ლანჩხუთის მუნიციპალიტეტის გამგეობის ინფორმაციით, რამდენიმე დღეში ლევან სამხარაულის სახელობის ექსპერტიზის ბიუროსგან ოფიციალურად გახდება ცნობილი, რა გახდა სოფელ მამათის ადმინისტრაციულ ერთეულში ექსპლუატაციაში გასვლიდან მალევე ხიდის ჩანგრევის მიზეზი.
საქმე ისაა, რომ გამგეობის მიერ გავრცელებული ინფორმაციის თანახმად, 2012 წლის სამ აგვისტოს მუნიციპალიტეტის მაშინდელ გამგებელ გია გოგუაძესა და შპს "გუმბათი 7"-ს შორის გაფორმდა ხელშეკრულება, რომლის თანახმადაც ეს უკანასკნელი იღებდა ვალდებულებას მამათში მდინარე სუფსაზე სახიდე გადასასვლელის მშენებლობის სამუსაოები შეესრულებინა.
2013 წლის სამ იანვარს გამგეობის ინსპექტირების ჯგუფმა და მაშინ გამგებლის მოვალეობის შემსრულებელმა კახა ასკურავამ "გუმბათი 7"-სგან შესრულებული სამუშაოები ჩაიბარა და შესაბამისად მიღება-ჩაბარების აქტიც გაფორმდა.
თუმცა მუნიციპალიტეტის გამგეობა, მამათის ადმინისტრაციულ ერთეულში გამგებლის წარმომადგენელზე, გელა პატეიშვილზე დაყრდნობით აცხადებს, რომ ხიდი ექსპლუატაციაში გასვლისთანავე წყალმა წაიღო.
"სუფსას პერიოდულად მოვარდნები ახასიათებს. ვერ გაუძლო წყალდიდობას ხიდმა და ჩაინგრა. ეს ხიდი წინა ხელისუფლების დროს გაკეთდა და ექვს თვეში ჩაინგრა, საფეხმავლო იყო. მოსახლეობას არ შეეძლო მოსავალი ხიდით გადმოეტანა, ურიკითაც ვერ ისარგებლებდნენ, რადგან კიბეები აქვს", – განაცხადა პატეიშვილმა.
გამგებლის წარმომადგენლის ნათქვამს ადასტურებენ ადგილობრივი მაცხოვრებლებიც, რომელთა თქმითაც, რადგან საყანე ფართობები მდინარე სუფსის გაღმაა, ძალიან ჭირს მოსავლის სახლამდე მიტანა და ხიდის აუცილობლობაც ამით იყო გამოწვეული. 2012 წელს მაშინდელმა ხელისუფლებამ ხიდი აღადგინა, თუმცა მალევე გამოვიდა მწყობრიდან.
იმაში გასარკვევად თუ რა იყო ხიდის დანგრევის მიზეზი, მუნიციპალიტეტის გამგეობამ მიმდინარე წლის 26 მარტს ლევან სამხარაულის სახელობის ექსპერტიზის ეროვნული ბიუროს დასავლეთ საქართველოს რეგიონალური ექსპერტიზის დეპარტამენტის უფროსს, კობა ახვლედიანს მიმართა.
"გთხოვთ ექსპერტიზა ჩაუტაროთ მამათის ადმინისტრაციულ ერთეულში, სოფელ მამათში მდინარე სუფსაზე სახიდე გადასასვლელის მშენებლობის სამუშაოების ტექნიკურ დოკუმენტაციას და შესრულებულ სამუშაოს და მოგვცეთ ექსპერტიზის დასკვნა შემდეგ საკითხზე: დადგინდეს სახიდე გადასასვლელის ჩანგრევის მიზეზი – ხიდის მწყობრიდან გამოსვლა დაკავშირებულია პროექტის ხარვეზთან, გამოწვეულია შემსრულებლის მიერ სამუშაოების წარმოებისას ნორმების დარღვევით თუ ამის მიზეზი სხვა გარე ფაქტორების ზემოქმედებაა" – ნათქვამია გამგეობის მიერ გაგზავნილ წერილში.
აღნიშნულ საკითხთან დაკავშირებით კომენტარი ვთხოვეთ კახა ასკურავას, რომელმაც თავის დროზე ჩაიბარა შპს "გუმბათი 7"-ის მიერ შესრულებული სამუშაოები.
"როცა გამგებლის მოვალეობის შესრულებას შევუდექი, ეს ფირმა უკვე ტენდერში გამარჯვებული დამხვდა. რაც შეეხება მიღება -ჩაბარების აქტს, როცა მას ხელს ვაწერდი, წარმომიდგინეს პროექტის ზედამხედველის, ინსპექტირების ჯგუფის და ფარული სამუშაოების აქტის დასკვნები. ვიცოდი, რომ მოსახლეობისთვის დიდ პრობლემას წარმოადგენდა საყანე ფართობებამდე მისვლა და კარგად მახსოვს, როგორ უმძიმეს სიტუაციაში მომიწია სამუშაოების განხორციელება, თუმცა მიუხედავად ყველაფრისა, მაინც ბოლომდე მივიყვანე ყველაფერი, რადგან კარგად მესმოდა, რომ იქაური მოსახლეობისთვის ეს მეტად მნიშვნელოვანი საქმე იყო.
თანამდებობა 2013 წლის 29 იანვარს დავტოვე. როგორც გამგეობის მიერაა ნათქვამი, ხიდი ექვსი თვის შემდეგ ჩავარდა. შესაბამისად, რადგან ექსპლუატაციის ვადები არ იქნებოდა გასული, გამგეობას ხარვეზის გამოსასწორებლად უნდა მიემართა სამუშაოების შემსრულებელი ფირმისთვის. რამდენადაც ვიცი მიმართა კიდეც, თუმცა, სამხარაულის ექსპერტიზის ბიუროს დასკვნით, რადგან სტიქია და ფორსმაჟორი იყო, პროექტის შემსრულებელს არ დაეკისრა ხელმეორედ სამუშაოების შესრულება.
სხვათა შორის, იგივე წარმატებით წავიკითხავდი გამგეობის მიერ ნიგვზიანში გაბიონის დაშლის მიზეზების დადგენის მიზეზს, რომელიც ორჯერ გაკეთდა და თანხაც ორმაგი გაიხარჯა. როგორც წესი, ამ ხელისუფლების ყველა შტოს სტილია საკუთარი შეცდომების არ დანახვა, ან სხვისთვის გადაბრალება" – განაცხადა ასკურავამ.
