საქართველო, ალბათ, ერთადერთი ქვეყანაა მსოფლიოში, რომლის მოსახლეობა ჰაერში ფულს იხდის. ოღონდ, არაოფიციალურად _ რეალურად, ეს გადასახადი "გაერთიანებული წყალმომარაგების კომპანიის" ქვითრებზეა ასახული.
ამ ფაქტს ბევრი ვიდეომასალაც მოწმობს _ ჩოხატაურელი გურამ ბერძენიშვილი ერთ-ერთია იმ მრავალი აბონენტისგან, რომელიც ხელისუფლებას მოუწოდებს, რომ ჰაერში ფული არ გადაგვახდევინოს. უფრო მეტიც, მან ვიდეოექსპერიმენტი ფეისბუქის საკუთარ გვერდზე გამოაქვეყნდა.
ვიდეომასალაში კარგად ჩანს, რომ მრიცხველში შეერთებულ წყლის მილში წყალი არ მოდის, თუმცა, მრიცხველი ბრუნავს და შესაბამისად, თანხაც იწერება.
ამის შესახებ ჩოხატაურელები ჯერ კიდევ გასული წლის მიწურულს საუბრობდნენ:
_ წყლის მოსვლამდე, დაახლოებით, ნახევარი საათის განმავლობაში, ონკანებში ჰაერი მოდის, რაც მრიცხველის ჩვენებაზე აისახება _ ფაქტობრივად, ჰაერში ვიხდით ფულს! _ ამბობდნენ 2014 წლის ნოემბერში ჩვენთან საუბარისას ბენდელიანის ქუჩის მცხოვრებლები, რომლებიც დახმარება ადგილობრივ ხელისუფლებას სთხოვდნენ.
მაშინ, მოსახლეობას გურიის იმჟამინდელი გუბერნატორი გიორგი ჩხაიძე, ჩოხატაურის საკრებულოს თავმჯდომარე ზაალ მამალაძე და გამგებელი ირაკლი კუჭავა შეხვდნენ. ხელისფლების წარმომადგენლებმა მათ დახმარება აღუთქვეს და აღნიშნეს, რომ საკითხს გაერთიანებული წყალმომარაგების კომპანიის წარმომადგენლებთან ერთად გაივლიდნენ.
მას შემდეგ 9 თვე გავიდა, თუმცა, პრობლემა პრობლემად რჩება _ ჩოხატაურელები ამ დროის განმავლობაში ფულს ჰაერში იხდიან,
უფრო მეტი კონკრეტიკისთვის, წყლის მიწოდების გრაფიკი და დარიცხული თანხები შევადარეთ. მაგალითისთვის "გურია ნიუსის" რედაქციის მრიცხველი გამოვიყენეთ.
გაერთიანებული წყალმომარაგების კომპანიის მიერ მოწოდებული ოფიციალური ინფორმაციის თანახმად, იანვარში ჩოხატაურს წყალი 24-საათიანი გრაფიკით მიეწოდებოდა. დეკემბერში წყლის გადასახადმა 17 ლარი და 23 თეთრი შეადგინა; იანვარში, 24-საათიანი გრაფიკის დროს გადასახადი 12 ლარი და 92 თეთრი იყო; თებერვალში, ასევე 24-საათიანი გრაფიკის დროს _ 17 ლარი და 23 თეთრი; მარტში, 24-საათიანი მომარაგების დროს _ 21 ლარი და 54 თეთრი; ასევე უწყვეტი წყალმომარაგების დროს, აპრილში, გადასახადი 17 ლარი და 23 თეთრია; მაისში, 24-საათიანი გრაფიკის დროს _ 21 ლარი და 54 თეთრი; ივნისში, 6-საათიანი მომარაგების დროს _ 21 ლარი და 54 თეთრი; ივლისში კი 4-საათიანი გრაფიკის დროს _ 90 ლარი და 45 თეთრი.
რომ არაფერი ვთქვათ იმ მეტად საეჭვო გარემოებაზე, რომ სამი თვის მანძილზე ზუსტად ერთი და იმავე რაოდენობის წყალს მოვიხმართ და შესაბამისად, ერთნაირი გადასახადი მოდის, გაერთიანებული წყალმომარაგების წარმომადგენელთა არასწორ ქმედებაზე ივლისში მოსული გადასახადიც კმარა _ 4-საათიანი გრაფიკის დროს, რედაქცია, რომელიც წყალს საკმაოდ მცირე რაოდენობით იყენებს, 90 ლარს და 45 თეთრს ვერ დახარჯავდა. ამას ისიც ემატება, რომ ივლისში, ჩვენს ოფისში "ივლიტას ბიბლიოთეკის" სარემონტო სამუშაოები მიმდინარეობდა და 4 დღის განმავლობაში წყლის მილი საერთოდ ჩაჭრილი იყო. სხვა დღეებში კი მოხალისეებს წყლის ბიდონებით მოტანა უხდებოდათ იმის გამო, რომ წყალი არ იყო.
პრობლემის შესახებ წყალმომარაგების კომპანიაც ბევრჯერ ჩავაყენეთ საქმის კურსში, თუმცა, ბევრი ვერაფერი გავარკვიეთ _ მათი თქმით, ხან ჩოხატაურის ცენტრში იყო მილები დაზიანებული, ხან წყლის დებეტი არ იყო საკმარისი _ ერთი სიტყვით, ივლისში, წყალი პრაქტიკულად არ მოსულა, თუმცა, ამას კომპანიისთვის ხელი არ შეუშლია, რომ მაღალი გადასახადი გამოეგზავნა.
