კახა ებრალიძეს ვეტერანები უპირისპირდებიან

დღეს დიდი აყალ – მაყალი  იყო გურიის რეგიონული ფეხბურთის ფედერაციის ოფისში, სადაც ადგილობრივმა ვეტერანებმა გრფფ-ის პრეზიდენტ კახა ებრალიძეს  მოთხოვეს, გაეკეთებინა კომენტარი იმ ფაქტზე,  თუ რატომ არ აკეთებს რეგიონული ფედერაცია სფფ-ის საპრეზიდენტო არჩევნებზე მერაბ ჟორდანიას კანდიდატურის წარდგენას.
როგორც ცნობილია, ჟორდანიამ საარჩევნო მარათონში ჩართვა ოფიციალურად რამდენიმე დღის წინ ლანჩხუთში ვიზიტისას დაადასტურა და  მისი სურვილიც იყო კანდიდატად სწორედ ლანჩხუთიდან  წარდგენილიყო.
ამ ეტაპზე, როცა ლანჩხუთის `გურიას“ საარჩევნო ხმა არ აქვს და შესაბამისად, არც კანდიდატის წარდგენა შეუძლია (შეხვედრაზე ცნობილი გახდა, რომ ორი დღის წინ სფფ-ში გაგზავნილ წერილზე წევრად მიღებაზე, `გურიამ“ უარი მიიღო), არმოჩნდა,რომ   გურიიდან მხოლოდ რეგიონულ ფედერაციას შეუძლია არჩევნებში მონაწილეობა და კანდიდატის წარდგენაც.
„ეს მერაბ ჟორდანიაა და ამით ყველაფერია ნათქვამი. ლანჩხუთმა ის უნდა წარადგინოს. რატომ არ არის შესაძლებელი ამის გაკეთება? ამ საკითხზე კონკრეტულ პასუხს მოვითხოვთ“ – აცხადებდა „გურიის“ ყველა დროის ყველაზე დიდი წარმატების  შემოქმედი, ბეგი სიხარულიძე.
გრფფ-ის თავკაცმა შეკრებილებს აუხსნა, რომ მისთვის მიუღებელია, მხარს ერთ კანდიდატს უჭერდეს, მეორე წარადგინოს და მესამეს მისცეს ხმა.“ `ასე არასდროს მიცხოვრია, რომ ერთი მეთქვა და მეორე მეკეთებინა. ეს მიუღებელია ჩემთვისაც, მერაბ ჟორდანიასათვისაც და იმისთვისაც, ვისაც მხარს დავუჭერ. კიდევ ერთხელ ვაცხადებ , რომ გიდასტურებთ ჩემს  დიდ პატივისცემას ბატონი მერაბის მიმართ, ვისაც ლანჩხუთის ფეხბურთისთვის დიდი დამსახურება აქვს,მაგრამ სამწუხაროდ, არსებულ სიტუაციაში  ვერ ვახერხებ მის მხარდაჭერას და   პირადად  ბოდიშიც მოვუხადე მას“ – განაცხადა  ებრალიძემ.
რეგიონის ფეხბურთის მესაჭემ ერთგვარი ანგარიშიც ჩააბარა ვეტერანებს:
‘’ ამ 5 წლის მანძილზე, რაც გრფფ–ის თავკაცი ვარ, ფედერაციის მხარდაჭერით ბევრი რამ გავაკეთეთ – ორჯერ გუნდი ლიცენზიის გარეშე დავუშვით უმაღლეს ლიგაში, 750 ათას ლარიანი მინდორი დავაგეთ, 80 ათასი ლარის ინდივუდუალური სკამები მივიღეთ, ავაშენეთ რეგიონული ოფისი’’ – აცხადებდა ებრალიძე, მაგრამ ვეტერანებს  ჟორდანიას წარდგენის გარდა არაფერი აინტერესებდათ.
