დაბა ჩოხატაურში, ოზურგეთის მუნიციპალიტეტის სოფელ ბახვში და ვანის მუნიციპალიტეტის სოფელ ციხესულორში საფეხბურთო ტექნიკური ცენტრებისა და ხელოვნურსაფარიანი სტადიონების მშენებლობის სამუშაოების შესრულების სახელმწიფო შესყიდვის შესახებ გამოცხადებული ელექტრონული ტენდერი აუქციონის გარეშე შპს “საბა კონტრაქშენმა” მოიგო.
ინფორმაციისთვის, ტენდერი მუნიციპალური განვითარების ფონდმა 9 ოქტომბერს გამოაცხადა. წინადადებების მიღება 5 ნოემბერს დაიწყო და 10 ნოემბერს შეწყდა. ამ დროისთვის ხელშეკრულება უკვე გაფორმებულია და სამუშაოების დასრულების ვადა 2029 წლის 31 მარტამდეა განსაზღვრული (აღნიშნული პროექტი მოიცავს 2 თვე პროექტირებას, 9 თვე მშენებლობას და 1 თვე ექსპლუატაციაში შეყვანას და 2029 წლამდე ობიექტის მოვლა-პატრონობას).
“მთლიანი სახელშეკრულებო ღირებულება, მომსახურების გაწევასთან და სამუშაოების შესრულებასთან დაკავშირებული ყველა ხარჯისა და მიმწოდებლისათვის კანონმდებლობით გათვალისწინებული ყველა გადასახადის ჩათვლით შეადგენს 13,977,777.00 (ცამეტი მილიონ ცხრაას სამოცდაჩვიდმეტი ათას შვიდას სამოცდაჩვიდმეტი) ლარს“, _ წერია ხელშეკრულებაში.
ინფორმაციისთვის, ჩოხატაურსა და ოზურგეთში უნდა აშენდეს ახალი საფეხბურთო ტექნიკური ცენტრი და ხელოვნურსაფარიანი სტადიონი, რომელსაც 300-300 მაყურებელზე გათვლილი ტრიბუნა და შესაბამისი ინფრასტრუქტურა (გასახდელები, სველი წერტილები, დაცვის ჯიხური და სხვა) ექნება.
მომსახურება/სამუშაოები ყველა სამშენებლო ობიექტზე უნდა წარიმართოს პარალელურ რეჟიმში და დასრულდეს ხელშეკრულების გაფორმების თარიღიდან არაუმეტეს 12 (თორმეტი) კალენდარულ თვეში.
“მომსახურების გაწევის და სამუშაოების შესრულების საერთო ვადა: 12 (თორმეტი) თვე ხელშეკრულების გაფორმების თარიღიდან, აქედან:
I ეტაპი (2 თვე) _ საფეხბურთო ტექნიკური ცენტრისა და სტადიონის ტიპიური პროექტის კორექტირება, მოცემულ სამშენებლო ტერიტორიაზე მიბმა და მშენებლობის ნებართვის მიღება;
II ეტაპი (9 თვე) _ სამშენებლო სამუშაოების განხორციელება;
ხელშეკრულების გაფორმების თარიღიდან II ეტაპის დაწყებამდე შემსყიდველი მიმწოდებელს განუსაზღვრავს სამუშაოთა განხორციელების ქვე–ეტაპებს.
III ეტაპი (1 თვე) _ საფეხბურთო ტექნიკური ცენტრისა და ხელოვნურსაფარიანი სტადიონის ექსპლუატაციაში მიღება.
რაც შეეხება სამუშაოების მეთვალყურეობას, მიმწოდებელი II ეტაპით გასახორციელებელ სამშენებლო სამუშაოებს დაიწყებს შემსყიდველის მიერ შესაბამისი შეტყობინების მიღების შემდეგ“, _ წერია დოკუმენტში.
დღეის მდგომარეობით, შპს” საბა კონსტრაქშენს” 192 ტენდერში აქვს მონაწილეობა მიღებული,საიდანაც 87 მოიგო, 9 არ შედგა, 6 მიმდინარეა, ხოლო 90 ტენდერი წააგო. მოგებული კონტრაქტების საერთო ღირებულება 1 455 280 191.88 ლარს შეადგენს. გარდა ამისა, 11 გამარტივებული შესყიდვის ხელშეკრულებების საერთო ღირებულება 94 587 576. 73 ლარია.
