ოზურგეთის დემოკრატიული ჩართულობის ცენტრში, არასამთავრობო ორგანიზაცია "ახალგაზრდები ცვლილებებისათვის" გამგეობის თავმჯდომარე იმედო მარტიკოვი მედიის წარმომადგენლებს შეხვდა და პრესკონფერენცია გამართა.
"ნებისმიერ დემოკრატიულ საზოგადოებაში მიუღებელი და არაეთიკურია პოლიტიკური პარტიების მიერ არასრულწლოვნების პოლიტიზირება, მათი ჩართვა პოლიტიკაში და შემდგომ საკუთარი მიზნებისათვის გამოყენება. ამაზე ჩვენთანაც არის ერთიანი აზრი, რომ ეს დაუშვებელია. ნებისმიერი პოლიტიკური პარტიის წარმომადგენელი დაადასტურებს, რომ ეს მათი პარტიისთვის მიუღებელია.
სამწუხაროდ, მე თავად გავხდი ისეთი პროცესების მონაწილე, სადაც ეს პრინციპები სრულიად უგულველყოფილია და პოლიტიკური პარტია უშუალოდ მონაწილეობდა პოლიტიკურ პროექტში არასრულწლოვანების ჩართვაში. თუმცა, ოფიციალურად ეს სრულიად ლეგალურად ხორციელდება არსამთავრობო ორგანიზაციის მიერ.
საუბარია "ინოვაციებისა და განვითარების ფონდის" (რომლის ერთ ერთი დამფუძნებელია გიორგი ვაშაძე) და "ერთიანი ნაციონალური მოძრაობის" შესახებ. კერძოდ, ეს ორგანიზაცია ახორციელებს ახალგაზრდულ პროექტს სახელმწიფო 3:0.
პროექტის მიზანია აქტიური ახალგაზრდების მოძიება და სხვადსხვა პრობლემების კვლევა და ამ პრობლემების მოგვარების ინოვაციური გზების ძიება. სამწუხაროდ რეალობა არც ისე სასიამოვნოა, როგორც ეს მათი ოფიცალური მიზნებიდან ჩანს." – თქვა შეხვედრაზე იმედა მარტიკოვმა.
მისივე თქმით, ამ პროექტის განხორციელებას ოზურგეთში უშუალოდ კურირებდა და კურირებს ოზურგეთის "ერთიანი ნაციონალური მოძრაობის" პარტიული ორგანიზაცია, ხოლო პროექტს ახორცილებდა არასრულწლოვანი. ხდებოდა უამრავი არასრულწლოვნის ჩართვა პროექტში ისე, რომ მათ იციან მხოლოდ პროექტის ოფიციალური მიზნები და ვინ დგას რეალურად პროექტის უკან, მათვის უცნობია.
" პროექტის ხარჯებს უშუალოდ ფარავდა პარტიული ოფისი და მისი თავმჯდომარე დავით მჟავანაძე, რაც მიუღებელია ჩემთვის. პროექტს არ ყავს ხელმძღვანელი, რომელიც იქნება სრულწლოვანი და აიღებს რაიმე პასუხისგებლობას ამ ბავშვების საქმიანობაზე. არ ხდება ახალგაზრდების საქმიანობის იურიდიულ ჩარჩოებში მოქცევა, ზედამხეველობა, არ არიან მათი მშობლები სათანადოდ ინფორმირებულები, რაც კიდევ ერთხელ ადასტურებს ეთიკის დარღვევას. ეს ბავშვები მოქმედებენ სტიქიურად.
"ახალგაზრდებმა მიიღეს ფონდიდან დაპირება, რომ ისინი გაემზავრებიან ფონდის მიერ შექმნილ საზაფხულო ბანაკში და 4 დღის განმავლობაში დაისვენებენ ხონის მუნიციპალიტეტის სოფელ გორდში, სადაც მოწყობილია ბანაკი. მათ ჩაუტარდებათ ტრენინგები. მე დარწმუნებული ვარ, ეს არის ახალგაზრდების პოლიტიკაში ჩათრევის ძალიან კარგად მოფიქრებული სქემა, რომელშიც მონაწილეობს "ინოვაციებისა და განვითარების ფონდი" და ოზურგეთის შემთხვევაში, ადგილობრივი "ერთიანი ნაციონალური მოძრაობის" პარტიული ოფისი.
