ჯერ კიდევ 4 ივლისს სპორტული დავების განმსაზღვრელმა დამოუკიდებელმა არბიტრაჟმა, ლანჩხუთის "გურია" კლუბიდან გაშვებული მწვრთნელების – თემურ ლორიასა და თენგიზ პატარაიას სარჩელის საფუძველზე დამნაშავედ ცნო და დაახლოებით 40 ათასი ლარის გადახდა დაავალდებულა.
მაშინ "გურია ნიუსთან" საუბარში ლანჩხუთის მუნიციპალიტეტის გამგებელმა და ამავდროულად საფეხბურთო კლუბ "გურიის" პრეზიდენტმა ზაზა ურუშაძემ განაცხადა, რომ კლუბის იურისტებთან საკითხს გაივლის და ამ გადაწყვეტილებას გაასაჩივრებს.
პარასკევს საკრებულოს სხდომაზე მან დაადასტურა, რომ სპორტული დავების განმსაზღვრელი არბიტრაჟის გადაწყვეტილებას არ ცნობს და მის გასაჩივრებას მართლაც აპირებს.
"ხელების ჩამოშვებას და თავის დანებებას ნამდვილად არ ვაპირებთ. ფეხბურთის ფედერაციის საქციელი უკვე ყველა საზღვრებს გასცდა და იმასაც ვნახავ, ვინ მოიგებს და ვინ – წააგებს. არსებობს ზემდგომი ინსტანცია, სადაც კანონის ფარგლებში გავასაჩივრებთ და ვინმეს თუ ჰგონია ეს ფული ჯიბეში აქვს უკვე, მწარედ ცდება" – განაცხადა გამგებელმა.
აღნიშნულთან დაკავშირებით კომენტარი ვთხოვეთ, აღნიშნული არბიტრაჟის ხელმძღვანელს ჯაბა მუჯირს, რომელმაც ზაზა ურუშაძეს უპასუხა, რომ მას გასაჩივრების ბერკეტი ფაქტობრივად არ გააჩნია.
"არბიტრაჟის დებულებაში შავით თეთრზე წერია, რომ გადაწყვეტილება საბოლოოა და გასაჩივრებას არ ექვემდებარება. მე არ ვიცი ეს ადამიანი როგორ იცნობს საქართველოს ფეხბურთის ფედერაციის წესდებას, რადგან როცა გუნდი ჩემპიონატში მონაწილეობს, ის უკვე გაცნობილია არბიტრაჟის მოთხოვნებს და ხელიც აქვს მოწერილი თანხმობის ნიშნად. ასე რომ პატივცემული გამგებლის მცდელობა ამაოა. სპორტული დავის სამოქალაქოში გადატანის პრეცენდენტი ერთ – ერთ კლუბს ჰქონდა და სააპელაციო სასამართლოდან უარიც მიიღო" – განაცხადა მუჯირმა.
ზაზა ურუშაძეს იმედი აქვს, რომ ფეხბურთის ფედერაციის შემადგენლობა ოქტომბრიდან შეიცვლება და "გურიას" ყოფილი მწვრთნელებისთვის გადასახდელი თანხაც მოეხსნება. ამ მოსაზრებას კატეგორიულად არ იზიარებს არბიტრაჟის ხელმძღვანელი.
"ვინც არ უნდა მოვიდეს, გამორიცხულია ამ თანხების გადახდის ვალდებულება ვინმეს ეპატიოს. ახალი ფედერაციაც უბრალოდ ვალდებული იქნება, ნებისმიერი კანონიერი ბერკეტი გამოიყენოს და ეს საქმე აღასრულოს. სხვაგვარად გამორიცხულია" – დასძინა ჯაბა მუჯირმა.
კონტრაქტით გათვალისწინებულ თანხებს ელოდება კლუბის ყოფილი მთავარი მწვრთნელი, თემურ ლორია, რომელიც კუთვნილი თანხის ვერმიღებას უბრალოდ გამორიცხავს.
"სად უნდა იჩივლოს ზაზა ურუშაძემ უეფა – ში თუ ფიფა – ში? სხვა გზა არაა და მას თუ ეს შეუძლია, რაღაც არ მგონია. მას ისიც ეგონა ლიცენზირების ჯარიმას არ გადაიხდიდა, მაგრამ კოვზი ნაცარში ჩაუვარდა.
ყველაფერს აკეთებს ეს თანხა დროულად რომ წარადგინოს ფედერაციაში. ასე რომ იგივე ელის ამ შემთხვევაშიც და ტყუილად ნუ ირჯება ამ საუბრებით – განაცხადა ლორიამ.
