ოზურგეთის მუნიციპალიტეტის საკრებულოს 2012 წლის 18 იანვრის Ж1 დადგენილება “საქართველოს საკანონმდებლო მაცნეს” ოფიციალურ ვებგვერდზე 31 იანვარს გამოქვეყნდა.
როგორც ირკვევა, ოზურგეთის მუნიციპალიტეტის საკრებულომ, 2012 წლის დამტკიცებულ ბიუჯეტში ცვლილებები შეიტანა _ ოფიციალური დოკუმენტის თანახმად, ცნობილი გახდა, რომ ოზურგეთის მუნიციპალიტეტში 1 509 ადამიანია დასაქმებული. როგორც ოზურგეთის მუნიციპალიტეტის საკრებულოს საფინანსო საბიუჯეტო კომისიის თავმჯდომარემ, კობა ხაბალაშვილმა გაგვიმარტა, ამ მონაცემებში, გარდა წარმომადგენლობით და აღმასრულებელ ორგანოში დასაქმებულთა რიცხოვნობისა, ოზურგეთის მუნიციპალიტეტის საკრებულოს მიერ დაფუძნებულ არაკომერციულ არამომგებიან იურიდიულ პირებში დასაქმებულთა რაოდენობაც შედის.
1 მილიონ 262 ათას 500 ლარი მხოლოდ საკრებულოში დასაქმებულ _ 31, გამგეობაში დასაქმებულ _ 189, საგანგებო სიტუაციათა საქალაქო სამსახურის _ 27 და სამხედრო აღრიცხვის, გაწვევისა და მობილიზაციის სამსახურის _ 9 თანამშრომლის სახელფასო ფონდია.
თუ გასულ წელს, წარმომადგენლობით და აღმასრულებელ ორგანოებში 238 ადამიანი იყო დასაქმებული, წელს მათი რაოდენობა ერთი ათეულით გაიზარდა და 248 შეადგინა. 2011 წელს, მათი მხოლოდ ხელფასით უზრუნველყოფა ბიუჯეტს 1 მილიონ 680 ათას 300 ლარი უჯდებოდა. წელს ამ მიმართულებით 1 მილიონ 690 ათას 500 ლარი დაიხარჯება. საკრებულოში დასაქმებულ 31 ადამიანის წლიური სახელფასო ფონდი 248 ათას 500 ლარს შეადგენს, ხოლო გამგეობაში დასაქმებულ 189 ადამიანზე 821 ათასი ლარი მხოლოდ ხელფასის გასაცემად დაიხარჯება. გამგეობაში გასულ წელს 179 ადამიანი იყო დასაქმებული და შესაბამისად, სახელფასო ფონდი 813 ათასი ლარით იყო განსაზღვრული, წელს კი 189 თანამშრომლის ხელფასით უზრუნველყოფა ბიუჯეტს 821 ათასი ლარი დაუჯდება.
საკრებულოს თანამშრომელთა ხარჯები 12 თვეში ასე გამოიყურება: სახელფასო ფონდის გარდა, ხარჯი 500 700 ლარია. აქედან, პრემია 15 ათასი ლარი უნდა გაიცეს, მივლინებებში კი 8 ათასი ლარი უნდა დაიხარჯოს; ოფისის ხარჯები 139 ათასი ლარით განისაზღვრა, მათ შორის საკანცელარიო საქონლის შესაძენად 5 000 ლარი გამოყვეს. მცირეფასიანი საოფისე ტექნიკის შეძენა-დამონტაჟების ხარჯი კი _ 8 300 ლარია, კარტრიჯების შეძენა და დატუმბვა 3 000 ლარით განსაზღვრეს, სხვა მცირეფასიანი საოფისე ტექნიკის შეძენასა და დამონტაჟებასთან დაკავშირებული ხარჯი კი 5 300 ლარს შეადგენს; შენობა-ნაგებობის მიმდინარე რემონტის ხარჯისთვის 2 000 ლარი გამოიყო; კავშირგაბმულობის ხარჯი 34 700 ლარით განისაზღვრა, საფოსტო მომსახურების ხარჯმა კი _ 500 ლარი შეადგინა; ბუნებრივი და თხევადი აირის ხარჯი 3 000 ლარია; ტრანსპორტისა და ტექნიკის ექსპლოატაციის და მოვლა-შენახვის ხარჯებისთვის სულ 54 400 ლარი გაითვალისწინეს, კონკრეტულად კი საწვავ-საპოხი მასალების შეძენისთვის _ 50 900 ლარი, სათადარიგო ნაწილების შესაძენად კი 3500 ლარი გამოყვეს. მუხლი _ “სხვა ხარჯები” _ 19 600 ლარით განისაზღვრა; არაფინანსური აქტივების ზრდა 6 000 ლარია, კომპიუტერის შეძენა _ 4 600 ლარი, სხვა მანქანა-დანადგარები და ინვენტარის შეძენა, რომელიც არ არის კლასიფიცირებული, 1 400 ლარი.
