2012 წელს გურიაში უკვე მეოთხედ მოვიდა თოვლი და უკვე მეოთხედ, ხელისუფლებამ პრობლემების თავიდან აცილება ვერ შეძლო _ ისევ გაუწმენდავია გზები, ისევ შეფერხებით ხდება ელექტროენერგიის მიწოდება გურიის სამივე მუნიციპალიტეტში.
8 თებერვალს, ჩოხატაურის-საჯავახოს გზა მთელი დღის განმავლობაში გაუწმენდავი იყო. შპს "გზამშენი 18"-ის წარმომადგენლები გვიმტკიცებდნენ, რომ გზა დილით გაიწმინდა, თუმცა, არც დილით და არც საღამოთი გზა გაწმენდილი არ იყო. როგორც მეგზევეებმა გვითხრეს, მუშაობა დილიდან დაიწყეს, თუმცა, გადაუღებელი თოვის გამო სრულად გაწმენდა ვერ ხდება. ამას ისიც დაემატა, რომ "გზამშენი 18"-ის ტექნიკა ბურნათის გზაზე გაფუჭდა.
8 თებერვლის საღამოს, ამ გზაზე, დაახლოებით 15 სამარშრუტო მიკროავტობუსი იყო გაჩერებული, პრობლემები ჰქონდა მსუბუქ ავტომობილებსაც. შპს "ამხანაგობის" ორი ტრაქტორი ბუქსირით ცდილობდა ავტომანქანების და სამარშრუტო ტაქსების ამოყვანას, თუმცა, დახმარება იმდენად ბევრს სჭირდებოდა, რომ ორი ტრაქტორი, ამას ვერ ახერხებდა. მოგვიანებით სამაშველო სამუშაოებში "გზამშენი 18"-ის უფროსის მოადგილე ჩაერთო, რომელიც საკუთარი მანქანით ცდილობდა თოვლში ჩავარდნილი ავტომანქანების ამოყვანას.
ყველაზე ოპერატიულად ბურნათის მოსახლეობა მუშაობდა _ თითქმის მთელი სოფელი გზაზე იყო გამოსული და შიშველი ხელებით ცდილობდნენ მგზავრების დახმარებას. "გურია ნიუსი" ბურნათის გზაზე თითქმის სამი საათის განმავლობაში იმყოფებოდა და განვითარებულ მოვლენებს აკვირდებოდა. ამ დროის განმავლობაში იქ ადგილობრივი ხელისუფლების არც ერთი წარმომადგენელი არ გამოჩენილა, ხალხი კი დახმარებას ითხოვდა.
_ ყველას ჰყავს ჯიპები და ისეთი ავტომანქანები, რომ აქამდე თავისუფლად მოვიდნენ. რომ იძახიან ხალხის სამსახურში ვართო, გამოუშვან საკუთარი მანქანები, რომელიც ასევე ხალხის ფულით არის ნაყიდი და ამ ადამიანებს, სახლამდე მისვლაში დაეხმარონ, _ გვითხრა ერთ-ერთმა მგზავრმა.
როგორც გავიგეთ, დიდთოვლობის გამო პრობლემები ჰქონდა ჩოხატაურის მუნიციპალიტეტის ბევრ სოფელს, სადაც გზები მთელი დღის განმავლობაში გაუწმენდავი იყო. პრობლემა შეიქმნა ლანჩხუთი-საჯავახოს გზაზე, სადაც ტრანზიტული მოძრაობაა და ამიტომ, "გზამშენი 18"-ის ტექნიკა ხელისუფლებამ იქ გააგზავნა. როგორც აღნიშნული კომპანიის ხელმძღვანელმა, თემურ ჯახვამ გვითხრა, ლანჩხუთი-საჯავახოს გზაზე თოვლის საფარი ძალიან დიდია, თოვა არ ჩერდება და სამუშაოებს ძლიერი ყინვაც უშლის ხელს.
გურიაში წუხელაც თოვდა. ამ დილით რამდენიმე სოფელში ისევ გაუწმენდავია გზა და ელექტროენერგიის მიწოდება ისევ შეფერხებით ხორციელდება.
