თურქეთის ქალაქ არხავში დასრულდა ევრაზიის პირველობა კარატეში, რომელიც სამი დღის მანძილზე გრძელდებოდა. მასში თურქეთის, სომხეთის, აზერბაიჯანის, რუსეთისა და ყაზახეთის გუნდებთან ერთად ქართველი სპორტსმენებიც მონაწილეობდნენ. ლანჩხუთს 12 კარატისტი წარმოადგენდა და მათ საერთო ჯამში 19(!) მედალი აიღეს _ 10 პირველი ადგილი, 3 _ მეორე და 6 _ მესამე. შეგახსენებთ, რომ მერაბ თურქიას შეგირდებმა გასულ წელს ევროპის ჩემპიონობაც მოიპოვეს. თურქეთში დასრულებულ შეჯიბრზე კი ბატონი მერაბი დააჯილდოვეს, როგორც ტურნირის ერთ-ერთი საუკეთესო მსაჯი.
რაც შეეხება ჩვენებურთა ტრიუმფს, 12-ივე მათგანმა წარმატებას მიაღწია და მედალს დაეუფლა _ 7-8-წლიანებში მესამე ადგილზე გავიდა დათო დუმბაძე, 9 წლის კარატისტებში კი როგორც სპორტულ, ასევე კონტაქტურ ორთაბრძოლაში პირველობა არავის დაუთმო გიორგი ჩხაიძემ. მასავით 2 პირველი ადგილი მოიპოვა თანატოლმა გიორგი ზენაიშვილმა, ოღონდ სხვა წონით კატეგორიაში. ერთი წლით უფროსებში კონტაქტურ კარატეში ონისე ცინცაძე პირველი იყო, ხოლო სპორტულში _ მესამეს დასჯერდა. 11 წლის კარატისტებში საბა გოგოძემ ორივე სახეობაში მეორე ადგილი დაიკავა. გასული წლის საუკეთესო კარატისტი, 12 წლის გიორგი კეჭახმაძე კონტაქტურ კარატეშიც პირველი იყო და სპორტულშიც. მასზე ერთი წლით უფროსებში დავით წილოსანმა 2 პირველი ადგილი მოიპოვა. 13-წლიანებში ბაჩუკი დუმბაძე მესამეზე გავიდა, თორნიკე ცინცაძემ სპორტულ კარატეში მეორე ადგილი მოიპოვა, კონტაქტურში კი _ მესამე. 16-17-წლიანებში შალვა ჩხაიძე მესამე ადგილს დაჯერდა.
გოგონებში წარმატებას მიაღწია ნანა ჩხაიძემ _ 13-წლამდელებში იგი ჩემპიონი გახდა, ხოლო ქეთევან გოგიჩაიშვილი მესამე ადგილზე გავიდა. დათო და ბაჩუკი დუმბაძეებს მანუჩარ ჩხაიძე წვრთნის, გიორგი ზენაიშვილს _ ლაშა ბერიძე, ხოლო ყველა დანარჩენი სპორტსმენის მწვრთნელი მერაბ თურქია გახლავთ.
