10 თებერვალს, ოზურგეთში, დემოკრატიული ჩართულობის ცენტრში, საქართველოს პარლამენტის წევრი, გოჩა შანიძე საზოგადოების წარმომადგენლებს და სოფლების ამბულატორიების ექიმებს შეხვდა.
შანიძემ ისაუბრა ჯანდაცვის დარგში გახორციელებულ პროექტებზე და აღნიშნა, რომ არა ერთი საკანონმდებლო ცვლილება უკავშირდება იმ ფაქტს, რომ ქვეყნის ძირითადი პრიორიტეტია ჯანდაცვის სფერო: _ ამის დასტურია 2012 წლის ბიუჯეტი, სადაც მილიარდ 792 მილიონი _ ბიუჯეტის თითქმის მეოთხედი, ჯანდაცვას მოხმარდება. აქედან, მილიარდ 350 მილიონი იხარჯება მხოლოდ საპენსიო უზრუნველყოფაზე, სახელმწიფოს მიერ დანიშნულ კომპენსაციებსა და სხვა მიმართულებებზე, _ თქვა პარლამენტარმა და დასძინა, რომ პენსიის ზრდასთან დაკავშირებით, როცა მოქალაქეებთან უხდება საუბარი, ჩნდება კითხვა _ რატომ ხდება პენსიის ზრდა სექტემბრიდან და არა 1 იანვრიდან?
შანიძის განმარტებით, ამ რაოდენობის ადამიანებისთვის პენსიის გაცემა, ბიუჯეტში დამატებით ათობით და ასობით მილიონი ლარის მობილიზებას ითვალისწინებს, რისი საშუალებაც ამ წუთში სახელმწიფოს არ აქვს.
პენსიონერები და არამარტო ისინი, კი ფიქრობენ, რომ სასექტემბრო მატება, მოახლოებულ საპარლამენტო არჩევნებს უკავშირდება.
დეპუტატმა, ასევე, ისაუბრა ოზურგეთში “შესანიშნავი სერვისის მქონე” კლინიკური დაწესებულებების გახსნის შესახებ: “მართალია, ძვირად, მაგრამ მოქალაქეებს შეუძლიათ, ადგილზე მიიღონ შესანიშნავი მომსახურება, სიძვირისთვის კი არსებობს დაზღვევის პაკეტი”, _ თქვა შანიძემ, რითაც შეეწინააღმდეგა შეხვედრის დასაწყისშივე თავისსავე თქმულს, რომ სახელმწიფოს პრიორიტეტი ხარისხიანი და ხელმისაწვდომი ჯანდაცვაა, თუმცა, ჯანდაცვა რომ საპენსიო ფონდის დაფინანსება არ არის, მხედველობიდან გამორჩა.
რაც შეეხება დაზღვევას და სოციალურ დახმარებას, სულის შემძვრელი იყო დარბაზში მყოფი ოზურგეთელი ქალბატონის, თინა გოგუაძის განცხადება.
_ ორი შვილი ინვალიდი მყავს, მეუღლე შაქრით არის დაავადებული, მე გულის უკმარისობა მაქვს. მიუხედავად ამისა, სოციალური დახმარება მომიხსნეს, მანქანა გყავთო. როცა მთელი ცხოვრება ორი ინვალიდი შვილი აქეთ-იქით დაგყავს ექიმებთან და სხვის მანქანაში, ბოდიში და შარდავენ, იძულებული ხდები რაღაც დანაზოგით მანქანა იყიდო. რა თქმა უნდა, არა _ ძვირფასი. ადგნენ და დახმარება ამიტომ მომიხსნეს. თუნდაც, კარგი მანქანა მყავდეს, ასეთი ინვალიდების პატრონს დახმარებას არ უნდა მაძლევდნენ?
გოჩა შანიძე ქალბატონ თინას შეჰპირდა, რომ ამ საკითხს შეისწავლის და დაეხმარება, თუმცა, ამ დახმარების გამო, ახალი კანონმდებლობით, შანიძეც და ქალბატონი თინაც, შესაძლოა, 3 წლით დააპატიმრონ.
სოფელ ჭანიეთის სამედიცინო ამბულატორიის ექიმმა, ირმა გორგოშიძემ დეპუტატის წინაშე ორი მტკივნეული პრობლემა დასვა. პირველი _ სოფლების ექიმებს სამედიცინო დაზღვევას შეეხებოდა, მეორე კი გათბობის საკითხს. დეპუტატი ამ პრობლემების გადაჭრაშიც თანადგომას შეჰპირდა სოფლების ექიმებს.