გამგეობის ხარჯები ასე გამოიყურება: ხარჯები _ 1 მილიონ 930 ათას 100 ლარი. მათ შორის _ შრომის ანაზღაურება 821 ათასი ლარი; საპრემიო ფონდი 0 თეთრით არის განსაზღვრული, ხოლო საქონელი და მომსახურება _ 267 ათასი ლარით; შტატგარეშე მომუშავეთა ანაზღაურებისთვის 25 000 ლარი დაიხარჯება; მივლინებები ქვეყნის შიგნით _ 8 300 ლარი, მივლინება ქვეყნის გარეთ _ 2 400 ლარი; ოფისის ხარჯებზე კი 114 400 ლარია გამოყოფილი _ მასში შედის საკანცელარიო საქონლის შეძენა _ 19 500 ლარი. გასულ წელს საკანცელარიო ნივთების შესაძენად 10 300 ლარი დაიხარჯა; ნორმატიული აქტების, საცნობარო და სპეციალური ლიტერატურის, ჟურნალ-გაზეთის შეძენა და ამავე მიზნებთან დაკავშირებული საგამომცემლო-სასტამბო (არაძირითადი საქმიანობის) ხარჯები 4 800 ლარია; მცირეფასიანი საოფისე ტექნიკის შეძენა და დამონტაჟების ხარჯი 2011 წელს 26 300 ლარი იყო, წელს კი მხოლოდ 1 900 ლარით არის განსაზღვრული; კარტრიჯების შეძენა და დატუმბვისთვის წელს 1 900 ლარი გამოყვეს, რაც გასულ წელთან შედარებით 2 900 ლარით ნაკლებია; საოფისე ინვენტარის შეძენა-დამონტაჟების ხარჯები ასე გამოიყურება _ 33 100 ლარი; შენობა-ნაგებობის მიმდინარე რემონტის ხარჯისთვის 6 500 ლარია გათვალისწინებული; კავშირგაბმულობის ხარჯი 41 800 ლარს შეადგენს, საფოსტო მომსახურების კი _ 1 200 ლარს; წყლის ხარჯისთვის 3 000 ლარი გამოყვეს, ბუნებრივი და თხევადი აირის ხარჯი კი 2 000 ლარით განსაზღვრეს. ასტრონომიული თანხები ჩაიდო ტრანსპორტისა და ტექნიკის ექსპლოატაციის და მოვლა-შენახვის ხარჯებისთვის _ თუ ამ მიმართულებით გასული წლის ბიუჯეტი 49 700 ლარს ითვალისწინებდა, წელს ეს თანხა 8 ათასი ლარით გაიზარდა და 57 900 ლარი შეადგინა; მანქანა დანადგარების და ინვენტარის შესაძენად მიმდინარე წლის ბიუჯეტიდან 43 100 ლარია გათვალისწინებული, კომპიუტერების შესაძენად კი _ 17 800 ლარი.
