საფეხბურთო კლუბ ლანჩხუთის "გურიის" ხელმძღვანელობამ ღია წერილით მიმართა საქართველოს ფეხბურთის ფედერაციის პრეზიდენტს ზვიად სიჭინავას და აღმასრულებელი კომიტეტის წევრებს, სადაც კლუბი საქართველოს ფეხბურთის ფედერაციის სრულფასოვან წევრობას ითხოვს.
"ბატონებო! მოგეხსენებათ, რომ ლანჩხუთის საფეხბურთო კლუბი "გურია’" ქართული ფეხბურთის ისტორიაში დიდი ტრადიციების მქონე კლუბია. იგი დაარსდა 1924 წელს და მას შემდეგ არაერთი წარმატება აქვს მოპოვებული.
სსრკ-ის საფეხბურთო ჩემპიონატებში ორჯერ (1986 და 1989 წლებში) მოახერხა უმაღლეს ლიგაში გადასვლა, რაც ასეთი პატარა რაიონისთვის მსოფლიო მასშტაბით სენსაციური მოვლენა გახლდათ. ამასთან, ასეთ წარმატებას საქართველოდან მხოლოდ თბილისის "დინამომ" და ქუთაისის "ტორპედომ" მიაღწიეს. ლანჩხუთის "გურია" არის საქართველოს მრავალგზის ჩემპიონი და თასის მფლობელი.
ცალკე აღნიშვნის ღირსია ის ფაქტი, რომ 1990 წელს, როცა ქართული ფეხბურთი დამოუკიდებლობის გზას დაადგა, "გურია" იყო პირველი ქართული ფლაგმანი, რომელმაც უარი თქვა სსრკ-ის უმაღლეს ლიგაში თამაშზე და მხარი ღიად დაუჭირა ეროვნული ჩემპიონატის ჩატარებას. "გურია" არის საქართველოს დამოუკიდებელი თასის გათამაშების პირველი გამარჯვებული და ორგზის ვიცე-ჩემპიონი.
ლანჩხუთის "გურიამ" ქართულ ფეხბურთს აღუზარდა არაერთი სახელოვანი ფეხბურთელი: რამაზ ურუშაძე, ილია დათუნაშვილი, ზორბეგ ებრალიძე, გია თავაძე, ვახტანგ ძიძიგური, ბეგი სიხარულიძე, თეიმურაზ ჩხაიძე, გიგლა იმნაძე, გიალო ჩხაიძე და სხვები. მიგვაჩნია, რომ კლუბი, რომელიც ქვეყნის მასშტაბით ერთ-ერთი ყველაზე ტრადიციული და სახელოვანია, უნდა იყოს საქართველოს ფეხბურთის ფედერაციის წევრი-სუბიექტი, რათა "გურიამ", რომელიც ქართულ საფეხბურთო სინამდვილეში ბრენდად არის მიჩნეული, საშუალება ჰქონდეს მიიღოს მონაწილეობა ქართული ფეხბურთის ბედის გადაწყვეტაში და ჰყავდეს ყრილობის დელეგატი, შეეძლოს კანდიდატის წარდგენა, მონაწილეობდეს სფფ-ის პრეზიდენტისა და აღმასრულებელი კომიტეტის წევრების არჩევნებში." – ნათქვამია კლუბის მიერ გაგზავნილ წერილში.
აღსანიშნავია, რომ ეს წერილი მას შემდეგ გასაჯაროვდა, რაც ლანჩხუთს ფედერაციის პრეზიდენტობის ერთ – ერთი სავარაუდო კანდიდატი მერაბ ჟორდანია სტუმრობდა, რომელსაც დახურულ კარს მიღმა შეხვედრა ჰქონდა მუნიციპალიტეტისა და გურიის ფეხბურთის რეგიონული ფედერაციის ხელმძღვანელ პირებთან. ამ შეხვედრის შემდეგ დაანონსდა, რომ ჟორდანია მართლაც აპირებს საპრეზიდენტო მარათონში ჩართვას და სწორედ საფეხბურთო კლუბი "გურია" იქნება მისი წარმდგენი ამ პოსტზე.
