ორშაბათს, სუფსის მოსახლეობამ, სოფელ ახალსოფელში, იქ, სადაც ავტობანის მშენებელი ჩინური კომპანიის ოფისის შესასვლელია, საპროტესტო აქცია გამართა.
აქციის მონაწილეთა საპროტესტო მუხტი ერთ წელზე მეტია, რაც გრძელდება _ მოსახლეობა იმ ფართობების კომპენსირების თანხას ითხოვს, სადაც ავტომაგისტრალმა უნდა გაიაროს. სახელმწიფოს მიერ ერთ კვადრატულ მეტრზე შეთავაზებული სამი ლარი, მოსახლეობისთვის კატეგორიულად მიუღებელია _ ისინი გაცილებით მეტს ითხოვენ.
გურამ ჩხარტიშვილი აქციის ერთ-ერთი ორგანიზატორია:
"მთავარი პრობლემა ხალხის აბუჩად აგდებაა. როდესაც გურიაში, კერძოდ, ნატანებში, ერთ კვადრატულ მეტრ მიწის ფართობში 19 ლარი დაურიგეს ხალხს, ქობულეთი-ჩაქვის მონაკვეთზე კი _ 23 -27 ლარი, ამის შემდეგ მოდიან და სამ ლარს გვთავაზობენ მარჩენალ საყანე ფართობებში. 90-იან წლებში ამ მიწებმა გადაგვარჩინა შიმშილისაგან. მიაქვთ ასეთი ფართობები სამუდამოდ და გროშებს გვიხდიან. ყველა ინსტანცია გავიარეთ, ვის არ მივმართეთ. ისიც გვითხრეს, ნატანებში "ციცინათელას" გასართობი პარკია და მიწას ფასიც მეტი აქვს სტრატეგიულადო. "ციცინათელა" და "ეშმაკის ბორბალია" სტრატეგიული და ტერმინალი _ არა?
საგზაო დეპარტამენტთან და ინფრასტრუქტურის სამინისტროსთან გვაქვს საქმე. შავლიაშვილი იყო მაშინ მინისტრი, გავაფრთხილეთ _ ეს საბოტაჟია ქვეყნის წინაშე და "დაგორდება თქვენი თავებიო". ასრულდა ეს კიდეც. ერთი წლის წინ უნდა დაწყებულიყო მშენებლობა, მაგრამ კომპანია "ალტკომმა", რომელსაც ტენდერი ჰქონდა მოგებული, 46 მილიონი ლარი გააქრო, ახლა კი თურქმენეთში აკეთებს გზებს. ადგილობრივმა ხელისუფლებამ რა ქნას, ყველაფერს აკეთებს, რაც შეუძლია, მაგრამ მეტი არ ძალუძს, სამწუხაროდ", _ გვითხრა გურამ ჩხარტიშვილმა.
აქციაზე მყოფმა ლანჩხუთის მუნიციპალიტეტის გამგებელმა ზაზა ურუშაძემ, მოსახლეობის ინტერესების გათვალისწინებასთან ერთად, რეალობის აღქმის აუცილებლობაზე გააკეთა აქცენტი: "ჩვენ, რა თქმა უნდა, დაინტერესებულები ვართ, მოსახლეობამ, რაც შეიძლება მეტი თანხა აიღოს და კმაყოფილი იყოს, მაგრამ რეალობას არ უნდა ავცდეთ. არ ვიცი, საიდან, მაგრამ ამ ხალხს ცრუ ინფორმაციას აწვდიან, თითქოს, ნატანებში 1კვ/მ მიწაზე გაიცა 19 ლარი. ეს ინფორმაცია რამდენჯერმე გადავამოწმეთ და არ დასტურდება. რეალურად, ზოგს 4,5 ლარი უწევს, ზოგს 5 ლარი. არიან ადამიანები, რომლებსაც კონტრაქტზე ხელიც კი აქვთ მოწერილი, მაგრამ თანხას დამატებით ითხოვენ. ასეთი რამ ისე უნდა მოვითხოვოთ, რეალობასთან ახლოს რომ იყოს. ორი დღის წინ ვესაუბრე ინფრასტრუქტურის მინისტრს. მან განაცხადა, რომ ხუთშაბათს გამოაგზავნის სპეციალურ ჯგუფს, რომელიც კიდევ ერთხელ აუხსნის რეალურ სურათს მოსახლეობას. ეს გზა სტრატეგიული მნიშვნელობისაა და ქვეყნის განვითარებისთვის დიდი როლი აკისრია. ეს ყველამ უნდა იცოდეს და ყველამ გაითავისოს", _ თქვა ურუშაძემ.
აქცია მონაწილეებმა ხუთშაბათამდე გადადეს. თუმცა, როგორც ამბობენ, მათ მხოლოდ ინფრასტრუქტურის მინისტრის ჩამოსვლა დააკმაყოფილებთ:
"ჩვენ ვითხოვთ მხოლოდ ერთს _ ჩამოვიდეს ინფრასტრუქტურის მინისტრი, სხვას არ ვენდობით. ჩვენ ვენდობით ბატონ ზაზას სიტყვას. მივდივართ სახლებში, მაგრამ ხუთშაბათს ველოდებით მინისტრს. სხვა დღეც რომ იყოს, არც ესაა პრობლემა. მთავარია, ნოდარ ჯავახიშვილი შეგვხვდეს", _ ხალხის სახელით განცხადება გააკეთა აქციის ორგანიზატორმა ალეკო ევგენიძემ.
"თუ რამ გაუთვალისწინებელი არ მოხდა, მინისტრი ჩამოვა, თუ არა _ კომპეტენტური პირები მაინც ჩამოვლენ", _ უთხრა ზაზა ურუშაძემ შეკრებილებს.