ინფორმაციისთვის, ამ კომპანიამ დაასრულა გურიაში ყოფილი პრემიერის, ირაკლი ღარიბაშვილის მიერ ინიცირებულ პროგრამა “განახლებულ რეგიონების” ფარგლებში ინფრასტრუქტურული სამუშაოები.
ირაკლი ღარიბაშვილის ინიციატივით დაწყებული პროგრამის _ “განახლებული რეგიონები”, ხიბლი ის იყო, რომ საბჭოთა ერთფეროვნებით აღბეჭდილი, ერთმანეთისგან არაფრით განსხვავებული მუნიციპალური ცენტრებისთვის ახალი სიცოცხლე შთაებერა, მათთვის უნიკალურობა მიენიჭებინა და თითოეულის თვითმყოფადობა გამოეკვეთა.
“4-წლიანი პროგრამა, რომელიც საქართველოს 63 მუნიციპალიტეტს მოიცავს და მისი მხოლოდ პირველი ეტაპის საორიენტაციო ღირებულება 500 მილიონი ლარია, ითვალისწინებს რეგიონების ურბანულ განახლებას, რაც სახელმწიფოს, მუნიციპალიტეტის და კერძო საკუთრებაში არსებული მნიშვნელოვანი ობიექტის განვითარებას გულისხმობს“, _ ოფიციალურად აცხადებდა მთავრობა.
ოზურგეთში, 2021 წლის 8 მაისს გამართულ სხდომაზე გადაწყდა, რომ “განახლებული რეგიონების” ფარგლებში, ოზურგეთის მუნიციპალიტეტში რეაბილიტაცია ჩაუტარდებოდა კულტურისა და დასვენების პარკს და მის მიმდებარე ტერიტორიას.
ჩოხატაურში ცენტრალური მოედანი მოეწყობოდა და დუმბაძის ქუჩა მოწესრიგდებოდა, ხოლო ლანჩხუთში კი _ ცენტრალური მოედანი, ცენტრალური პარკი და საავტომობილო მაგისტრალიდან ლანჩხუთში შესასვლელი კვანძის მიმდებარე ტერიტორია.
თავდაპირველად გამოცხადებული ტენდერის გამარჯვებული შპს “აღმაშენებელი ქუთაისი” გახდა, თუმცა, სამუშაოების დასრულება მან დროულად ვერ შეძლო. არაერთხელ აყრილი და თავიდან დაგებული ფილების და რეგიონში პრემიერ ღარიბაშვილის სტუმრობის შემდეგ მალევე კომპანიის სახელზე ყადაღა დაფიქსირდა. კომპანიას, როგორც ჩანს, ფინანსური პრობლემაც წარმოეშვა და ობიექტებზე მომუშავე თითო-ოროლა კინკილა მუშახელიც გაექცა. საბოლოოდ კი მისი დაწყებული საქმე შპს “საბა კონსტრაქშენმა” დაასრულა.
თუმცა, “დაასრულა” ხმამაღლა ნათქვამია _ დაბა ჩოხატაურში, დუმბაძის ქუჩაზე, “აღმაშენებელი ქუთაისის” მიერ არაერთხელ აყრილ-დაყრილ ფილებზე სეზონზე ამოსულ ბალახს ისევ ებრძვიან… გარდა ამისა, ბოძების, ფანჯრების, ღიობების შესაფუთად გამოყენებული ფენოპლასტი არავის გამოუცვლია _ იგი მალევე დაზიანდა; მავნებელი აზბესტიც ასევე ფენოპლასტით შეფუთეს და ასე დამალეს. დუმბაძის 25-ში მდებარე “გურია ნიუსის” რედაქციის ეზოს მის საკუთრებაში არსებული ღობე და ჭიშკარი მოუხსნეს ახლის გაკეთების მოტივით, თუმცა, “აღმაშენებელი ქუთაისმა” მხოლოდ წინა ღობის გაკეთება მოახერხა, ჭიშკრის და გვერდითი ღობეების _ ვერა. ამ პრობლემის აღმოსაფხვრელად “საბა კონსტრაქშენმა” თავი არ შეიწუხა _ “გურია ნიუსის” კითხვაზე, რატომ არ ასრულებდა სამუშაოებს, კომპანიაში გვიპასუხეს, რომ ჭიშკარს და გვერდითა ღობეებს იმ შემთხვევაში გააკეთებდნენ, თუ ამას მერია სთხოვდა, მერია კი ამბობდა, რომ ეს მისი საქმე არ იყო. ასეა თუ ისე, “გურია ნიუსის” რედაქციის ეზო სამი წელია, პირუტყვის სადგომადაა ქცეული.
