ოზურგეთის მუნიციპალიტეტის სოფელ სილაურში მცხოვრებ 85 წლის ნევრო დარჩიას ერთადერთი საარსებო წყარო _ კუთვნილი პენსია 100%-ით მეორედ შეუჩერდა. “გურია ნიუსი” ამ ფაქტის შესახებ ერთხელ უკვე წერდა. თუმცა, ნევრო დარჩიას წინა შემთხვევაში ყადაღა მალევე მოეხსნა, ახლა კი საქმე უფრო მეტად გართულდა. მოხუცი პენსიონერი “გურია ნიუსის” ოზურგეთის განყოფილებაში მოვიდა და დახმარება გვთხოვა.
_ მივედი იანვრის პენსიის ასაღებად და “ლიბერთი ბანკის” თანამშრომლებმა ნითხრეს, პენსიას ვერ მიიღებთ, საგადასახადოდან ინკასო გადევთო. ჩემი ერთადერთი შემოსავლის წყარო, ერთადერთი საარსებო, პენსია 100-% ით შემიჩერეს. ჩემი სოფლის რწმუნებულმა მითხრა, რომ გუბერნატორი მიმიღებდა და შესაბამისად, დამეხმარებოდნენ. შევხვდი გუბერნატორის მოადგილეს, ლაშა შაფაქიძეს, რომელმაც ჩემთან ერთად დაუძახა იურისტს და სთხოვა ამ საქმეში გარკვევა. ამის შემდეგ დიდი დრო გავიდა, თუმცა, შედეგი ჯერ არ ჩანს. ძალიან მიჭირს. მოხუცებული ვარ, სად შემიძლია ყავარჯნით ხელში, სოფლიდან ვიარო? მატარებენ ზევით-ქვევით, საგადასახადოშიც რამდენჯერმე ვიყავი. დღეს რაღაც საბუთზე ხელი მომაწერინეს, არ ვიცი რაზე, _ ამბობს ნევრო დარჩია.
გუბერნატორის მოადგილე, ლაშა შაფაქიძე “გურია ნიუსთან” სატელეფონო საუბარში აღნიშნავს, რომ მან ნევრო დარჩიას სათანადო დახმარება გაუწია.
_ ბატონო ლაშა, რა დახმარება გაუწიეთ პენსიონერს?
_ შევახვედრე იურისტს.
_ დახმარება ამით შემოიფარგლა?
_ დიახ, ჩვენ მეტი ამ ეტაპზე არაფერი შეგვიძლია. ეს თემა იურისტმა უნდა შეისწავლოს.
სასჯელაღსრულების, პრობაციის და იურიდიული დახმარების სამინისტროს ოზურგეთის საკონსულტაციო ცენტრის ხელმძღვანელი, იურისტი იამზე მემარნიშვილი “გურია ნიუსთან” საუბარში აღნიშნავს, რომ კანონით დაუშვებელია პენსიონერს 100 %-ით შეუჩერდეს კუთვნილი პენსია: _ პენსიის დაკავება შესაძლებელია მხოლოდ 20%-ით და ისიც სასამართლო გადაწყვეტილების შემდეგ. ეს ფაქტი არის საგადასახადო სამსახურის თვითნებური გადაწყვეტილება _ მას არ ჰქონდა ამის უფლება. როგორც ვიცი, ასეთი ფაქტები ხშირია, რის უფლებაც არავის აქვს. გვაჩვენონ კანონი, სადაც წერია, რომ მათ აქვთ ამის უფლება. პენსიონერების უფლებები და ინტერესები დაცული უნდა იყოს.
ფინანსთა სამინისტროს შემოსავლების სამსახურის მომსახურების დეპარტამენტის სერვისცენტრის ოფიცერი ია სალუქვაძე ამბობს, რომ ნევრო დარჩიას ანგარიშზე ინკასო უკვე მოხსნილია.
_ მას 2008 წლამდე ერიცხება მიწის გადასახადი. იჯარის ხელშეკრულება გაუუქმდა 2008 წელს, რის შემდეგაც მასზე არაფერი არ არის დარიცხული.
_ რამდენად კანონიერია საგადასახადო სამსახურის ქმედება ამ კონკრეტული ფაქტის შემთხვევაში?
_ ინკასო მას უკვე მოხსნილი აქვს. ჩვენ ამის დასტურად შეგვიძლია დარჩიას ოფიციალურად ამონაწერი მივცეთ. აი, ახლა ვნახეთ კიდეც, რომ მას უკვე ინკასო აღარ უჩანს.
