ლანჩხუთში პოლიტიკური ტემპერატურა ზამთრის ამინდების პირდაპირპროპორციულია და ნულ გრადუსს არ აღემატება _ არ შეინიშნება არანაირი პოლიტიკური აქტივობა, რასაც, ძირითადად, უამინდობას უკავშირებენ.
ჩვენ გადავწყვიტეთ, გაგვეგო, რას საქმიანობენ ლანჩხუთში სხვადასხვა პარტიის ადგილობრივი ორგანიზაციები და მათი ოფისების ძებნას შევუდექით.
“თავისუფალი საქართველოს” ოფისი ადვილი შესამჩნევია, რადგან ქალაქის ცენტრალურ მოედანზეა; “რესპუბლიკელებს” იანვრის ბოლოს დაუცლიათ ძველი შენობა და გაზაფხულამდე არ ელოდებიან სასიკეთო ცვლილებებს; “ახალი მემარჯვენეების” ოფისს საერთოდ ვერ მივაგენით; ბიძინა ივანიშვილის პოლიტიკური მოძრაობა მარტის დასაწყისისთვის გეგმავს რეგიონებში გააქტიურებას და შესაბამისად, ლანჩხუთში აღნიშნული პარტიის ოფისის გახსნას მარტისთვის უნდა ველოდოთ..
თბილისის ქუჩაზე, კერძო სახლში, ახლად შექმნილი პოლიტიკური ძალა დაფუძნდა, რომელიც მოსკოვში მცხოვრები, წარმოშობით ქართველი ბიზნესმენის სახელს უკავშირდება, მაგრამ ჯერ არც ამ პარტიის სახელია ცნობილი და არც მის გეგმებზე ვიცით რამე. შტაბ-ბინაში მისულებს გვითხრეს, რომ პარტია ჯერ არ დარეგისტრირებულა, ამიტომ კომენტარსაც რეგისტრაციაში გავლის შემდეგ გავაკეთებთო.
“თავისუფალი საქართველოს” რაიონული ორგანიზაციის თავმჯდომარე, მაკა კვირკველია ოპოზიციონერი დეპუტატი და საკუთარი პარტიის ერთადერთი წარმომადგენელია ლანჩხუთის საკრებულოში. მას არ სურს იმ მიზეზებზე საუბარი, რომელთა გამოც დატოვა კონსერვატიული პარტია და კახა კუკავას ახლად შექმნილ გაერთიანებაში გადავიდა.
მიუხედავად ძალიან ცუდი ამინდისა, კვირკველია ოფისში დაგვხვდა და ჩვენ კითხვებსაც უპასუხა.
_ ამ ეტაპზე გაქვთ თუ არა საკუთარ ამომრჩეველთან აქტიური ურთიერთობა?
_ ოფისი 11-დან 6 საათამდე მუშაობს და კარი ნებისმიერი მომსვლელისთვის ღიაა, მაგრამ ჩემი საქმიანობა, ძირითადად, საკრებულოს უკავშირდება. მთელი საქართველოს მასშტაბით გვქონდა “კარდაკარის” პროგრამა, ხელმოწერებს ვაგროვებდით საპენსიო რეფორმასთან დაკავშირებით. ლანჩხუთში 3 000 ხელმოწერის შეგროვება მოვახერხეთ.
_ არჩევნებისთვის მზადება უკვე დაიწყეთ?
_ “ახალი საქართველო” პოლიტიკური პარტნიორების ძიებაშია. არჩევნებში მონაწილეობას მარტო არ ვაპირებთ. გვაქვს კონსულტაციები სხვადასხვა პოლიტიკურ ძალებთან და როცა ჩამოყალიბების პროცესი დამთავრდება, აქტიურ საარჩევნო სამზადისზე მერე გადავალთ.
სტაჟიანი “რესპუბლიკელი” რომან ბიწაძე ცოტათი განაწყენებული დაგვხვდა “გურია ნიუსში” გასული იმ ინფორმაციის გამო, რომელიც ივანიშვილის პარტიის ადგილობრივი ორგანიზაციის ხელმძღვანელის არჩევას შეეხებოდა. ბატონმა რომანმა კატეგორიულად უარყო ცნობა ლანჩხუთში კანდიდატურების შერჩევაზე: _ ამომრჩეველთან ურთიერთობა, შიდაპარტიული მუშაობა, მომავალში პარტიული გაერთიანების ჩამოყალიბება დამოკიდებულია ოფისის არსებობაზე. იანვრის ბოლოს ჩვენ დავტოვეთ ძველი ოფისი, რადგან გადაწყდა, რომ ივანიშვილის გარშემო შექმნილი კოალიციისთვის ლანჩხუთში უნდა გამოიძებნოს დიდი სამუშაო ფართი. შევარჩიე რამდენიმე სავარაუდო ვარიანტი. თბილისიდან ჩამოვიდნენ სამივე პოლიტიკური ძალის წარმომადგენლები, წაიღეს ფოტოსურათები და ალბათ, რომელიმე მათგანზე შეჯერდებიან. თებერვლის ბოლოს ან მარტის დასაწყისში ოფისის პრობლემა საბოლოოდ მოგვარდება. შემდეგ გადავალთ უფრო მასშტაბურ მუშაობაზე. “რესპუბლიკელების” ოფისში მოდიოდნენ ადამიანები, რომლებიც გამოთქვამდნენ სურვილს, გაწევრიანებულიყვნენ ბიძინა ივანიშვილის პოლიტიკურ გაერთიანებაში. დავიტოვეთ მათი კოორდინატები და როცა ლანჩხუთში საბოლოოდ ჩამოყალიბდება ახალი პარტიული სტრუქტურა, ამ ადამიანებს ჩავაყენებთ საქმის კურსში. ადგილობრივ პრესაში გამოქვეყნებული ინფორმაციები ივანიშვილის პარტიის სავარაუდო კანდიდატების შესახებ სრული აბსურდია. როცა დამთავრდება კოალიციის ფორმირება, სამივე სუბიექტს ექნება სრული უფლება, შესთავაზოს პარტნიორ პოლიტიკურ ორგანიზაციებს თავიანთი კანდიდატურები.
დანამდვილებით შემიძლია გითხრათ, რომ რესპუბლიკელები ლანჩხუთის დეპუტატობის მაჟორიტარ კანდიდატად ჩემს კანდიდატურას დაასახელებენ.
იმედი ვიქონიოთ, რომ გაზაფხულის მოსვლასთან ერთად ლანჩხუთელი პოლიტიკოსებიც გამოვლენ ზამთრის ძილიდან და უფრო აქტიურად დაუპირისპირდებიან უმოქმედობას, სახელისუფლებო პროპაგანდას და საყოველთაო ნიჰილიზმს.