ცნობისთვის, აღნიშნულ კომპანიას აქვს შესრულებული სამუშაოები “განახლებული რეგიონების” ფარგლებში ტყიბულის მუნიციპალიტეტშიც, იქ კომპანიამ საქმიანობა 2021 წელს დაიწყო და 2023 წელს დაასრულა. თუმცა, მედიაში გავრცელებული ინფორმაციით, სამუშაოების დასრულების შემდეგ ადგილობრივებს საერთო საწუხარი ჰქონდათ: კორპუსების კედლებში, გარედან შეფუთვის შემდეგ, წყალი ჟონავდა და ბინებში ავეჯსა და რემონტს აზიანებდა.
“აიფაქტი“ 2024 წლის 16 დეკემბერს გამოქვეყნებულ სტატიაში წერს:
“კომპანია შპს “საბა კონსტრაქშენი” 2012 წელს ბიძაშვილებმა _ მალხაზ და სლავა შერაზადიშვილებმა სამშენებლო საქმიანობისთვის დააარსეს. 2013 წელს სახელმწიფო ტენდერებშიც დაიწყეს მონაწილეობა.
კომპანიამ 1.4 მილიონ ლარის პირველივე ტენდერი ისე მოიგო, რომ მანამდე ტენდერში მონაწილეობის გამოცდილება არ ჰქონია. სამუშაოების დამკვეთი “საგანმანათლებლო და სამეცნიერო ინფრასტრუქტურის განვითარების სააგენტო” იყო, რომელმაც კომპანიას მცხეთასა და ქარელში ორი სკოლის აშენება დაავალა. სამუშაოების გამოცდილებად კომპანიამ მხოლოდ ერთი _ სასტუმრო “ჯინო ველნესის” სამშენებლო სარემონტო სამუშაოები წარადგინა.
ახლა კომპანიის მფლობელი შპს “საბა ინვესტია“, რომელსაც სლავა შერაზადიშვილი ფლობს. შერაზადიშვილი ქარელიდანაა. შიდა ქართლში მოქმედი ადგილობრივი მედია “მოზაიკა” არჩევნებამდე წერდა, რომ შერაზადიშვილი “ოცნების” ხმების მოსაზიდად ათიათასობით ლარს ხარჯავდა ქარელში.
“ფულის დარიგების გარდა, წინასაარჩევნო პერიოდში სლავა შერაზადიშვილი აფინანსებდა სხვადასხვა ღონისძიებებს, რომელთა მიზანი “ქართული ოცნების” სასარგებლო აგიტაცია და მოქალაქეთა მხარდაჭერის მოპოვება იყო. მაგალითად, წინასაარჩევნო პერიოდში, 13 სექტემბერს მისი დაფინანსებით ჩატარდა სოფელ ძლევიჯვარში ჭიდაობის ტურნირი, სადაც საპრიზო ფონდი 175.000 ლარი იყო. მანვე დააფინანსა ტურნირის შემდეგ გამართული “ღამის შოუს ბენდის” კონცერტიც. არჩევნებამდე სამი კვირით ადრე კი, “ერისიონის” და “რეზო და ბავშვების” კონცერტი ჩაატარა აგარაში. მუსიკალური ღონისძიების სავარაუდო ხარჯი 40 000 ლარია“, _ წერს “მოზაიკა“.