შეხვედრაზე ადგილი სიტყვიერ შეურაცყოფასაც ჰქონდა . ერთ–ერთი  ვეტერანი სამწუხაროდ კორექტულობის  ფარგლებსაც გასცდა და იქ მყოფმა ადამიანებმა მისი დაშოშმინება მოახერხეს..
„ეს არ დამიმსახურებია. შეურაცხყოფას მაყენებთ, ამის მიუხედავად თქვენს ასაკს პატივს ვცემ, აქამდეც დიდ პატივს გცემდით და, მაგრამ ასეთი საუბარი ჩემთან არ გინდათ“ –  უპასუხა მას გრფფ-ის თავკაცმა  და  შეკრებილებს  მიმართა: „სამწუხაროდ, მე არ მახსოვს, რომ თქვენ გაგეპროტესტებინოთ, როცა გუნდი უმაღლეს ლიგაში გადავიყვანეთ და ჩვენ რომ სახლებში გაგვყარეს.არც შარშან, როცა არაფერი დამიშავებია და აქ არჩევნები ჩამიშალეს და ეს მაშინ, როცა ძალიან ბევრი გაკეთდა ამ ოთხ წელში. არც ახლა, როცა გუნდი უფულოდ ჩავიბარეთ და შემდეგ ისევ გაგვიშვეს. თუმცა, ამის მიუხედავად, ვაფასებ რა თქვენს უდიდეს დამსახურებას, ყველას დიდ პატივს გცემთ, თქვენი აზრი ჩემთვის მნიშვნელოვანია“ _ დასძინა ებრალიძემ .
გრფფ-ის თავკაცს ზოგი უხეშად და ზოგიც მშვიდად თხოვდა, როგორმე გამოენახა გზები და ლანჩხუთისთვის სწორი გადაწყვეტილება მიიღოს. „უბრალოდ  მერაბ ჟორდანია რომ არ წარვადგინოთ ეს იქნება ჩვენი სირცხვილი“ – ჯიუტად  აცხადებდნენ ვეტერანები.
„გასაგებია თქვენი გულისტკივილი, მაგრამ , როცა გურიის ფედერაციისგან ითხოვთ, ხომ არ ჯობდა, მანამდე კლუბის ხელმძღვანელობისთვისაც მოგეთხოვათ მერაბ ჟორდანიას მხარდაჭერის ღიად დაფიქსირება! მე არ ვამბობ წარდგენას, რისი უფლებაც კლუბს არ აქვს, ვამბობ საჯარო მხარდაჭერას, როგორც ეს `გურიის“ ლეგენდამ, თემურ ჩხაიძემ გააკეთა. პირდაპირ გეტყვით, კლუბს ხმაც რომ ჰქონდეს, ამას ვერ გააკეთებს“ -აღნიშნა ებრალიძემ.
ზოგი დაეთანხმა მას -მთავრობა რასაც ეტყვის, საბიუჯეტო კლუბი იმას გაკეთებსო, ზოგმა თქვა – ეს არაფერს ცვლისო, ზოგს მიაჩნია ზაზა ურუშაძე კმაყოფილიც უნდა იყოს კლუბს ხმის უფლება რომ არ გააჩნია, მაგრამ  ზოგს ამ სიტყვებზე ისეთი შთაბეჭდილება  დაგვრჩა, რომ გრფფ-ის თავკაცზე ზეწოლა ხორციელდება, თუმცა, თავად ებრალიძემ ეს ჩვენთან საუბარში არ დაადასტურა.
და მაინც, ფაქტია, რომ კახა ებრალიძე მძიმე დღეშია.აქეთ ადამიანური ფაქტორები, იქით ლანჩხუთური ნიუანსები, კიდევ შესაძლო ზეწოლა, მაგრამ ვეტერანები მაინც ერთს გაიძახიან – ებრალიძემ ჟორდანია აუცილებლად უნდა წარადგინოსო.