მე ნამდვილად არ მგონია, რაიმე ინფორმაციას ფლობდნენ ამ ბავშვების მშობლები, თუ რა ხდება ამ პროეტის ოფიციალური მიზნების მიღმა. მოვუწოდებ მათ, არ დაუშვან მათი შვილების პოლიტიზირების მცდელობა ნებისმიერი პარტიის მხრიდან. ამ შემთხვევაში კი "ერთიანი ნაციონალური მოძრაობის" მხრიდან." – ამბობს მარტიკოვი.
"ერთიანი ნაციონალური მოძრაობის" ოზურგეთის რაიონული ორგანიზაციის თავმჯდომარე, დავით მჟავანაძე ჩვენთან სატელეფონო საუბრის დროს ამბობს, რომ მარტიკოვს თვითდამკვიდრების პრობლემა აქვს.
" რა კომენტარი უნდა გავაკეთო მარტიკოვის განცხადებაზე? ეტყობა გუშინ ცუდი სიზმარი ნახა. მე როგორც ვიცი, თვითონაც თანამშრომლობდა "ინოვაციების და განვითარების ცენტრთან" და რადგან იქ ვერ დაიმკვიდრა ადგილი, ახლა რაღაც არადამაჯერებელ ამბებს ყვება. იმედო მარტიკოვს ეტყობა ის არ მოსწონს, რომ "ინოვაციებისა და განვითარების ფონდი" ყველა რეგიონში საინტერესო და ახალგაზრდებისთვის მორგებულ პროექტებს ახორციელებს." – გვითხრა დავით მჟავანაძემ.
"გურია ნიუსი" ასევე დაუკავშირდა "ინოვაციებისა და განვითარების ფონდის" თანადამფუძნებელს გიგა გლუნჩაძეს.
პროექტ " სახელმწიფო 3:0"-ს ერთ-ერთი დამფუძნებელი გიგა გლუნჩაძე ამბობს, რომ ბანაკს პოლიტიკასთან შეხება არ აქვს, ეს არის სიცრუე.
_"კომენტარი ამ საკითხთან დაკავშირებით ნამდვილად არ არის რთული გასაკეთებელი. პროექტს, რომელზეც იმედო მარტიკოვი საუბრობს, ვახორციელებ უამრავ ახალგაზრდასთან ერთად და ზუსტად ვიცით, რასაც ვემსახურებით და რისთვისაც კეთდება ეს ყველაფერი. რაც შეეხება პრესკონფერენციასთან დაკავშირებულ ჩემს კომენტარს, ამას არ ჩათვლიდი საჭიროდ, უბრალოდ იმედო მარტიკოვს ძალიან კარგად ვიცნობ და ქალაქ ოზურგეთში ის ამ პროექტის განხორციელებაში გარკვეული ხანი მეხმარებოდა.
ზუსტად ვიცი რასთან გვაქვს საქმე, მაგრამ ამასთან დაკავშირებით არ დავიწყებ საუბარს. ამას იმედოც მიხვდება, რასაც ვამბობ. ის არის ძალიან ნიჭიერი ახალგაზრდა, მაგრამ მე ვისურვებდი ასეთი ახალგაზრდების სხვადასხვა ძალებისგან გამოყენება არ მომხდეს და ამას ის ძალიან მალე მიხვდება. სრული პასუხისმგებლობით ვამბობ, ამ ბანაკს არნაირი შეხება არ აქვს პოლიტიკასთან. ჩვენს წესებში მკაცრად არის გაწერილი, რომ რელიგიური და პოლიტიკური პროპაგანდა არის მკაცრად აკრძალული."– გვითხრა გიგა გლუნჩაძემ.
"გურია ნიუსის" კითხვაზე, იციან თუ არა პროექტის მონაწილე ახალგაზრდების მშობლებმა სად დადიან მათი შვილები, გლუნჩაძე ასეთ კომენტარს აკეთებს: "მე დარწმუნებული ვარ, მშობლებმა იმაზე კარგად იციან სად დადიან მათი შვილები, ვიდრე იმედო მარტიკოვმა. ოზურგეთში ამ პროექტს ხელმძღვანელობს გიორგი ელიაძე, რომელიც ძალიან აქტიურია და კარგი ახალგაზრდაა."
