ლანჩხუთის მუნიციპალიტეტის საკრებულოში მორიგი სხდომა გაიმართა. განიხილეს 18 საკითხი და თითქმის ყველა ხმის უმრავლესობით მიიღეს. სხდომა საკმაოდ ცივ დარბაზში ჩატარდა და, ალბათ, სიცივის გამო, დეპუტატები აქტიურობით არ გამოირჩეოდნენ.
ლანჩხუთის გამგეობის მუნიციპალიტეტში შეიქმნა სოფლის მეურნეობის განვითარების სამსახური და აუცილებელი გახდა მუნიციპალიტეტის ბიუჯეტში ცვლილებების შეტანა. აღნიშნული სამსახურის თანამშრომლების ხელფასით უზრუნველყოფისთვის (სამი თანამშრომლის) ბიუჯეტს დაემატა 4 000 ლარი.
ასევე, გაიზარდა სკოლამდელი დაწესებულებებისთვის გამოყოფილი თანხა, რამაც 64 ათას 605 ლარი შეადგინა. აქედან, 44 ათასი ლარი პედაგოგთა დაზღვევისთვისაა განსაზღვრული. საკრებულოს თავმჯდომარის, რევაზ ჩიტიძის განმარტებით, ამ ცვლილებებში რამდენიმე კარგი ტენდენციაა: _ კარგია, რომ შეიქმნა ახალი სამსახური, რაც აუცილებელია სოფლის მეურნეობის განვითარებისთვის. მისასალმებელია ის ფაქტიც, რომ სახელმწიფო მოხელეთა ხელფასების გაცემა მოწესრიგდა. რწმუნებულებს შეეცვალათ სახელი და მათ მუნიციპალიტეტის ტერიტორიული ერთეულის ხელმძღვანელი დაერქვათ, ხელფასები კი 700 ლარით განესაზღვრათ. საუბარი იყო სოფლების საბავშვო ბაღებში საფასურის 15 ლარამდე გაზრდაზეც, მაგრამ ჩვენ ვიმსჯელეთ და გადასახადი ისევ ათი ლარი დავტოვეთ. 22 ათასი ლარი გამოყოფილია სტიქიით დაზარალებულთა დახმარებისთვის. მართალია, ეს თანხა მათ ყველა პრობლემას ვერ გადაუჭრის, მაგრამ ნაწილობრივ დახმარებას შევძლებთ. ინფრასტრუქრტურული სამუშაოებისთვის გამოყოფილია 940 ათასი ლარი, ხოლო სოფლის პროგრამებისთვის _ 833 ათასი, _ თქვა ჩიტიძემ.
სხდომაზე განიხილეს ლანჩხუთის მუნიციპალიტეტის ჯუნეწრის ტერიტორიულ ერთეულში ქუჩების სახელწოდებებისა და ნუმერაციის მინიჭების საკითხი. ჯუნეწერში არსებულ 4 ქუჩას ეწოდა სამოქალაქო ომში დაღუპული ჟურნალისტის, დავით ბოლქვაძის, წმინდა ლაზარეს, ჯაბელისა და პროფესორ სერგო ბარამიძის სახელები.
საკრებულოს ოპოზიციონერი დეპუტატი, მაკა კვირკველია დაინტერესდა, რატომ გაეზარდათ სოფლის რწმუნებულებს ხელფასები და რატომ აჭარბებს მათი შემოსავლები მნიშვნელოვნად საკრებულოს მაჟორიტარი დეპუტატების და კომისიის თავმჯდომარეების ხელფასებს.
საკრებულოს თავმჯდომარემ განმარტა, რომ ორგანულ კანონში არის ჩანაწერი, რომლის მიხედვითაც, დეპუტატი სადეპუტატო მოვალეობას ანაზღაურების გარეშე და ძირითადი სამუშაოდან მოუწყვეტლად ახორციელებს, ხოლო სოფლის რწმუნებულისთვის თავიანთი სამსახური ერთადერთია, და აქედან გამომდინარე, შემოსავლის წყაროც ჴ ერთადერთი: _ მათ მძიმე შრომა უწევთ თავიანთი უფლებამოსილების გასახორციელებლად, ჴ დაამატა საკრებულოს თავმჯდომარემ, მაგრამ, თუ რა იგულისხმება “მძიმე შრომაში”, არ დაუკონკრეტებია.
მაკა კვირკველია კიდევ ერთი საკითხის გარკვევას შეეცადა: _ შეცდომა გვაქვს დაშვებული სოციალური დახმარებების გაცემის საკითხში _ ქალაქის რწმუნებულის თანაშემწემ სოციალური დახმარების სიიდან ამოიღო ოჯახი პირადი დამოკიდებულების მიხედვით. როცა ამ ოჯახის ერთ-ერთი წევრი შეეცადა, გაეგო, თუ რატომ მოხდა ეს, სახელმწიფო მოხელემ უცერემონიოდ განუცხადა, რომ მას ასე მიაჩნია საჭიროდ.
საკრებულოს თავმჯდომარე დაჰპირდა დეპუტატს, რომ ამ საკითხს აუცილებლად გაარკვევდა.
ამ ფაქტის შესახებ, მკითხველს ჩვენს მივაწვდით ინფორმაციას.
