოვასწრებთ 1 აგვისტოსთვის, მაშინ 1 სექტემბერს გავხსნით. ზოოპარკი საჯარო დაწესებულებაა და ჩვენ ის აუცილებლად უნდა გავხსნათ"_ამბობს გურიელიძე.
ასევე ზოოპარკის სპიკერის, მზია შარაშიძეს თქმით, მალე ზამთარი მოვა და უკვე სახელგანთქმული ჰიპოპოტამისთვის სათანადო პირობების შესაქმნელად 250 ათას ევრომდეა საჭირო.
"ის სიცივეს ვერ გაუძლებს," _ ამბობს შარაშიძე. გამოცემის ინფორმაციით, მთავრობას აქვს გეგმა, რომ ზოოპარკი თბილისის გარეუბანში გადაიტანოს, თუმცა პროექტი 15 მილიონ ევრომდე ჯდება. ზოოპარკთან დაკავშირებულმა მოვლენებმა, 2006 წლიდან ზოოპარკის დირექტორი და ამჟამად პოპულარული ფიგურა გურიელიძე კრიტიკის ქარცეცხლში გახვია.
იყო მცდელობა ხელები მისთვის შეეწმინდათ. თუმცა ცენტრალურ მოედანზე ასობით მოქალაქე გურიელიძეს მხარდასაჭერად შეიკრიბა, როცა ის პოლიციამ დასაკითხად წაიყვანა. პროტესტანტების უმეტესი მოხალისეები იყვნენ, რომლებიც სტიქიის შემდეგ ტერიტორიის დასუფთავებაში იღებდნენ მონაწილეობას.
გამოცემის ცნობით, ვახშმის შემდეგ გურიელიძემ და მისმა ცოლმა, ნათია კოპალიანმა ცხოველების შემოწმება გადაწყვიტეს. ისინი ზოოპარკში დაახლოებით შუაღამისას მივიდნენ, როცა წვიმა შეწყდა.
“უამრავი გუბე ჩანდა, მაგრამ სხვა მხრივ თითქოს ყველაფერი კარგად იყო”, _ამბობს გურიელიძე. “ჩვენ აფთრების და ღორების სანახავად წავედით, მაგრამ ჩვენს ირგვლივ სულ წყალი იყო. ხმა არ ისმოდა, მაგრამ წყლის დონე სწრაფად იმატებდა. ეს შემაშინებელი იყო.” _ ამბობს კოპალიანი.
გამოცემის ინფორმაციით, წყვილი მანქანისკენ გაიქცა, მაგრამ ვიდრე მანქანას დაქოქავდნენ, წყალი უკვე კარებს ფარავდა. მათ მაშინვე დატოვეს მანქანა და ვეფხვის გალიაზე აძვრნენ.
“ჩვენ ზემოთ მივძვრებოდით და წყალიც მატულობდა.“-ამბობს კოპალიანი. ზოოპარკის პატარა შენობაში კი თანამშრომლებს გადარჩენის შანსი არ მიეცათ.
მათ შორის იყო გულიკო ჩიტაძე, ზოოპარკის თანამშრომელი, რომელსაც რამდენიმე დღით ადრე ხელი მოაჭრეს, რადგან ერთ-ერთი ვეფხვი თავს დაესხა, თუმცა ის სამუშაოს მაინც დაუბრუნდა. გურიელიძე ხედავდა, რომ ვეფხვები გაიქცნენ, ბევრ სხვა ცხოველთან ერთად, მაგრამ ღამისა და ძლიერი წვიმის გამო, მან ვერაფრის გაკეთება ვერ შეძლო.
წყვილმა მაშველებისთვის დარეკვა ვერ მოახერხა, რადგან მობილურები წყალმა გააფუჭა. პოლიციელებმა გაიგონეს მათი ყვირილი. ისინი ვეფხვის გალიაზე ზემოდან იმყოფებოდნენ, მაგრამ შესვლა ვერ მოახერხეს, რადგან დიდი იყო თავდასხმის საფრთხე.
"შემდეგ შევიტყვეთ რომ ცხოველებს ხოცავდნენ. როცა წყალმა იკლო მხოლოდ მაშინ შეძლეს მოხალისეებმა და ზოოპარკის თანამშრომლებმა დასახმარებლად მისვლა"_ამბობს კოპალიანი. ვიდრე მოქალაქეებს ეძინათ, ათასობით სახლი დაიტბორა. როგორც გაირკვა, თბილისის ფარგლებს გარეთ მეწყერის ჩამოწოლამ მდინარე ვერეს ადიდება გამოიწვია.
საქართველოს ეკლესიის პატრიარქმა ილია მეორემ განაცხადა, რომ წყალდიდობა იყო საბჭოთა ხელისუფლების სასჯელი და დასძინა, რომ მათ ზოოპარკი ჯვრების გადადნობით გააკეთეს. საზოგადოებაში არსებობს კითხვა, რატომ ხოცავდა პოლიცია ცხოველებს და არ იყენებდა ტრანკვილიზატორებს.
“ისინი გადარჩენილ ცხოველებს ხოცავდნენ,”_ ამბობს თინა ჭავჭანიძე. როგორც მთავრობა აცხადებს, პოლიციას არ შეეძლო ადამიანების სიცოცხლე საფრთხეში ჩაეგდო.
როგორც ცნობილია, ტყვიას გაქცეული ცხოველებიდან, მხოლოდ ჰიპოპოტამი ბეგი გადაურჩა. გამოცემის ინფორმაციით, როგორც კი წყალდიდობის შესახებ შეიტყო, გურიელიძის დიდი ხნის პარტნიორი ლევან ბუთხუზი შემთხვევის ადგილას მოვიდა.
"როცა მოვედი, ქაოსი იყო."_ ამბობს ბუთხუზი. მას მიუძღვის წვლილი ბეჰემოთის გადარჩენაში. რადგან ზოოპარკს წამალი არ აღმოაჩნდა, მან თავის მეგობარს დაურეკა და სთხოვა, რაც კი წამლები ჰქონდა მოეტანა.
“რადგან ბეგი 2 ტონაზე მეტს იწონის, წამალს სამოქმედოდ დიდი დრო დასჭირდა, თუ ჰიპოპოტამს ზოოპარკის მიღმა ჩაეძინებოდა, მას ადგილიდან ვეღარ დაძრავდნენ.”-ამბობს ლევან ბუთხუზი. THE GUARDIAN-ის ინფორმაციით, ბევრმა ქართველმა გულთან ახლოს მიიტანა ცხოველების ბედი, განსაკუთრებით თეთრი ლომის ბოკვერის, შუმბასი.
სოციალური ქსელების 20 ათასზე მეტმა მომხმარებელმა მთელი კვირის მანძილზე ტრაგედიიდან პროფილის ფოტოდ შავი კვადრატი დააყენა. ხოლო ათასობით მოქალაქე რეკავდა ზოოპარკში თხოვნით, შუმბას სახელობის პარკი დააარსონ. ზოგი ფიქრობს, რომ ეს აქტივისტური განწყობა ნელ-ნელა ქრება. მაგრამ სხვა თუ არაფერი, საპროტესტო აქციები და კრიტიკა დემოკრატიულობის ნიშანია. როგორც ცნობილია, ზოოპარკში ახალი არსება, შვლის ნუკრი დაიბადა, რომელსაც ბერძნული მითოლოგიის თანახმად პირრა დაარქვეს.
წერს ამერიკული გამოცემა "THE GUARDIAN.“
