ოზურგეთის მუნიციპალიტეტის საკრებულოს სხდომაზე ოზურგეთის მუნიციპალიტეტის დროშა და გერბი ოფიციალურად დაამტკიცეს. დროშის და გერბის ავტორი მირიან კიკნაძეა, რომელიც სხდომას სპეციალურად დაესწრო.
გერბის ფარი გაკვეთილია და იყოფა 3 ( სამ ) ნაწილად. I ნაწილი – მეწამულ ველზე ვერცხლის ჰერალდიკური ჯვარი; II ნაწილი – ზურმუხტის ველზე ვერცხლის ხე გარსშემოხვეული ოქროს ვაზით, რომელსაც აქვს ოქროს მტევნები და ფოთლები. III ნაწილი – შავი ველი (სიმაღლით ფარის 1:3), რომელსაც ზემოდან გასდევს ტალღოვანი სარტყელი; გერბის ფარს ზემოთ მოთავსებულია საქალაქო ვერცხლის გვირგვინი – სამკოშკიანი ქონგურებიანი გალავანი (ციხე-სიმაგრის ფორმის) ნახევრად ღია კარიბჭით. ფარს ქვემოთ მოთავსებულია გერბის დევიზის ვერცხლ-მეწამული ბაფთა, რომლის ვერცხლის ველზე შავით ჩაწერილია გერბის დევიზი "ოზურგეთი".
დროშა – დროშა გაყოფილია ვერტიკალურად ორ მეწამულ და მწვანე ველებად. კომპოზიციის ცენტრში გამოსახულია თეთრი ჰერალდიკური ჯვარი, სიმაღლით დროშის ½; დროშის პროპორციებია: 2:3.
"დღეს არის მნიშვნელოვანი დღე. დარწმუნებული ვარ, 5 აგვისტო არამარტო ამ დროშისა და გერბის დამტკიცების დღეა, არამედ დაიწყება ახალი ფურცელი ჩვენი ქვეყნის ისტორიაში და ოზურგეთის მუნიციპალიტეტი იქნება ყველაფრით გამორჩეული, თავისი ინოვაციებით და ერთიანობით, ხალხზე ორიენტირებული. დღეს შემთხვევით არ გვესწრება ორი ახალგაზრდა ნინო ქანთარია და გიორგი მეგრელაძე, რომლებიც არიან დაბა ლაითურის და ჯუმათის მკვიდრნი. ისინი წარმატებულები არიან. სწორედ ეს ორი ახალგაზრდა აღმართავს სიმბოლურად დღეს დროშას." _ თქვა ოზურგეთის მუნიციპალიტეტის საკრებულოს თავმჯდომარის მოადგილემ დიმიტრი კვერღელიძემ.
ოზურგეთის მუნიციპალიტეტის საკრებულოს თავმჯდომარემ, დავით დარჩიამ საკრებულოს სხდომაზე დროშის და გერბის ავტორს, ამირან კიკნაძეს 3 000 ლარის გადაცემის დამადასტურებელი საბუთი გადასცა.
ოზურგეთის მუნიციპალიტეტის გამგებელმა მერაბ ჭანუყვაძემ სიტყვით გამოსვლისისას თქვა, რომ დღევანდელი დღე არის ისტორიული.
"ეს დღე საწყისი იყოს ჩვენი მუნიციპალიტეტის წარმატებების, ჩვენი ამომრჩევლების კეთილდღეობის და რაც ჩემთვის ძალიან მნიშვნელოვანია, ჩვენ განსაკუთრებული ერთობის." _ თქვა მერაბ ჭანუყვაძემ.
ახალ დროშას და გერბს მხარი დარბაზში მყოფმა ყველა დეპუტატმა დაუჭირია. სხდომის შემდეგ ნინო ქანთარიამ და გიორგი მეგრელაძემ ადმინისტრაციული შენობის წინ აღმართეს ოზურგეთის მუნიციპალიტეტის დროშა.
დროშის აღმართვის შემდეგ საკრებულოს სხდომა გაგრძელდა, რომელსაც დეპუტატეტის ერთი ნაწილი, გაურკვეველი მიზეზების გამო, აღარ დაესწრო. დროშასა და გერბზე კი საუბარი კვლავ გაგრძელდა.
დეპუტატ ბიძინა ლომჯარიას თქმით: "ჭამა მადაში მოდის". რადგან გერბი და დროშა გვაქვს, ახლა ჰიმნის შექმნაზე გამოვაცხადოთ კონკურსი".
დეპუტატი ნუგზარ კალანდარიშვილი ახალი გერბის და დროშის დამტკიცების ერთი ჭიქით აღნიშვნის მომხრეა.
5 აგვისტოს საკრებულოს სხდომაზე 6 საკითხი იყო გამოტანილი და სხდომა მალე დასრულდა.