_ გიმეორებთ კითხვას _ საგადასახადო სამსახურს ინკასოს დადების უფლება ჰქონდა?
_ რა თქმა უნდა. საგადასახადო სამსახურს აქვს უფლება, თუ დავალიანება არსებობს, საბანკო ანგარიშს ინკასო დაადოს. თუ მოქალაქის შემოსავალი არის პენსია, ვაწერინებთ განცხადებას და ინკასოს მალევე ვუხსნით.
“გურია ნიუსი” ამ ფაქტის შესახებ გასული წლის ზაფხულშიც წერდა: ნევრო დარჩია “გურია ნიუსთან” საუბარში ჰყვებოდა, რომ ბახმაროში ალპურ საძოვარზე მიწის ფართობს ჩოხატაურის გამგეობასთან გაფორმებული იჯარით სამი წელი სარგებლობდა, იხდიდა გადასახადს, რომლის დამადასტურებელი ქვითრებიც აქვს. მერე მიწა სხვას მისცეს, გადასახადის გადახდა კი მას მოსთხოვეს _ პენსიასაც ამიტომ უყადაღებენ.
_ მიბარებს მიწის მართვის სამმართველოს მაშინდელი უფროსი ნოდარ ტაკიძე და მეუბნება, შენ შეცდომით გაქვს გაფორმებული ეგ ფართობი, ჩოხატაურს არ ჰქონდა უფლება იჯარა გაეფორმებინა, ეს მიწა ოზურგეთის საკუთრებაა და ჩამოგართვესო. ეს იყო 2000 წლის ბოლოს. ამის შემდეგ, 2001 წელს, გაზაფხულზე, დავწერე განცხადება ოზურგეთის გამგებლის სახელზე, რომელმაც დამიბარა და ტაკიძეს ჰკითხა, რაში იყო საქმე. მან დაუდასტურა, რომ მიწა უკვე სხვისთვის იყო გადაცემული. მე რა გიყო, უკვე სხვაზე გადაუფორმებიათ, ვეღარაფერს დაგეხმარებიო, _ მითხრა გამგებელმა. რა ვიცოდი, ათი წლის მერე რა მოხდებოდა? სოფლის გამგებელს ვუთხარი, იჯარა შემიჩერეს, მიწა სხვას გადაუფორმეს-მეთქი. მან მითხრა, დოკუმენტები მისთვის მიმეცა და საჩივარს შეიტანდა შესაბამის ორგანოებში. ასეც მოიქცა, თუმცა ვერაფერს გახდა, _ ამბობდა 84 წლის მარტოხელა პენსიონერი.
მისი თქმით, 2010 წელს, საგადასახადო სამსახურიდან გაფრთხილება მიიღო, მიწის გადასახადი გადაუხდელი გაქვს და უნდა გადაიხადოო. დარჩიას შედარების აქტი გადასცეს, რომლის მიხედვითაც მას 750 ლარის ოდენობის დავალიანების გადახდა აკისრია. როგორც თავად ამბობდა, ოზურგეთის მუნიციპალიტეტის ყოფილმა გამგებელმა გია ტაკიძემ ადვოკატებთან მისვლა ურჩია.
ოზურგეთის მუნიციპალიტეტის გამგეობის მიწის მართვის სამსახურის თანამშრომელი თამაზ ცერცვაძე “გურია ნიუსთან” საუბარში ამბობდა, რომ აღნიშნულ საკითხს კარგად იცნობს:
_ თავის დროზე, მე მას გავუგზავნე მიწერილობა, დავუზუსტე ყველაფერი და ვუთხარი სასწრაფოდ წასულიყო ჩოხატაურში.
მე მოწმე არ ვარ, მაგრამ ვიცი, რომ ეს ასეც მოხდა. ნამდვილად ვიცი, რომ იჯარით აღებული მიწა სხვას გადასცეს, მაგრამ ეს ჩემი მუშაობის დროს არც გაცემულია და არც გაყიდული. ერთადერთი გამოსავალი არის, მიმართოს სასამართლოს და მე ამ სიტყვებს სასამართლოზეც ვიტყვი.
ოზურგეთის მუნიციპალიტეტის გამგეობის ეკონომიკისა და ინფრასტრუქტურის სამსახურის მთავარი სპეციალისტი, ომარ ჩხარტიშვილი “გურია ნიუსთან” საუბარში აღნიშნავს, რომ საკითხი სასამართლოს წესით უნდა გადაწყდეს, რადგან დაშვებულია გარკვეული შეცდომები.