მსგავს სიტუაციაშია ბევრი ოჯახი _ მაშინ, როცა გრაფიკით ყველაზე მცირე დროის განმავლობაში მოდის წყალი, გადასახადი ყველაზე მაღალია.
ჩოხატაურის მუნიციპალიტეტის გამგებელი ირაკლი კუჭავა ამბობს, რომ 2014 წელს, მოსახლეობისთვის მიცემული დაპირება შეასრულა და სიტუაციაც გაარკვია:
_ რა თქმა უნდა, გავარკვიეთ, თუმცა, ფიზიკის კანონების ელემენტარული ცოდნა ამის ახსნას იძლევა _ როცა სისტემა იცლება, წყლისა და ჰაერის ხვედრით წონაში სხვაობის გამო, წყლის ხელახლა მიწოდებას, ანუ სისტემის შევსებას წინ უსწრებს ჰაერის ნაკადი და გარკვეულ მომენტში მრიცხველი წყლის მიწოდების გარეშე ტრიალებს. თუ გავითვალისწინებთ იმას, რომ 1კუბური მეტრი ანუ დაახლოებით ერთი ტონა წყლის მოხმარებისთვის გადასახადი 42 თეთრამდეა, მოსახლეობისათვის დანაკარგი თვის განმავლობაში თეთრებია. ეს პრობლემა მოგვარდება, როცა სისტემაში წყალი მუდმივად იქნება. ამისთვის ყველაფერს ვაკეთებთ "გაერთიანებული წყალმომარაგების კომპანიასთან" ერთად, _ აღნიშნავს გამგებელი.
თუმცა, ის, რაც ირაკლი კუჭავასთვის "თეთრების დანაკარგია", ქვითრებზე საკმაოდ სოლიდური თანხებით გამოიხატება და ამის მხოლოდ წერა-კითხვის ცოდნა სჭირდება; ასევე ინტერესიც, რომ მოსახლეობის რამდენიმეთვიან პრეტენზიას, რომელიც ფაქტებიდან გამომდინარე, საფუძვლიანია, პასუხი გასცე.
_ პაპანაქება სიცხეში გადავწყვიტე, გამომეცადა ჩოხატაურში ახლად გაყვანილი წყლის მილები და მრიცხველი, რომელსაც მანამდე არ ვიყენებდი. აღმოვაჩინე, რომ წყლის მაგივრად "ჰაერის გადასახადი" იწერებოდა. აღნიშნული საკითხი დავაყენე ჩოხატაურის წყალმომარაგების წარმომადგენელთან და ავუხსენი მდგომარეობა, მათ კი მიპასუხეს, რომ ეს გამორიცხული იყო და გურული იუმორიც დაამატეს _ პაპანაქება სიცხეში წყალი მიწამ ჩაყლაპაო. ჩაყლაპული წყლის რაოდენობა 3 დღეში მრიცხველის ჩვენებით 4 000 ლიტრი აღმოჩნდა, მე კი ისევ უწყლოდ ვარ და ველოდები, როდის "გარდაიქმნება" ჰაერი წყლად, _ ამბობს გურამ ბერძენიშვილი.
გურამ ბერძენიშვილის არითმეტიკა გამგებლის "თეთრებზე" რომ გადავიყვანოთ, "ჰაერის გადასახადი" სამ დღეში 1 ლარი და 64 თეთრია, თვის მანძილზე კი 16 ლარი და 40 თეთრი. ეს მხოლოდ ერთ ოჯახზე, ასეთები კი, როგორც ბერძენიშვილი ამბობს, ძალიან ბევრია.
რაც შეეხება იურიდიულ პირებს, რომელთა გადასახადი 10-ჯერ მეტია, მათ ჰაერში ერთი თვის მანძილზე 164 ლარის გადახდა მოუწევთ.
გაერთიანებული წყალმომარაგების კომპანიის ოზურგეთის სერვისცენტრის უფროსი დავით ცერცვაძე ამბობს, რომ ჰაერში ფულის გადახდა მოსახლეობას მალე აღარ მოუწევს:
_ ჰაერი ცოტა ღირს ძალიან, _ პრობლემის არსებობას არ უარყოფს ცერცვაძე.
_ ცოტა რამდენია?
_ რა ვიცი _ თვის განმავლობაში რაღაც თეთრებს შეადგენს. ზუსტად მაგას ვერც მე დავთვლი და ვერც ვერავინ… რაღაც რომ არის, ფაქტია.
_ ჩვენ დავთვალეთ, ფაქტებით დავადასტურეთ და მოსახლეობისთვის ეს "თეთრები" თვის განმავლობაში 16 ლარი და 40 თეთრია, იურიდიული პირებისთვის კი ათჯერ მეტი. როდის გახდება ჰაერი უფასო?
_ მალე დავამთავრებ წყლის ამ ავადსახსენებელი სათავის კეთებას და მეც დავისვენებ და მთელი ჩოხატაურიც.
კითხვაზე, როგორ ხდება, რომ თვეების განმავლობაში მრიცხველის ჩვენება ზუსტად ერთი და იმავე თანხას შეადგენს, რაც ბადებს ეჭვს, რომ გაერთიანებული წყალმომარაგების თანამშრომლები ქვითრებს ზეპირად ადგენენ, ცერცვაძე გვპასუხობს, რომ საკითხში გაერკვევა და კომენტარს შემდეგ გააკეთებს.
_ თუ ვინმე დანაშაულს ჩადის და ქვითრებს ზეპირად წერს, აუცილებლად დაისჯება, _ "დაგვამშვიდა" ცერცვაძემ.
