მედიასახლ "გურია ნიუსის" ჩოხატაურის ოფისში, მედიასახლის და გურული ახალგაზრდა მოხალისეების ძალისხმევით, სხვადასხვა ორგანიზაციების, კერძო პირების შემოწირულობებით, 13 ივნისს, თბილისში მომხდარი სტიქიის დროს გარდაცვლილი ივლიტა ჯიბუტის სახელობის ბიბლიოთეკა სიმბოლურად – 19 ივლისს, ივლიტას დაბადების დღეზე გაიხსნა.
ბიბლიოთეკის გახსნას მოქალაქეები, არასამთავრობო ორგანიზაციების, ადგილობრივი თვითმმართველობების, სხვადასხვა ინსტიტუტების წარმომადგენლები დაესწრნენ.
სტუმართა შორის იყვნენ: ივლიტას მამა _ მამა გიორგი (ჯიბუტი) ოჯახის წევრებთან ერთად, განათლებისა და მეცნიერების მინისტრი თამარ სანიკიძე, საქართველოს პრეზიდენტის მრჩეველი ეკონომიკურ საკითხებში გიორგი აბაშიშვილი, რომელიც ივლიტას მაგისტრატურაში ლექციებს უკითხავდა, ივანე ჯავახიშვილის სახელობის თბილისის სახელმწიფო უნივერსიტეტის რექტორი ლადო პაპავა (სწორედ ამ უნივერსიტეტში სწავლობდა ივლიტა და მისი მეგობარი, მასთან ერთად დაღუპული შესანიშნავი ახალგაზრდა _ მარიამ ქუთელია), პარლამენტის წევრი თემურ ჭკუასელი, საქართველოს პარლამენტის წევრი, ოზურგეთის მაჟორიტარი დეპუტატი ზვიად კვაჭანტირაძე, ლანჩხუთის მაჟორიტარი დეპუტატის თემურ ჩხაიძის ბიუროს წარმომადგენლები, საქართველოს პარლამენტის 
ეროვნული ბიბლიოთეკის დირექტორი გიორგი კეკელიძე, ოზურგეთის მუნიციპალიტეტის და ქალაქ ოზურგეთის მერიის პირველი პირები. საქართველოს ყოფილი პრემიერ-მინისტრის, არასამთავრობო ორგანიზაცია "მოქალაქის" დამფუძნებლის ბიძინა ივანიშვილის მოსვლის შემდეგ გახსნის ცერემონიალს შემოუერთდა გურიის გუბერნატორი გია სალუქვაძე, რომელმაც წინა დღეს მოგვიბოდიშა, რომ, კვირას, ბათუმში, პრემიერ მინისტრთან შეხვედრის გამო, გახსნას ვერც თითონ და ვერც მისი პირველი მოადგილე ვერ დაესწრებოდნენ.
აქვე აღვნიშნავთ, რომ 19 ივლისს, პრემიერი თბილისში, ერთ-ერთ ღონისძიებაზე იმყოფებოდა და როგორც მისი პრესსამსახურიდან მოგვწერეს, დიდი სურვილის მიუხედავად, მხოლოდ ამ მიზეზით ვერ შეძლო ჩამოსვლა, თუმცა პირადი საჩუქარი _ წიგნები _ განათლების მინისტრს გამოატანა.
სიმბოლური გახსნის შესაბამისად, დარბაზი კონცეპტუალურად იყო გაფორმებული და ძირითადი მოწყობა _ ავეჯით, შესბამისი ტექნიკით, განათებით აღჭურვა მომავალში უნდა გახორციელდეს. სტუმრები აღაფრთოვანა მოხალისეების _ ჩოხატაურელი ახალგაზრდების და განმახორციელებელი ჯგუფის წევრების თავდადებული შრომის შედეგმა _ უნიკალურმა კედლებმა, ორიგინალურმა ჭერმა, ბრენდირებულმა აქსესუარებმა, ჩანთებმა, ბალიშებმა, წიგნის სანიშნეებმა… ეზოში სტუმრებს ცოცხალი მუსიკით შესანიშნავად უმასპინძლეს მარინა მამალაძემ, ლევან ჩხაიძემ, ვაჟების ანსამბლმა "ამაღლებამ".
ინტერიერს ეზოს გვირილები ამშვენებდა, რომელიც განსაკუთრებით უყვარდა ივლიტას. გახსნის დღეს უწყვეტად მოდიოდნენ მოქალაქეები, არასამთავრობო ორგანიზაციების წარმომადგენლები და საჩუქრად წიგნები მოჰქონდათ. "გურია ნიუსი" სრულად გამოაქვეყნებს იმ მოქალაქეების, ორგანიზაციების ვინაობას, რომლებმაც წიგნები შემოწირეს ბიბლიოთეკას. ეზოში სტუმრების კომფორტისა და გაგრილებისთვის კომპანია "წყალი მარგებელმა" იზრუნა.
ასევე, ასეულობით დასახელების მხატვრული, შემეცნებითი, საბავშვო ლიტერატურა და აუდიო/ვიზუალური მასალა განათლების სამინისტროს თანამშრომლების, ეროვნული ბიბლიოთეკის თანამშრომლების და ქართული გამომცემლობების ძალისხმევით შეგროვდა. ბიბლიოთეკას სკამები და კომპიუტერები გადმოსცა საქართველოს იუსტიციის სამინისტრომ და ყველაფერი იღონა, რომ ჩოხატაურის მუნიციპალიტეტის ხელმძღვანელების დახმარებით, ეს საჩუქარი დროულად- გახსნისთვის ადგილზე ყოფილიყო.
ჩვენ უახლოეს მომავალში სრულად გამოვაქვეყნებთ ერთად თავმოყრილ ინფორმაციას, თუ ვინ და რით დაეხმარა ივლიტას ბიბლიოთეკას.
