"გურია ნიუსის" მიერ მოპოვებული ინფორმაციით, ამ დღეებში, ა.(ა).ი.პ-ში (არასამეწარმეო არაკომერციული იურიდიული პირი) რეორგანიზაცია იწყება, რასაც თანამშრომლების შემცირება მოყვება. ჩვენს მიერ მოპოვებული ინფორმაციით, ყველაზე მეტი თანამშრომელი (საუბარია 80 ადამიანზე) ა.(ა).ი.პ "ოზურგეთის სერვისცენტრში" გაათავისუფლეს.
"გურია ნიუსი" ამ საკითხთან დაკავშირებით ქალაქ ოზურგეთის მერს, ბეგლარ სიორიძეს დაუკავშირდა, რომელიც აცხადებს, რომ ა(ა)იპ-ებში შტატები გაბერილი იყო.
„ისევე, როგორც სხვა ა(ა)იპ-ებში, მათ შორის ა(ა)იპ "ოზურგეთის სერვისცენტრში" შტატები იყო გადაბერილი. ამიტომ ჩატარდა რეორგანიზაცია და მოხდა თანამშრომლების განთავისუფლება სამსახურიდან. ასევე მოხდა სხვა ა.(ა).ი.პშიც. სადაც კი რეორგანიზაცია ჩავატარეთ ყველგან მოხდა შტატების შემცირება.
კითხვაზე: "გადაბერილი" შტატები ახალ ხელისუფლებას დახვდა თუ მისი მერობის პერიოდში მოხდა? – სიორიძე გვპასუხობს: _ეს იყო ჩვენს მოსვლამდე, ახლა მოხდა შემცირება, მანამდე არ მომხდარა ეს პროცესი. ახლა მოხდა ეს შემცირება იმიტომ, რომ გადაბერილი იყო შტატები და არ ჭირდებოდა ამდენი თანამშრომელი", _ ამბობს სიორიძე.
თუმცა, აქვე ადასტურებს, რომ ახალი კადრების დამატება ა(ა)იპ-ებში მისი მერობის პერიოდშიც მოხდა.
„ზოგან მოხდა, ზოგან პირიქით მოხდა, მაგრამ რეორგანიზაცია ახლა მოხდა", _ გვითხრა ბეგლარ სიორიძემ.
ამ ფაქტს ეხმაურება "გაერთიანებული დემოკრატიული მოძრაობის" ოზურგეთის ორგანიზაცია.
საზოგადოებაში გავრცელებული ინფორმაციის მიხედვით, ოზურგეთის მერიის დაფუძნებულ ა(ა)იპ "ოზურგეთის სერვისცენტრიდან" განთავისუფლებულია 100 თანამშრომელი. განთავისუფლების საფუძველია ოზურგეთის მერის მოთხოვნა, ხოლო შემსრულებელი გახლავთ თავად ააიპი-ს ხელმძღვანელობა. ამავე ინფორმაციის მიხედვით მასობრივი განთავისუფლებას მერია იმით ამართლებს, რომ არ გააჩნია სახსრები ანაზღაუროს მოსამსახურეთა ხელფასები. ასევე არსებობს ალტერნატიული ინფორმაცია, რომლის მიხედვითაც 100 თანამშრომელი უხელფასო შვებულებაში იქნა გაშვებული. საზოგადოების ინფორმირებისათვის განვმარტავთ, რომ ხსენებული ააიპ-ის ძირითად საქმიანობას წარმოადგენს ქალაქის დასუფთავება.
„თუ ეს ინფორმაცია შეესაბამება სიმართლეს, მაშინ ჩვენ მივმართავთ კითხვებით ქალაქ ოზურგეთის მერს, ბეგლარ სიორიძეს: – რამ გამოიწვია შრომითი ურთიერთობის მასობრივი შეჩერება/შეწყვეტა დასაქმებულებთან; მასობრივი განთავისუფლება და ამ მიზნით თანხების ხარჯვის ოპტიმიზაცია კავშირშია თუ არა პრემირმინისტრის განცხადებასთან თანხების არამიზნობერივ ხარჯვასთან დაკავშირებულ მერებისა და გამგებლების სავარაუდო პასუხისმგებლობასთან; რა ეკონომიას მიიღებს მასობრივი განთავისუფლებით ქალაქ ოზურგეთის ბიუჯეტი, შესაძლებელი იყო თუ არა მასობრივი განთავისუფლების თავიდან აცილება სხვა მიმართულებით თანხების ხარჯვის შემცირების ხარჯზე; შეძლებს თუ არა სრულფასოვნად ოზურგეთის სერვისცენტრი მასზე დასკისრებული ვალდებულებების შესრულებას მასობრივი განთავისუფლების შემდეგ და თუ შეძლებს რატომ იყო ადრეულ პერიოდში 100 ადამიანი დასაქმებული თუ კი მათ გარეშე შესაძლებელი იყო ააიპს განეხორციელებინა თავისი საქმინობა; რა კრიტერიუმებით იქნა შერჩეუული და ვინ შეარჩია სამსახურიდან განთავისუფლოებული ადამიანები; მასობრივი განთავისუფლება შეზღუდულია საქართველოს კანონმდებლობით და ასეთი შემთხვევა ითვალისწინებს, როგორც დასაქმებულების ასევე შრომითი საქმინობაზე სახელმწიფო კონტროლის განმახორციელებელი ორგანოს ინფორმირებასა და შეთანხმებას, შესაბამისად გთხოვთ გვიპასუხოთ მასობრივი განთავისუფლების დაწყებამდე რა მოქმედებები იქნა განხორციელებული ოზურგეთის მერიის და ოზურგეთის სერვისცენტრის მხრიდან განთავისუფლებული პირების შრომითი უფლებების დაცვის მიზნით; მოხდება თუ არა განთავისუფლებული ადამიანების უკან სამსახურში აყვანა წინასაარჩევნო პერიოდში, მათგან და მათი ოჯახის წევრებისაგან საარჩევნო ხმების მიღების სანაცვლოდ;
ხსენებული ფაქტის დადასტურების შემთხვევაში ასევე მივმართავთ საქართველოს შრომის ჯანმრთელობის და სოციალური დაცვის სამინისტროს გააკეთოს ოფიციალური განმარტება დაცული იქნა თუ არა დამსაქმებლის მიერ საქართველოს შრომის კოდექსის 38/1-ე მუხლის დანაწესი.
გაერთიანებული დემოკრატიული მოძრაობის ოზურგეთის ორგანიზაცია მხარდაჭერას უცხადებს იმ პირებს, რომლებიც თვლიან, რომ მათ მათი სამსახურიდან დათხოვნა მოხდა კანონის დარღვევით, _ აცხადებენ "გაერთიანებული დემოკრატიული მოძრაობის ოზურგეთის ორგანიზაციის" ოფისში.
"გურია ნიუსი" ამ თემასთან დაკავშირებით მუშაობას აგრძელებს და ვრცელ მასალას მოგვიანებით შემოგთავაზებთ.
