ნიკო ფიროსმანაშვილის ცნობილი ნამუშევარი "არსენალის მთა ღამით"რომელიც 2015 წლის 1 ივნისს მეცენატმა ბიძინა ივანიშვილმა Christie’s-ის აუქციონზე შეიძინა, მფლობელის გადაწყვეტილებით, საჩუქრად საქართველოს გადაეცა.
დადგენილი პროცედურების გავლის შემდეგ შედევრი საქართველოს ეროვნული მუზეუმის შალვა ამირანაშვილის სახელობის ხელოვნების მუზეუმის ახალი და თანამედროვე ქართული ფერწერის ფონდში ჩაირიცხა, რომელშიც ნიკო ფიროსმანაშვილის ნამუშევრების ყველაზე დიდ კოლექციაა დაცული.
საქართველოს კულტურისა და ძეგლთა დაცვის სამინისტროსა და საქართველოს ეროვნული მუზეუმის ადმინისტრაციის გადაწყვეტილებით თავდაპირველად "არსენალის მთა ღამით" დიმიტრი შევარდნაძის სახელობის ეროვნულ გალერეაში ნიკო ფიროსმანის სხვა ნამუშევრების გვერდით გამოიფინება. აღსანიშნავია, რომ ეს სურათი თბილისში ერთადერთხელ, 1919 წელს, ამავე საექსპოზიციო სივრცეში ქართველი მხატვრების დიდ გამოფენაზე იყო წარმოდგენილი. 96 წლის შემდეგ ის კვლავ ქვეყანას დაუბრუნდა.
2015 წლის 21 ივლისიდან, მთელი კვირის განმავლობაში, ეროვნულ გალერეაში შესვლა თავისუფალი იქნება და ნებისმიერ მსურველს საშუალება ექნება იხილოს ხალხისთვის მიძღვნილი საჩუქარი.
ნიკო ფიროსმანაშვილმა "არსენალის მთა ღამით" 1900-იან წლებში, ნიკო ბაიაძის დუქნისთვის დახატა. მოგვიანებით, კოლაუ ჩერნიაევსკის მიერ მოძიებული ეს სურათი, მოსკოვში, კირილ ზდანევიჩის კოლექციაში აღმოჩნდა.
ზდანევიჩის კოლექციიდან, 1957 წელს "არსენალის მთა" საბჭოთა მთავრობამ შეიძინა და ფრანგ პოეტს, ლუი არაგონს 60 წლის იუბილეზე საჩუქრად გადასცა. საფრანგეთში გადატანის შემდეგ, სურათის პირველი ვიდეოკადრები, რეზო თაბუკაშვილმა დოკუმენტურ ფილმზე "ფურცლები ფრანგული დღიურიდან" მუშაობისას 1983 წელს გადაიღო არაგონის სახლში.
ლუი არაგონისა და მისი მეუღლის, ელზა ტრიოლეს გარდაცვალების შემდეგ, სურათი მათი მემკვიდრის, ჟან რისტას მფლობელობაში გადავიდა.
2015 წლის 1 ივნისს Christie's-ის აუქციონზე მეცენატმა ბიძინა ივანიშვილმა შეიძინა.
მფლობელის გადაწყვეტილებით "არსენალის მთა ღამით" საქართველოს ეროვნულ მუზეუმს გადმოეცემა საჩუქრად და შალვა ამირანაშვილის სახელობის ხელოვნების მუზეუმის კოლექციებს გაამდიდრებს. ათწლეულების შემდეგ, საქართველოს მოქალაქეებს და ქვეყნის სტუმრებს სურათის ნახვის საშუალება მიეცემათ. აქამდე "არსენალის მთა ღამით" თბილისში მხოლოდ ერთხელ, 1919 წელს, ახლანდელ ეროვნულ გალერეაში ქართველი მხატვრების გამოფენაზე იყო ექსპონირებული.