შერაზადაშვილის გარდა, “საბა კონსტრაქშენთან” ირიბად დაკავშირებულია “ოცნებასთან” დაახლოებული კიდევ ერთი ბიზნესმენი _ გიორგი კაპანაძე, იგივე “რიჟა“. აი, როგორ: 2013 წლიდან დღემდე “საბა კონსტრაქშენის” დირექტორია ლევან თარგამაძე, რომელიც ასევე ხელმძღვანელობდა გიორგი კაპანაძის ბიზნესს _ სს “რეალ ინვესტს“.
ბიზნესმენი გიორგი კაპანაძე მედიისა და საზოგადოების ყურადღების ცენტრში გიგი უგულავას დაპატიმრებისას მოექცა _ ის “ოცნების” “ოქროს მოწმე” იყო თბილისის ყოფილი მერის საქმეში. 2014 წლის ივლისში უგულავა და მისი ქვისლი სწორედ კაპანაძის ჩვენებებისა და მისი დახმარებით მოპოვებული ფარული ვიდეოჩანაწერების შედეგად აღმოჩნდნენ ციხეში.
გიორგი კაპანაძე წარმატებულ და სააკაშვილის ხელისუფლებასთან დაახლოებულ ბიზნესმენად იყო ცნობილი “ნაციონალური მოძრაობის” ხელისუფლებაში ყოფნის დროსაც, თუმცა, 2014 წელს “ტელეიმედისთვის” მიცემულ ინტერვიუში თქვა, რომ “ნაციონალური მოძრაობის” მთავრობასთან თანამშრომლობა იძულებასა და დაშინებაზე იყო დამყარებული.
ახლა პირდაპირი გზით, პოლიტიკური შეწირულობის სახით არც კაპანაძე სწირავს “ოცნებას” ფულს და არც შერაზადიშვილი. თუმცა, მედიის ცნობით, შერაზადაშვილი “ოცნებისთვის” საჭირო აქტივობებს თავად აფინანსებს.
ამ კავშირებით შეიძლება აიხსნებოდეს ის, რომ კომპანია ხშირად უკონკურენტოდ ან კონკურენტის დისკვალიფიკაციის ხარჯზე იგებს მრავალმილიონიან ტენდერებს“, _ წერია “აიფაქტის”სტატიაში.
როგორც “ტენდერმონიტორსის” ვებგვერდზე არსებული მონაცემებიდან ირკვევა, ამ ეტაპზე, შპს “საბა კონსტრაქშენს” მოგებული აქვს ჩხოროწყუს მუნიციპალიტეტის სოფელ ხაბუმეში, ქალაქ აბაშასა და მარტვილის მუნიციპალიტეტის სოფელ სერგიეთში საფეხბურთო ტექნიკური ცენტრებისა და ხელოვნურსაფარიანი სტადიონების მშენებლობის სამუშაოების შესრულების სახელმწიფო შესყიდვა. შესყიდვის სავარაუდო ღირებულება 15 632 114 ლარია. და ტენდერი ხელშეკრულების გაფორმების პროცესშია.
გარდა ამისა, მას 20 ივნისს მოგებული აქვს ქობულეთის მუნიციპალიტეტში, ჩამდინარე წყლის არხების შესყიდვის ტენდერი. შესყიდვის სავარაუდო ღირებულება 24 500 ლარი იყო. ამ დროისთვის ხელშეკრულების სტატუსია _ “შესრულებულია”.
გარდა ამისა, “საბა კონსტრაქშენმა” წელს მოიგო შპს “ბათუმის წყალის” გამოცხადებული ტენდერიც. ამ დროისთვის ხელშეკრულება შესრულებულია.
მან წელსვე მოიგო თბილისის მერიის გამოცხადებული ტენდერიც, რომლის სავარაუდო შესყიდვის ღირებულებაც 4,749,657 ლარი იყო და ვარკეთილი-3, 3 მ/რ. კორპ. 319-ის მიმდებარედ, 180-ე საჯარო სკოლასთან (ს/კ 01.19.39.010.066) “მრავალფუნქციური საზოგადოებრივი ცენტრის” შენობის სარემონტო სამუშაოების პროექტირება-მშენებლობას ითვალისწინებდა. სატენდერო დოკუმენტაციის თანახმად, სამუშაოები 2029 წელს უნდა დასრულდეს.
ავტორი