გახსნის ცერემონიალს "გურია ნიუსის" გამომცემელი ია მამალაძე უძღვებოდა.
სტუმრებმა ივლიტა ჯიბუტის და იმის შესახებ ისაუბრეს, თუ რატომ აირჩიეს ინიციატორებმა 13 ივნისის ტრაგედიის და ივლიტას ხსოვნის უკვდავსაყოფად სწორედ ბიბლიოთეკის დაარსება.
გიორგი აბაშიშვილი: _ ეს არის ინიციატივა, რომელიც მას ყველაზე მეტად მოეწონებოდა. მინდა, რომ წარმატებები გისურვოთ. ვნახე კადრები, რაც მოხალისეების შრომას ასახავს და ესაა ყველაზე მნიშვნელოვანი. დარწმუნებული ვარ, ეს იქნება არამარტო აქ მცხოვრებთა, არამედ სტუმრებისთვისაც საყვარელი ადგილი,. მე შემიძლია დარწმუნებით გითხრათ, რომ როდესაც ჩოხატაურში მომიწევს ყოფნა, ყოველთვის სიამოვნებით მოვინახულებ ამ მშვენიერ ბიბლიოთეკას. ასევე გეტყვით, რომ წიგნის სანიშნი, რომელსაც "ივლიტას ბიბლიოთეკა" აწერია, ჩემთვის იქნება ყოველდღიური ნივთი.
"ჩვენ სიამოვნებით შემოვუერთდით ამ აქციას _ ეს იყო პრემიერ-მინისტრის დიდი სურვილი და პირადი საჩუქარი_ წიგნებიც გამოგვატანა, " _ აღნიშნა განათლების მინისტრმა თამარ სანიკიძემ, რომელმაც ბიბლიოთეკას საჩუქრად ძალიან ბევრი წიგნი და სამომავლოდ თანამშრომლობის სურვილი გადმოსცა.
თბილისის ივანე ჯაახიშვილის სახელობის სახელმწიფო უნივერსიტეტის რექტორმა ლადო პაპავამ ივლიტა ჯიბუტის შესახებ ვრცლად ისაუბრა.მისივე თქმით, თბილისის სტიქიამ სახელმწიფო უნივერსიტეტიც დააზარალა: _ თან პირდაპირი გაგებით _ ჩვენ ორი გოგონა დავკარგეთ _ ივლიტა ჯიბუტი და მარიამ ქუთელია, _ თქვა ლადო პაპავამ და აღნიშნა, რომ უნივერსიტეტი მხოლოდ გახსნისას კი არა, შემდგომშიც მოამარაგებს ივლიტას ბიბლიოთეკას ახალი სამეცნიერო გამოცემებით.
_ ივლიტა ჯიბუტის სახელობის ბიბლიოთეკა ქვეყნის ერთიანობის სიმბოლო გახდა. გარდა წიგნთსაცავისა, მას ახალგაზრდული ცენტრის ფუნქციაც ექნება. მინდა მადლიერება გამოვხატო იმ ადამიანების მიმართ, ვინაც საოცარი ენთუზიაზმი გამოიჩინა და გააგრძელა ის უდიდესი მუხტი, რომელიც თბილისში სტიქიური უბედურების დროს ვერეს ხეობაში დაიბადა. ეს მუხტი პირველებმა გურულებმა აიტაცეს და ივლიტას სახელით გააგრძელეს. ივლიტას ბიბლიოთეკა უნდა გახდეს საქართველოს ყველა რეგიონისა და ქვეყნის გაერთიანების სიმბოლო", _ აღნიშნა თავისი გამოსვლის დროს საქართველოს ყოფილმა პრემიერ-მინისტრმა ბიძინა ივანიშვილმა.
ივლიტას მამამ _ მამა გიორგიმ ყველას მადლობა გადაუხადა და აღნიშნა, რომ "ეს დაფასება, მთელ საქართველოს ეკუთვნის და ეს არის დასტური იმისა, რომ ჩვენ შეგვიძლია ერთმანეთის სიყვარული, ერთმანეთის გვერდში დგომა… "
ეროვნული ბიბლიოთეკის დირექტორმა გიორგი კეკელიძემ ბიბლიოთეკის გახსნის იდეაზე ისაუბრა.
გახსნის კულმინაციად იქცა მომენტი, როცა მედიასახლ "გურია ნიუსის" დამფუძნებელმა ია მამალაძემ საზოგადოებას იმ ადამიანების ნაწილი წარუდგინა, რომლებმაც 25 დღის განმავლობაში ივლიტას ბიბლიოთეკის სარემონტო სამუშაოებში სული, გული და სიყვარული ჩადეს და რომელთა შესახებ „გურია ნიუსი" კიდევ ბევრჯერ მოგიყვებათ.
ივლიტას დაბადების დღეზე, ახალგაზრდების მონდომებით და შრომით ივლიტას ბიბლიოთეკამ სიცოცხლე დაიწყო. ყველაზე რთული ბიბლიოთეკის ისეთ ადგილად გადაქცევაა, სადაც ახალგაზრდებს ცოდნის გაღრმავების, ინტერნეტრესურსთან შეუზღუდავი წვდომის, ღია საზოგადოებაში ინტეგრაციის, ახალ ინიციატივებზე მსჯელობის შესაძლებლობა ექნებათ.
ვიმედოვნებთ, რომ ივლიტას ბიბლიოთეკისთვის გაღებული ძალისხმევით, "ვერეს თაობა" გურიაში სახელმწიფოებრივი იდეების ირგვლივ გაერთიანდა და სიყვარულით თანაცხოვრება დაიწყო. ამ იდეის გარშემო გაერთიანება ისევ გრძელდება.
