ჩოხატაურში ახალი კულტურის სახლის მშენებლობას საფუძველი ჩაეყარა. მუნიციპალიტეტის გამგებელმა, ირაკლი კუჭავამ და შ.პ.ს. კომპანია "ვექტორის" დირექტორმა სოსო მამულაიშვილმა მშენებლობის ხელშეკრულებას ოფიციალურად ხელი მოაწერეს. ცერემონიას, სახელმწიფო რწმუნებული-გუბერნატორი გურიის მხარეში გია სალუქვაძე, გუბერნატორის მოადგილე სოსო ერქომაიშვილი, ჩოხატაურის მუნიციპალიტეტის მაჟორიტარი დეპუტატი თემურ ჭკუასელი და ადგილობრივი ხელისუფლების სხვა წარმომადგენლები დაესწრნენ. აღნიშნულ ადგილზე კულტურის სახლის მშენებლობა ჯერ კიდევ საბჭოთა ხელისუფლების პერიოდში დაიწყო. წინა ხელისუფლებამ დაუსრულებელი შენობა დაანგრია, მაგრამ ახლის აშენება ვეღარ შეძლო. დღევანდელი ხელისუფლების პერიოდში კი, ახალი კულტურის სახლის მშენებლობას საფუძველი ჩაეყარა, რომელიც მომავალი წლის სექტემბერში დასრულდება. როგორც გია სალუქვაძემ აღნიშნა, ჩოხატაურისთვის ინფრასტრუქტურა პრიორიტეტული მიმართულებაა და ადგილობრივებს აღნიშნული პროექტების დაპირებულ დროში წარმატებით განხორციელების პირობა მისცა. წელს ჩოხატაურის მუნიციპალიტეტში ინფრასტრუქტურული პროექტების განხორციელება სხვადასხვა მიმართულებითაც დაიწყო. დღესვე გუბერნატორმა ადგილობრივი ხელისუფლების წარმომადგენლებთან ერთად ჩოხატაურის მუნიციპალიტეტში მდებარე ის ობიექტები მოინახულა, რომლის სარეაბილიტაციო სამუშაოები აქტიურად მიმდინარეობს.
ამიერიდან ჩოხატაურელები კეთილმოწყობილი აგრარული ბაზრით 2015 წლის ოქტომბრის თვის დასაწყისიდან ისარგებლებენ. ჩოხატაურის აგრარული ბაზრის სარეაბილიტაციო სამუშაოებს, შპს კომპანია "ზაზო" გრაფიკის მიხედვით ასრულებს. ტერიტორიაზე ასფალტის ახალი საფარი დაიგება, მოეწყობა დახლები და როგორც მოვაჭრეებისთვის, ისე მყიდველებისთვის კომფორტული გარემო შეიქმნება.
მხარისა და ადგილობრივი ხელისუფლების წარმომადგენლებმა ასევე მოინახულეს ბორის პაიჭაძის სახელობის განახლებული მუნიციპალური სტადიონი, სამხატვრო გალერიის მშენებლობა და დაბა ჩოხატაურის ქუჩების ( ჩიჩუას, გოგებაშვილის, ჯალაღანიას, ფიროსმანის, გოგიბერიძის) ბეტონის საფარისა და სანიაღვრე არხების მოწყობის სამუშაოები. ახალ გალერეას შპს კომპანია "იმერეთი 2014" ამა წლის სექტემბრის თვეში დაასრულებს.
(R)
