14 ივლისს, ნოდარ დუმბაძის დაბადების დღესასთან დაკავშირებით საქართველოს კულტურისა და ძეგლთა დაცვის მინისტრი მიხეილ გიორგაძე ჩოხატაურს ეწვევა. კულტურის მინისტრის ნოდარ დუმბაძის სახლ-მუზეუმში ფილმის "მე, ბაბუა, ილიკო და ილარიონი" ჩვენებას დაესწრება (რეჟისორი ლევან მაჭარაშვილი, პროდიუსერი ქეთი დუმბაძე).
საქართველოს კულტურისა და ძეგლთა დაცვის სამინისტროს მხარდაჭერით, ნოდარ დუმბაძის სახლ-მუზეუმს ლიტერატურულ-საგანმანათლებლო პროექტის "ცოცხალი წიგნების" ფარგლებში, თანამედროვე ქართველი მწერლების 5 კაციანი მობილური ჯგუფიც ეწვევა და ადგილობრივ მკითხველთან შეხვედრას გამართავს. ჯგუფის შემადგენლობაში არიან: გივი ალხაზიშვილი, ლელა სამნიაშვილი, ანდრო ბუაჩიძე, რეზო გეთიაშვილი, ეკა ქევანიშვილი. მეგობარი მწერლის სტატუსით ღონისძებას ირმა შიოლაშვილიც დაესწრება.
"ცოცხალი წიგნები" საქართველოს კულტურისა და ძეგლთა დაცვის სამინისტროს ლიტერატურულ-საგანმანათლებლო პროექტია და გულისხმობს საქართველოს სხვადასხვა რეგიონის სოფლებისა და ქალაქების საჯარო სკოლებში, ბიბლიოთეკებში, მუზეუმებში, კულტურის სახლებსა და სხვა საჯარო დაწესებულებებში თანამედროვე მწერლების სტუმრობას და მკითხველთან შეხვედრას. პროექტის ფარგლებში ეწყობა პოეზიის საღამოები და იმართება დისკუსიები ადგილობრივ მოსახლეობასთან მათთვის საინტერესო თემებზე.
მწერლები სტუმრობენ რეგიონის საპატიო, ხანდაზმულ, შეზღუდული შესაძლებლობის მქონე პირებს, ბავშვთა სახლებს, საჯარისო-სამხედრო ნაწილებს, სასჯელაღსრულებით დაწესებულებებს. შეხვედრები იმართება არაქართულენოვან მოსახლეობასთანაც. რეგიონებში ვიზიტისას, მწერლები ასევე ზრუნავენ ნიჭიერი ადგილობრივი შემოქმედების გამოვლენაზე.
პროექტში აქტიურად არის ჩართული საგამომცემლო სექტორიც. ეწყობა ლოკალური წიგნის ბაზრობები – მწერლები თავად გვევლინებიან გამავრცელებლების როლში. თავიანთ საავტორო წიგნებთან ერთად, ისინი პოპულარიზაციას უწევენ კოლეგების შემოქმედებასაც. რეგიონებში ვიზიტის პერიოდში, მწერლები აწარმოებენ დღიურებს და ჩანაწერებს, რომლის მიხედვითაც, პროექტის დასრულების შემდეგ გამოიცემა წიგნი "მწერლის დღიურები".
