“მომატყუეს, პრეზიდენტი საავადმყოფოდან რომ გამოვა, წერილებს მერე მიიღებსო”

ლაითურელი 73 წლის ირაკლი ბოლქვაძე “გურია ნიუსის” ოზურგეთის განყოფილებაში მოვიდა და გვთხოვა, თავისი გასაჭირის შესახებ მკითხველისთვის გვეამბო.

_ მინდოდა სააკაშვილს პირადად შევხვედროდი. ვიცოდი, რომ ახალი საავადმყოფოს გახსნაზე ჩამოდიოდა. მივედი, პოლიციამ ალყა შემომარტყა, ახლოს არ მიგიშვებო, არ მიმაცემინეს წერილი. მომატყუეს, გარეთ რომ გამოვა, წერილებს მერე მიიღებსო. მეც დავუჯერე.

_ რას ითხოვდით?

_ პრობლემები მაქვს კუთვნილ მიწასთან დაკავშირებით. მინდა მიწის დარეგისტრირება და ვერ ვახერხებ, არადა, საბუთები წესრიგში მაქვს. ჩემი გასაჭირის შესახებაც მეწერა: ავად ვარ და დახმარება მჭირდება. საავადმყოფოდან რომ გამოვიდა სააკაშვილი, არც გაჩერებულა, დაგვიქნია ხელი, კარგად იყავითო და წავიდა. მე წამოვედი, იქნებ, ქალაქში გაჩერდეს სადმე და ვნახო,-მეთქი. რესტორან “ქალაქურთან” იყო გაჩერებული. რა თქმა უნდა, იქვე პოლიციაც იდგა. პოლიციელმა დამინახა წერილი ხელში. მომეციო, _ მითხრა. ვთხოვე, არ მომატყუო და გადაეცი,-მეთქი. კიო, მითხრეს და გამომართვეს, _ ამბობს ბოლქვაძე და თავისი გასაჭირის შესახებ განაგრძობს: _ სოციალურ დახმარებას ვიღებდი და მომიხსნეს. საოპერაციო ვარ _ 1500 ლარი მჭირდება. არც პოლისი მაქვს და არც _ ფული. სამი წელი ლოგინად ჩაწოლილი ვიყავი. ოზურგეთის გამგეობაშიც მატყუებენ _ ერთი თვეა, დავდივარ და მეუბნებიან, მოგცემთ დახმარებას, დაგეხმარებითო და არაფერი. სოციალური სამსახურის უფროსმა, ვაშალომიძემ არ დამიჯერა ჩემი ავადმყოფობის შესახებ. ვარ ასე, დავდივარ წინ და უკან.

რაც შეეხება ლაითურს, გზა ჩვენ არ გვაქვს და კვალი. ორი საათი გვინდა, ოზურგეთამდე რომ ჩამოვიდეთ. წყალს ჯვარი სწერია _ 21-ე საუკუნეში, რომ წყალი მოგენატრება, როგორი ცხოვრება გვექნება ლაითურელებს, თქვენ განსაჯეთ. არანაირი შემოსავალი არ გვაქვს. ზამთარში ძალიან გვიჭირს, რომ გამოზაფხულდება, ახალგაზრდები თურქეთში მიდიან სამუშაოდ და ოჯახებს ეხმარებიან. მთავრობა სულ არ გვაქცევს ყურადღებას. სოფლის რწმუნებულს, რამდენიც გინდა, მიმართე, ასე გვპასუხობს: ჩვენ არაფერი არ გვეხება, ოზურგეთის გამგეობას მიმართეთო.

ოზურგეთის მუნიციპალიტეტის გამგეობის სოციალური სამსახურის უფროსი, ნათია ვაშალომიძე “გურია ნიუსთან” საუბარში აღნიშნავს, რომ ირაკლი ბოლქვაძეს ოზურგეთის მუნიციპალიტეტის გამგეობა შარშან 100 ლარით დაეხმარა: _ ჩვენ მას შევთავაზეთ, რომ იმ შემთხვევაში, თუ ოპერაციას გაიკეთებდა, 500 ლარით დავეხმარებით, რომელსაც მუნიციპალიტეტის გამგეობა ჩაურიცხავდა. თუმცა, როგორც ჩანს, არ იკეთებდა ოპერაციას, რადგან ამ შემოთავაზებაზე უარი გვითხრა. წელს მოვიდა და გვთხოვს, ის 500 ლარი მომეცითო. საოპერაციოდ თანხა, შეიძლება, გადავრიცხოთ, მაგრამ მოქალაქისთვის ხელზე ფულის მიცემის უფლება არ გვაქვს. მას კი ამის არ სჯერა, _ გვითხრა ვაშალომიძემ.