ქალაქ ოზურგეთში ცენტრალური უნივერმაღის გვერდით, შადრევნის განახლების სამუშაოები ჯერ კიდევ გასულ წელს დაიწყეს. ოზურგეთის მუნიციპალიტეტის გამგეობის შესყიდვების სამსახურის უფროსის, ამირან გირკელიძის თქმით, მშენებლობას კომპანია “ქეთურინა” აწარმოებს, თუმცა აღნიშნულ კომპანიაზე ინტერნეტში ვერაფერი ვიპოვეთ. იქიდან გამომდინარე, რომ მშენებლობის ადგილზე არც შესაბამისი აბრაა, კომპანიის შესახებ ზუსტი დეტალების გარკვევა ამ ეტაპზე შეუძლებელია. რედაქციაში შემოსული ინფორმაციის თანახმად, აღნიშნული კომპანიის ხელმძღვანელობა მუშებს ორი თვეა, უხელფასოდ ამუშავებს: _ დეკემბერში ავიღეთ 50 ლარი. მას შემდეგ ერთი თეთრი არ აგვიღია. დარშიც და ავდარშიც ვმუშაობთ, რომ სამუშაოები დროულად დასრულდეს, ხელფასის გადახდა კი არავის უნდა, _ გვითხრა ერთ-ერთმა მუშამ.
ადგილზე მისულებს, სამშენებლო ობიექტზე ათამდე მუშა დაგვხვდა. იქვე იყო სამშენებლო სამუშაოების ხელმძღვანელიც. მისი თქმით, აღნიშნული ინფორმაცია სიმართლეს არ შეესაბამება და ყველა მუშა ხელფასს დროულად იღებს.
ხელმძღვანელის ნათქვამი დაადასტურეს მუშებმაც და აღნიშნეს, რომ მათი სამუშაო დღე დილის ათ საათზე იწყება და საღამოს ექვს საათზე მთავრდება. მუშებმა ისიც თქვეს, რომ მისაღები სამუშაო პირობები აქვთ და ხელფასსაც დროულად იღებენ. თუმცა, მოგვიანებით იქიდან წამოსვლის შემდეგ დაგვიკავშირდნენ და გვითხრეს, რომ სიმართლის თქმა იმ მიზეზით ვერ მოახერხეს, რომ “პრარაბმა” აუკრძალა:
_ როდესაც აქ იყავით, კომენტარი ვერ გავაკეთეთ _ “პრარაბი” იყო აქ და საუბრის საშუალება არ მოგვცა. შეიძლება, ერთ ან ორ მუშას მისცენ ხელფასი, მაგრამ უმეტესობას ორი თვეა უხელფასოდ გვამუშავებენ. ისინი კი ამბობენ, დავარიგეთო, მაგრამ ასე არ არის. წარმოადგინონ უწყისები და ნახეთ, ვის რა აქვს აღებული, _ გვითხრეს მუშებმა.
გვითხრეს ისიც, რომ მუშებს კომენტარების გაკეთების გამო, სამსახურის დაკარგვითაც დაემუქრნენ.
სამშენებლო კომპანიის წარმომადგენელთან, როინ აბუსერიძესთან (მისი კოორდინატები ამირან გირკელიძემ მოგვაწოდა) დაკავშირებას ჩვენ მთელი დღის განმავლობაში ვცდილობდით, თუმცა, მას ტელეფონი გამორთული ჰქონდა.
თავად გირკელიძე ამ პრობლემის შესახებ საქმის კურსში არ აღმოჩნდა:
_ მე შემიძლია გითხრათ, რომ ის სამუშაოები, რომელიც ამ კომპანიამ ოზურგეთში შეასრულა, ყველა ხარისხიანია. ხელფასების დაგვიანების შესახებ არაფერი ვიცი, რადგან ეს ჩვენ არ გვეხება. თუმცა, ჩემთვის, რიგითი ოზურგეთელისთვის, სამწუხაროა, რომ აქაური მუშახელი ხელფასს დროულად ვერ იღებს, _ გვითხრა გირკელიძემ.
ამ საკითხზე ინფორმაცია არც გურიის გუბერნატორის მოადგილეს ლაშა შაფაქიძეს აღმოაჩნდა, რომელიც გურიაში სამშენებლო სამუშაოებს კურირებს.
“გურია ნიუსი” ამ თემას ისევ მიუბრუნდება.
